Nutartigaq: Ataatsimiititaliami IA itigartinneqarpoq

Kujataani inuussutissarsiortunut ikiorsiissutissat pillugit Naalakkersuisut aamma Inatsisartut Aningaasaqarnermut Akileraartarnermullu Ataatsimiititaliaat isumaqatigiinngissuteqarput.

Ataatsimiititaliaq ikiorsiissutinik itigartitsisimasoq, Naalakkersuisoq Naaja H. Nathanielsen (IA) tusagassiuutinut nalunaarummi ilisimatitsivoq.

Kujataani sikorsuit pissutigalugit pilersaarutigineqartunik suliaqartoqarsinnaajunnaarnerata kingunerisaanik kaaviiaartitaqarnerup appariarnerinut taarsiissutissatut ikiorsiissutissaagaluarput.

Naaja H. Nathanielsenip tamanna pakatsissutigaa:

- Aningaasaqarnermut ataatsimiititaliap itigartitsinera pakatsiffigalugulu paasisinnaanngilara. Piffissami inuussutissarsiutit ineriartortinneqarnissaannut pisariaqartumi siumut ilimagineqarsinnaanngitsup ajornakusoortullu iliuuseqarfigineqarnissaannut Kujataani inuussutissarsiutillit ikiorusunneqannginnerat annertuumik eqqarsarnartoqartippara. 

- Inuussutissarsiutit eqqorneqartut ikiorneqarnissaannut periarfissat Naalakkersuisut aasarli pimoorussillutik misissugarilerpaat, siornatigullu pisuni ajornakusoortuni politikkerit tungaannit ikiuisimanitsitut ikiuinissatsinnik inuussutissarsiutillit qularnanngitsumik naatsorsuutiginnissimassasut isumaqarpunga. Aningaasaqarnermut ataatsimiititaliap itigartitsinini tunngavilersunngilaa. Ikiorsiissutissanut tunngavilersuutit piareersaanerillu peqqissaartumik tunngavilersorluakkamillu suliaasut isumaqarpunga.

Sikorsuit pissutigalugit umiarsuarpassuit takornariartaatit Kujataa avaqquttariaqarsimavaat, tamannalu najukkami ingerlatsisunik eqquivoq.

Ingerlatsisunit eqqugaasunit saaffiginnissutit siulliit Naalakkersuisut juulip aallartinnerani tiguaat Naaja H. Nathanielsen ilisimatitsivoq. Naalakkersuisut ikiuiniarlutik aggustimi aalajangerput, ikiorsiissutilli akuersitinnissaanut ataatsimiititaliaq suli qularunnaarsissinnaanngilaat.

Ataatsimiititaliami siulittaasoq ugguarpoq

Naaja H. Nathanielsenip parteeqataa Peter Olsen, Aningaasaqarnermut Akileraartarnermullu Ataatsimiititaliami siulittaasoq, oqaluttuarpoq ataatsimiititaliap ikiorsiissutit pillugit suliaqarnerani IA itigartinneqarsimasoq.

- IA-mit kissaatigaarput ikiorsiissutinut qinnuteqaat akuerineqassasoq, itigartitsissutaammallu ajuusaarutigaarput, Peter Olsen Sermitsiamut oqarpoq.

Ataatsimiititaliami amerlanerussuteqartut ikiorsiissutit itigartitsinerannut atatillugu Inuit Ataqatigiit ikinnerussuteqarlutik oqaaseqaateqarput.

Kujataani takornarialerisunut kiisalu aalisartunut piniartunullu ikiorsiissutit taamaatiinnarneqarnerat kingunerlutsitsisinnaanera Peter Olsenip ernumassutigaa.

Ataatsimiititaliami ilaasortat allat itigartitsinerminnut sunik tunngavilersuinersut Peter Olsenip oqaatigisinnaanngilaa.