Ikiaroornartumik Royal Greenlandip kilisaataatigut eqqusseriarneq unitsinneqartoq
Hashi 100 grammi Akamalimmi nassaarineqarpoq. Ingerlateqatigiiffiup nammineerluni akitsuuserisut suleqatigalugit misissuisitsineratigut eqqusseriaraluarneq naammattoorpaat. Nassaarneq kilisaatinik nunatta avataaniittunik nammineq
nakkutilliinerup annertusineranit oqartussanillu suleqateqarnerminik toqqaannartumik inerneruvoq.
Leiff Josefsen
Royal Greenlandip kilisaataataa Akamalik Danmarkimiinnerani kilisaammi hashi 100 grammi nassaarineqarpoq:
- Kilisaataatigut atorlugit eqqussineq, eqqunniakkat qanorluunniit annertutigigaluarpata, akuerineqarsinnaanngilluinnarpoq. Kilisaataatigut tamarmik ingammik nunatta avataaniikkaangata nammineq nakkutilliinerput ukiuni kingullerni annertusinikuullugulu kilisaataatitsinnik aanngajaarniutinik inerteqqutaasunik eqqussineq pinaveersaartinniarlugu oqartussat qanimut suleqatigaagut, Royal Greenlandimi tunisassiornermut pisortaq Lars Nielsen oqarpoq.
Akitsuusersuisut suleqatigilluarneri
Taanna aamma paasissutissiivoq akitsuuserisut Royal Greenlandip inassutaa naapertorlugu Akamalimmi hashimik annikitsumik toqqortarineqarsimasumik nassaarmata annertusisamik suliniuteqarneq sapaatip-akunnerani matumani iluaqutaasoq.
Hashi 100 gram kilisaammi toqqorneqarsimasoq nassaarineqarsimavoq. Nassaarineqartoq annertunngikkaluartoq aanngajaarniutinik inerteqqutaasunik nunatsinnut eqqusseriaraluarnerup pinngitsoortinneqarnera Royal Greenlandip akitsuuserinermullu oqartussat suleqatigiilluarnerinut uppernarsaataasoq ilanngullugu oqaatigaa:
- Royal Greenlandimi sapinngisarput tamaat pisut tamakku, ilaatigut namminerisatsinnik misissuinitta annertusineratigut oqartussanillu suleqateqarnikkut, pinaveersaartinniartarigut erseqqissassallugu pingaaruteqarpoq.
- Aanngajaarniutinik anngiortumik nunatsinnut eqqussinerup aningaasatigut pissarsiaqaataanissaa eqqarsaatigalugu qanoq ilinikkulluunniit eqqusseriartoqarsinnaasartoq ilisimavarput – aamma kilisaataatitsinniit. Taamaammat eqqussinissaraluaq pinngitsoortinniarlugu annertuumik suliaqartarpugut, Lars Nielsen naqissusiivoq.
Kilisaatit aanngajaarniutinik inerteqqutaasunik peqannginnissaat qulakkeerniarlugu Royal Greenlandimit oqartussat qanimut suleqatigineqartuassanerarpai.
- Isumannaallisaanerup qaffasissuunissaanut taamatuttaarlu sulisutsinnik, niuerutitsinnik inuiaqatigiinnillu illersuinissamut tunniusimalluta suliniuteqarnissamut pisussaaffipput suliami matumani naqissuserneqarpoq.
