ICC: Maanna sukataartariaqarpugut
Piffissaq nalorninartulik ornipparput – aamma Naalagaaffiit Peqatigiinni nunarsuullu sinnerani, ICC-p siulittaasua Naalagaaffiit Peqatigiinni nunat inoqqaavisa pisinnaatitaaffii pillugit oqallinnermut atatillugu oqarpoq.
ICC siulittaasuni Sara Olsvig siuttoralugu ulluni makkunani FN-ip nunat inoqqaavisa ataavartumik oqallittarfiani New Yorkimiittumi peqataavoq.
Assi: ICC Greenland
Nunat inoqqaavisa siuttui nunanit tamalaaneersut ulluni makkunani New Yorkimi FN-ip nunat inoqqaavisa ataavartumik oqaloqatigiittarfianni ataatsimiipput.
Naalagaaffiit Peqatigiit nunat inoqqaavisa pisinnaatitaaffii pillugit nalunaarutaata Naalagaaffiit Peqatigiit nunani ilaasortaaffigisaanni FN-illu aaqqissuussaaneranit atuutilersinneqarnissaa ataatsimiinnerni sammineqarpoq, maannakkullu nunat inoqqaavisa pisinnaatitaaffiinik aalajangiusimanninneq pingaaruteqarpoq, ICC-mit oqaatigineqarpoq.
ICC naapertorlugu naalagaaffippassuit Naalagaaffiit Peqatigiinnik inuillu pisinnaatitaaffiinik tapersersuinertik annikillisarsimavaat:
- Piffissaq nalorninartulik ornipparput – aamma Naalagaaffiit Peqatigiinni nunarsuullu sinnerani. Massakkut piffissaq tassaavoq pisinnaatitaaffitsinnik Nunap Inoqqaavisullu inissisimanitsinnik aalajangiusimanniffissarput.
Sara Olsvig tusagassiuutinut nalunaarummi oqarpoq: „Pinertusaarluta pisinnaatitaaffivut suusupaginaveersaartariaqarpavut, aamma naalagaaffiit akisussaaffeqarnerulernissaat piumasarisariaqarparput.
Aamma oqarpoq inuit „politikkikkut pissaaneqarniunnermi inissisimaffitsik“ akuerisinnaanngikkaat.
- Pinertussuserput aalajangiusimasariaqarparput, pisinnaatitaaffigut nalikinnerulersissanatigit, uteriissutigisariaqarparpullu Naalagaaffiit akisussaassuseqarnerminnik annerusumik takutitsinissaat, Sara Olsvig tusagassiutitigut nalunaarummi oqarpoq.
Taassumattaaq Inuit "pissaaneqarniuuttunit immeraassutigineqartutut" atorneqarnissaat naaggaarrluinnarlugu nangilluni oqarpoq.
- Akerlianilli uteriissutigissavarput ataqqinnittumik diplomatiilu aqqutigalugu oqaloqatigiinnikkut ingerlatsisoqarnissaa, uteriissutigivarpullu naleqartitatta – taakku ilagalugit inuit pisinnaatitaaffii – qitiutinneqarnissaat, Sara Olsvig oqarpoq.
New Yorkimi ataatsimiinnerit maajip aappaata tungaanut ingerlassapput, tassanilu ilaatigut nunap inoqqaavisa arnat pisinnaatitaaffii pillugit ukiumoortumik oqaloqatigiinneq pissaaq:
- Nunat Inoqqaavisa arnartaasa niviarsiarartaasalu suleriaatsitigut immikkoortinneqarnerat nunasiaateqarnerup kingunerivaa, inuit pisinnaatitaaffiisa innarlerneqarnerannik arnat niviarsiaqqallu eqqugaanissaat ilimanaateqarnerusarluni.
- ICC-p sulinini nangittumik suliarissavaa, eqqunngitsumillu pineqarnermut illuatungiliunnermi Nunat Inoqqaavisa allat peqatiginissaat suliniutigivarput, Sara Olsvig oqarpoq.
