ICC: Issittumi Aallartitaq kalaallit toqqagaat sakkortuumik oqariartorneruvoq
Inuit Circumpolar Council naalagaaffiit killeqarfiillu akimorlugit nukittunerusumik suleqatigiinnissamut kaammattuivoq. Kalaalillu Nunaanni Danmarkimilu politikerit eqqortup tungaanut allariarnerannik aamma nersualaarneqarput.
– Ullumikkut nunanut immikkoortutsinnut isumalluutitsinnullu aalajangiinerni aalajangeeqataasarpugut, ICC-p siulittaasua Sara Olsvig oqarpoq.
Assiliisoq: Angu Motzfeldt
Inuit imminut annertunerusumik oqartussaaffiginerat maannakkorpiaq nunarsuarmi politikimut sunniuteqaqataavoq, ICC-mullu ataqqeqatigiittumik suleqatigiinnikkut Issittup eqqissisimaffiunissaa takorluugaavoq.
Tamanna ICC-p siulittaasuata Sara Olsvigip tusagassiuutinut nalunaarummini, maannakkut nunarsuup immikkoortuani pisoqarfioqisumi killiffigiiffigisamini erseqqissaatigaa.
– Sapaatit akunnerini kingullerni pisut aamma Issittup nunarsuarmi qanoq pingaaruteqartiginera takutippaa. Maani nunarsuup immikkoortuani inuuffigisatsinni naalagaaffiit killeqarfii akimorlugit siunertaqarluartumik suliniarnikkut akuunikkullu suli eqqissisimasumik suleqatigiinneq ingerlapparput.
Tassunga atatillugu Issittumi Siunnersuisooqatigiit nukittorsarnissaat pingaaruteqarpoq, Sara Olsvig oqarpoq, taassumalu qanittumi aalajangerneq nuannaarutigaa:
– Danmarkip Kalaallillu Nunaata naalakkersuisuisa Kalaallit Nunaata Kunngeqarfik Danmark sinnerlugu issittumi aallartitamik toqqaasartuunissaanik, Kunngeqarfiullu Danmarkip Issittumi Siunnersuisooqatigiinni siulittaasuutitaqarnermik maajimi tigusinissaani siulittaasuunermik tigusinissaanik nalunaarutaat ilassilluarparput.
– Issittormiumik, issittumi innuttaasut aqutsinerannik toqqaaneq, Siunnersuisooqatigiit isumagisassatit ingerlalluarpaat, tamannalu nunarsuup sinneranut oqariartuutaavoq pingaarutilik, Sara Olsvig oqarpoq.
ICC 1996-mi Issittumi Siunnersuisooqatigiinnik pilersitseqataavoq, sinniisoqatigiillu sulineranni nunap inoqqaavinut sinniisutut ataavartumik issiaveqarluni.
