Ikiaroornartut pillugit pineqaatissiissutit sakkortunerusut politikkikkut isumaqatigiissutigineqarput
Nuummi Ilulissanilu mittarfiit nutaat ammarneqarnerat aamma angalasut amerligaluttuinnarnissaat pissutigalugit Inatsisartut inatsiseqarnermut ataatsimiititaliaata ernummatigaa ikiaroornartunik eqqussuinerup annertusinissaa. Tamanna pissutigalugu politikkikkut ikiaroornartunik eqqussuisunut tuniniaasunullu aamma taakkuninnga tunuliaqutaasunut iliuuseqarnerunissaq isumaqatigiissutigineqarpoq.
En narkohund ses her på arbejde.
Leiff Josefsen
Ukiup ataatsip missaa
utaqqisitsereerluni Inatsisinut Ataatsimiititaliaq kiisami
isumaliutissiissummik, Aqqalu C. Jerimiassenip siunnersuutaanik,
Naalakkersuisut ikiaroornartunik sakkortuunik anngiortumik
eqqussuinermut tuniniaanermullu iliuusissanik sukaterisoqarnissaanik
naalagaaffimmut saaffiginninnissamik siunnersuutaanik
tapersersuisumik saqqummiussivoq.
- Inuiaqatigiinni hashimik
atornerluineq inuppassuarnut inooqataanikkullu alianartorpassuarnik
kinguneqartumik qangaaniilli erloqissutaammat ataatsimiititaliamit
oqaatigineqassaaq. Tamatuma saniatigut hashi
arsaarinnissutigineqartartoq annertusiartuaarpoq, tamannalu atuinerup
suli annertusiartorneranut takussutissaasinnaavoq. Kalaallit
Nunaannili manna tikillugu ikiaroornartut sakkortuut annertuumik suli
atugaalersimanngillat, isumaliutissiissummi taama allassimasoqarpoq.
Piffissaagallartillugu
iliuuseqarneq
”Pineqaatissiisarnerit
sakkortunerulersinnissaat siunnersuummi matumani anguniarneqarmat
tamanna piffissaagallartillugu iliuuseqarnerussasoq”
ataatsimiititaliaq isumaqarpoq.
- Aammattaaq taamaattoqassappat
pineqaatissiinerit sakkortunerulernissaat matumani pineqartoq
Kalaallit Nunaanni pinerluttulerinermik inatsiseqartitsinermi
aalajangiisuusumik tunngaviit, tamatumunngalu ilanngullugit
pinerluuteqarsimasut innuttaasunut ilaalersinneqarnissaannik
kiissaateqarneq ataqqillugit pissasoq ataatsimiititaliamit
erseqqissumik oqaatigissallugu pingaartinneqarpoq, tamanna
allassimavoq.
Naalakkersuisut isumaliutissiissummut
akissummi ima allapput:
Akuersaanngilluinnarneq
- Inatsisartut inatsisaat nutaajummat,
uagut nunatsinni ikiaroornartunut akuersaanngilluinnarnerput, aamma
taakku pillugit suliani sakkortuumik qisuariartoqartariaqarneranik
kissaatiginninnerput pillugu naalagaaffimmi oqartussanut
saaffiginninnissamut siunnersuutip Naalakkersuisut iluatinnartumik
periarfissippai.
Atassummi siulittaasup siunnersuutaa
16. maj 2023 siullermeerneqarpoq, aalajangiiffissatullu siunnersuutip
maanna 13. maj ukioq manna aappassaaneerneqarnissaa pilersaarutaavoq.
