– Ilagiit oqartussanit tapersorneqartunut taarsiullugit ilagiit palasinit aqunneqalersinnaapput

Qinersivinnit 66-iusunit 27-ni ilagiit sinniisaannut ataatsimilluunniit qinigassanngortittoqanngilaq, apriilip aallaqqaataanni qinersisoqartussaavoq.

Sumiiffinni taakkunani susoqassava?

– Ilagiit sinniisaannut qineqqusaartoqanngippat, sumiiffinni taakkunani ilagiit sinniisaat atorunnaarsinneqassapput, ukiunilu tulliuttuni sisamani suliaq palasimit oqaluffimmi atuagarsuarnik nakkutilliisuusumit isumagineqassalluni. Ilagiit sinniisoqanngippata sulineq qulaanit aqunneqassaaq taamalu ilagiit palasinit aqunneqalernissaat aarlerinarsinnaalluni, biskop Paneeraq Siegstad Munk Sermitsiamut oqarpoq. 

Sooruna qineqqusaartartut ikiliartuinnartut?

– Ilagiit sinniissaanni akeqanngitsumik sulineq soqutigineqarunnaarami, biskoppi oqarpoq.

Ilagiit sinniisaannut ataatsimiinnerit Ilagiit sinniisaannut qinersisarnerit qinikkatut sulinerunnginnamik, ilaasortallu akissarsiaqaratik, taamaallaat ataatsimiinnermusiaqaramik. Ataatsimiinnerit nalunaaquttap akunneri sisamat sinnerlugit sivisussuseqaraangata, 413,17 koruuninik ataatsimiinnermusisarput; nalunaaquttap akunneri sisamat ataallugit sivisutigisumik ataatsimiikkaangamik affaannaannik ataatsimiinnermusiaqartarput. Taamaalillutik ukiup ilivitsup ingerlanerani ataatsimiinnernut sivisunerusunut amerlanerpaamik marlunnut ataatsimiinnermusiaqarsinnaapput imaluunniit ataatsimiinnernut sivikinnerusunut sisamanut ataatsimiinnermusiaqarsinnaallutik. Nuummi ilagiit sinniisaat qaammatit tamaasa marlunngornermi kingullermi ataatsimiittarput, ilaasortalli ukiumut ataatsiminnermusiaat, qanorluunniit ataatsimeeqattaartigisimagaluarunik, annerpaamik 826,34 koruuniussaaq.

- Ilagiit sinniisaannut ilaasortaaneq qinikkatut sulinertut isigineqaleraluarpat, soqutiginninneq qularnanngitsumik annerulissagaluarpoq, Paneeraq Siegstad Munk oqarpoq. 

Ilagiit ikippallaanik aningaasaliiffigineqartartut 

Ukiut sisamat matuma siornagut biskopi Sermitsiamut oqarpoq, ilagiit sinniisaasa sulinerat nutarterneqartariaqartoq. Biskopip assersuutitut taamani taavaa, najukkani ilagiinnut katersuutsitsilluni aaqqissuussinernut ilagiit sinniisaat akissaqartinneqarnerusariaqartut.

Taama pisoqarpa? 

– Suliassamut atatillugu iliuusissanik pilersaarusiorpunga, Paneeraq Siegstad Munk oqarpoq. 

1) Ilagiit sinniisaannut qinigaasunut isumasioqatigiissitsineq. 2) Isumasioqatigiinnermit nalunaarusiortoqassasoq, ilagiit sinniisaat pillugit inatsisissamut tunngavigineqartussamik. 3) Ilagiit sinniisaat qinigaaffimminni akissarsiaqassasut. 4) Ilagiit sinniisaasa agguaassassaannik 2 millionit koruuninik aningaasaliisoqassasoq, taamaalillutik najukkaminni inuiaqatigiinnilu suliniuteqarlutik aallartitsisinnaaniassammata.

- Ilagiilli ikippallaanik aningaasaliiffigineqartartillugit, nammineerlunga nutarterinermik aallartitsisinnaanngilanga. Isumasioqatigiissitsinissamut aningaasartuutissatut missingersuutit Naalakkersuisunut saqqummiunneqarput, pisariaqartitatsinnilli aningaasaliiffigineqarata, Paneeraq Siegstad Munk oqarpoq. 

Aningaasat naammanngitsut

Biskopip sunniiniarluni sulinini Inatsisartunut Naalakkersuisunullu ilaasortanngortunut qinersinerup kingorna nanginniarpaa. 

Inatsisartunut Naalakkersuisunullu nutaanut ilagiinnut aamma ilagiinni sulinermut atatillugu sunik neriuuteqarpit? 

– Kaffisoriartoqqusaajumaartunga ilagiinnilu suliatta saqqummiunnissaannut periarfissaqartitaassasunga neriuutigaara. Nunatsinni ilagiit ingerlannissaannut qanoq aningaasartuuteqartigisarnersugut naatsorsoqqissaaratsigu. Ukioq manna 52 millionit koruunit immikkoortinneqarput, biskopinngornermali kingorna "palasit amerlavallaartut" atorfinitsippakka. Palasit amerlanerat nuannerpoq, ilagiimmi sulisunit ilinniarsimasunit sullinneqarmata, akissarsiaalli aningaasartuutissatut missingersuutitta ilarparujussuinik atuiffiusarlutik.

– Kisitsisit kingulliit 2025-mi januaarimeersut takutippaat, aningaasanut inatsimmi aningaasaliissutit 59 millionit koruuninit ikinnerusariaqanngitsut, tassa ilagiit inuiaqatigiinnut inatsisitigut pisussaaffilerneqarsimanerat naammassineqarsinnaassappat. Taakkununnga atatillugu ilagiit sinniisaasa suliniuteqarnissaannut kissaatigineqartut ilanngunneqanngillat, piffissanngorporli ilagiit sinniisaasa sulinerminni takussutissalimmik akissarsitinneqartalernissaannut, piffissanngorlunilu taakkua suliniuteqarnissaannut aningaasanik pisariaqartunik immikkoortitsisoqartarnissaa, Paneeraq Siegstad Munk oqarpoq.

Biskopip aningaasaliissutit ikippallaartarnerannut assersuutitut eqqaavai ilagiinni sinniisunngorlaanut ataatsimiititsisarnerit, provstit qinersinerup kingorna ilagiit sinniisaannut ilaasortanut nutaanut ataatsimiititsisarneri. 

– Naalakkersuisut ataatsimiititsinissanut taakkununnga aningaasanik immikkoortitsisimannginnamik, naak tamanna 2010-mi ilagiinnut inatsimmi allassimagaluartoq. Provstit qinigaarlaanut ataatsimiititsinerit aallarniutaasussat ingerlateqqullugit qinnuigivakka, taamaalillungalu akisussaatinneqarumaarlunga aningaasassaqanngikkaluartunik suliniuteqarsimanera pillugu. Assersuutilli takutippaa aaqqissuussisoqartariaqartoq ukiut sisamat qaangiunneri tamaasa ilagiinnut qanimut oqartussaaqataanermik ineriartortitsinissamut immikkut aningaasaliissuteqartoqartalerluni, Paneeraq Siegstad Munk oqarpoq.