IA-p ataatsimeersuarnera 2024: Partiip malittarisassai nutarterneqassapput
Ilaasortaanermut akiliutit appartinneqassapput, partiimut akileraarutinut piumasaqaatit sukaterneqassapput, siulersuisuunerit ajunngitsorsisalissapput. Siulersuisuunerit tunuartussanngortut malittarisassanik allannguisoqarnissaanik siunnersuutit ataatsimeersuartunit akuersissutigineqassappata allannguutissat ilaat taakkuupput.
Inuit Ataqatigiit 2021-imi ataatsimeersuarneranni 2018-imili siulittaasunngortoq, Múte Bourup Egede, unammillerteqarani siulittaasutut ingerlaqqippoq. Maanna ilimanarsivoq partiimi qinigaaffimmi tullermi siulittaasutut ingerlaqqissasoq, tassami allamik siulittaasussatut manna tikillugu sassartoqanngimmat. Bourup Egede siulersuisuuneqatinilu partiip malittarisassaasa allannguutissanik siunnersuuteqarpoq.
Assiliisoq: Leiff Josefsen
Inuit Ataqatigiit, ukiut 45-it sinnerlugit Kalaallit Nunaanni inuiaqatigiinnut kiffartuussisimalereerpoq partiip nuna tamakkerlugu katuffia, immikkoortortaqarfii aammalu minnerunngitsumik qinikkat aqqutigalugit, partiillu ataatsimeersuarnerani malittarisassat pissutsinut naleqqussarniarneqarput.
Taamaalilluni partiip siulittaasua Múte Bourup Egede siuttoralugu, partiip ataatsimeersuarnissaanut, Aasianni juulip 20-aniit 21-ata tungaanut ingerlanneqartussami allannguutissanik siunnersuuteqartoqarpoq.
Sumiiffigisami suleqatigiinneq annertusarneqassaaq
Partiip malittarisassai sukumiinerusumik misissuiffigigaanni, allannguutissatullu siunnersuutit sanilliukkaanni partiip illoqarfinni nunaqarfinnilu suleqatigiinnerup annertusarneqarnissaanik kissaateqarneq erserpoq. Assersuutigalugu sumiiffigisami qinikkat, nunaqarfinnilu aqutsisuuppata kommunalbestyrelsimiippataluunniit, immikkoortortaqarfinnut suleqatigiinnissamut pisussaaffeqarnerulersinneqassapput.
- Immikkoortortaqarfiit piunerat kattuffiunitsinnut tunngaviuvoq, pissusissamisoortutut
isigineqarpoq qinikkatut inissisimasut immikkoortortaqarfinnut suleqataasarnerat. Imm. 5.-ip
ersarinnerulersinneratigut immikkoortortaqarfinnut qinikkat pisussaaffeqarnerat
ersarissarneqarpoq, allannguutissatut siunnersuummi taamak tunngavilersuuteqartoqarpoq.
Ilaasortat akiliutaat appasinnerulissapput - partiimulli akileraarutinik akiliisarneq sukateriffigineqassaaq
Partii maannakkut nunatsinni partiit annersarisaat ilaasortaanermut akiliutit appartinneqarnissaannik siunnerfeqarpoq. Siulersuisuunerimmi maanna tunuartussanngortut siunnersuuteqarput inoqarfinni 1.000-it sinnerlugit innuttaqartuni ukiumut ilaasortaanermut akiliut 500 koruuninik apparneqassasoq.
Kisianni partii, soorlu partiit allat aamma misilittagaqarfigalugu ilisarisinnaassagaat, misilittagaqarpoq partiimut akileraarutinik akiliisitsiniartarnermik ajornartorsiuteqarnermik.
- Kattuffik misilittagaqarpoq partiskattimut akiliisitsiniartarnerup ajornakkusoortaranik.
Allattoqarfik partiskattimut akiliisitsiniartarnermut periusissiaqarpoq. Qinikkat partiskattimut
akiliisussaatitaapput. Ukiuni arlalissuarni partiskattimut tamakkiisumik isertitassaasut
anguneqartarsimanngillat. Malittarissassat nutarterneranni pisussaffiit pisinnaatitaaffiillu
sukannernerulerput malitsigisaanillu allattoqarfiup qinikkanik suleqatigineqarnissaa
eqqunneqassasoq innersuussutigineqarpoq.
Allannguutip matuma ilagissavaa malittarisassani akiliutip annertussussaa sumullu
atorneqartussanera ilaalissammat. Taamasilluni akiliutit sumut atorneqartarneri ilaasortanut
ersarinnerulissalluni, allannguutissatut siunnersuut pillugu taamak nassuiaasoqarpoq.
Ilaasortaanermut akiliutip appartinneqarnissaata aamma partiimut akileraarutip sukannernerulersinneqarnissaata saniatigut, nutaatut siunnersuuutigineqarpoq siulersuisuunerni ilaasortat ataatsimiittarnerminni ajunngitsorsiaqartinneqalissasut, ataatsimiinnerit tamaasa 1.500 koruuninik ajunngitsorsiaqalerlutik:
- Siulersuisuunerit isumaqarput siulersuisuunerni kajumissutsimik sulilluni pitsaangaluartoq
piffissartorfiungaatsiartarpoq akisussaffimmillu annertuumik akisussaaffeqartilluni
siulersuisuunerni ilaasortaanermut ataatsimiinnermusiaqartitsisalernissaq pisariaqartoq.
Siulersuisuunerit qinikkatut inissisimanngitsunik ilaqarput aammalu suliffimmik saniatigut
sulisarlutik ilaatigullu ataatsimeeqataasarnerit anaasaqaatigisinnaasarlunikkit. Taassuma
saniatigut kattuffiup ingerlanneqarnera soqutiginartuullunilu tamatigoortuunissaa
(proffesionalisering) siunertaralugu ataatsimiinnermusiaqartitsinissaq innersuussutigineqarpoq, siunnersuummi nassuiaatigineqarpoq.
Allannguutissatut siunnersuutit allat, partiip siulersuisuunerisa siunnersuutigisaat, tamakkiisumik misissuataarneqarsinnaapput partiip nittartagaani.
