Ikiorsiissutissat itigartinneqarnerat pillugu isumaqatigiinnginneq
Ikiorsiissutit pillugit oqallisissiaq paatsiveqanngitsutut allaffissornermillu pisariaqanngitsumik pilersitsisussatut Naleqqami siulittaasup aammalu Aningaasaqarnermut Akileraartarnermullu Ataatsimiititaliami siulittaasup tulliata Pele Brobergip oqaatigaa. Borgmesteri naapertorlugu ikiorsiissutit itigartinneqarpata Kujataani takornariaqarnerup ineriartortinneqarnissaanut kingunerlutsitsingaatsiassaaq.
Assiliisoq: Leiff Josefsen
Sapaatip-akunnerata siuliani naalakkersuisup Naaja H. Nathanielsenip (IA) Inatsisartut Aningaasaqarnermut Akileraartarnermullu Ataatsimiititaliaat isornartorsiorpaa, Kujataani aasaanerani sikorsuaqarnerata kingunerisaanik inuussutissarsiortunut immikkut tapiissuteqarnissamik oqallisissiaq ataatsimiititaliap itigartimmagu.
IA ataatsimiititaliami itigartinneqarsimasoq ataatsimiititaliami siulittaasup, IA-meersup Peter Olsenip ilisimatitsissutigaa, ataatsimiititalialli sinnerata ikiorsiissutit sooq itigartitsissutiginerai oqaatigisinnaanngilaa.
Aningaasaqarnermut Akileraartarnermullu Ataatsimiititaliami siulittaasup tullia Pele Broberg (N) Sermitsiamut allakkatigut akissuteqarnermini ilisimatitsivoq ataatsimiititaliap suliamik suliarinninneranit oqaaseqarsinnaanani, partiilli siulittaasuatut ilaatigut ima oqarpoq:
- Amerlanerussuteqartut naliliineri Naleqqamit isumaqatigivavut, tassalu aningaasat taakku aalisartunut piniartunullu ajunaarnersuaqarnerani ikiorsiissutinut attuumassuteqanngitsuusut, ilisimagatsigu ikiorserneqartussatut naatsorsuutigineqarsimasut ikiorserneqarneq ajortut, Pele Broberg oqarpoq.
Broberg: Oqallisissiaq paatsiveqanngitsoq
Aammattaaq ikiorsiissutinik aaqqissuussineq paatsiveqanngitsutut isornartorsiorpaa:
- Oqallisissiaq paatsiveqanngitsorujussuusoq Naleqqamit maluginiarparput, pisariaqartitsisunullu ikiorsiinissamik qulakkeerinninngivippoq, allaffissornikkulli pisariaqanngitsumik suliaqarnerunermik kinguneqartussaq, Pele Broberg allappoq.
Sapaatip-akunnerata siuliani Naaja H. Nathanielsenip ataatsimiititaliap aalajangiinera pakatsissutigingaarlugulu paasiuminaatsippaa:
- Piffissami inuussutissarsiutit ineriartortinneqarnissaannut pisariaqartumi siumut ilimagineqarsinnaanngitsup ajornakusoortullu iliuuseqarfigineqarnissaannut Kujataani inuussutissarsiutillit ikiorusunneqannginnerat annertuumik eqqarsarnartoqartippara, Naaja H. Nathanielsen oqarpoq.
Pele Brobergip isornartorsiuineq akissuteqarfigaa, oqarluni Naalakkersuisut ataatsimiititaliamik isornartorsiuineq ileqqorinngikkaat, Naaja H. Nathanielsenillu neriorsuuteqarpallaarnera pineqarnerarpaa:
- Paasisinnaavara naalakkersuisup siusinnerusukkut tusagassiuutinut oqarsimanera, Inatsisartuni partiinit tapersersorneqarnini qularinagu. Tapersersorneqannginnera maanna paasinarsivoq, Pele Broberg oqarpoq.
Borgmesteri: Umiarsuit takornariartaatit 30-t tikinngitsoorput
Ataatsimiititaliap ikiorsiissutinik itigartitsinerata kingorna Kommune Kujallermi borgmesteri Stine Egede (IA) tusagassiuutinut nalunaaruteqarpoq, kingunerluutissaanillu ernumassuteqarnerminik ersersitsivoq.
Borgmesteri naapertorlugu ukioq manna Kujallermi umiarsuit takornariartaatit aatsaat taama amerlatiginissaat naatsorsuutigineqarsimavoq, takornarialerisullu amerlasuut umiatsianik, umiarsuarnik bussinillu nutaanik pisiortorsimapput, amerlanerusunik atorfinititsisimallutik kiisalu suliffeqarfimminnik annertusaasimallutik, takornariat amerlassangatinneqartut sullissinnajumallugit. Ajoraluartumik sikorsuaqarnerata malitsigisaanik umiarsuit takornariartaatit 30-t tikinngitsoorput, tamannalu takornarialerisunut annertuumik aningaasanik annaasaqartitsivoq, borgmesteri oqarpoq:
- Ajornerpaamik pisoqassappat takornarialerisut nutaat amerlasuut suliffeqarfiutiminnik matusissapput. Massakkut mittarfitaassatsinnut piareersarnitsinni takornariaqarnitta ineriartortinneqarneranut annertuumik kinguarsaataassaaq, borgmesteri Stine Egede oqarpoq.
