Ilaqutariit pissarissaartut Ilulissani allamik akunnittarfiliorniartut

Ilaqutariit pissarissaartut Sandgreenikkut, Isortaq Trawlimik piginnittut, takornariartitsinermut aningaasarpassuarnik ukiuni kingullerni aningaasaliisimapput.

Ingerlatseqatigiiffik aamma aalisarnermik ingerlataqartoq, suliaminik annerulersitsinissaminik nutaamillu suliniuteqarnissaminik pilersaaruteqarpoq.

Taamaalillutik ukiut arlaqanngitsut ingerlaneranni illoqarfiup qeqqani nutaamik akunnittarfiliorsinnaallutillu aamma akunnittarfinnik inissialiorsinnaassapput.

Tamanna Isortaq Trawlip siulersuisuini siulittaasup Hans Sandgreenip Sermitsiamut uppernarsarpaa.

- Ukiut sisamat tallimalluunniit qaangiuppata immaqa akunnittarfimmik nutaamik ammaassaagut. Kisianni pingaarnersiuisariaqaratta suna aningaasaliiffigineqaqqaassanersoq aalajangertariaqarparput, akunnittarfik nutaaq imaluunniit aalisarneq. Ilulissani sanaartornermut akigititat maannakkorpiaq qaffasittorujussuugamik, Alaskami illoqarfimmi Juneau-mi akunnittarfimmit oqarasuaatikkut taama oqarpoq.

Taanna nulianilu Laila Sandgreen ilaquttanilu allat Alaska Travel Industry Associationip ukiumoortumik takornarialerinermik saqqummersitsineranut najuupput.

Isortaq Trawlip akunnittarfiliornissaminik pilersaarutai pillugit paasissutissat saqqummiunneqarput aningaasaliisartut marluk, Topas Explorer Group aamma nukariit Frank aamma Tommy Bagger, sapaatip akunnerani kingullermi nalunaarmata Ilulissani akunnittarfiliornissaminnik pilersaarutinik nutaanik saqqummiussillutik, ukiut arlaqanngitsut ingerlaneranni piviusunngortinneqarsinnaasunik eqqarsaatiginnillutik.

Akunnittarfik quleriinnik tallimanik initalik

Isortaq Trawlip siorna ilaatigut Ice Cap Tours, Cafe Iluliaq aamma Ilulissat qeqqaniittoq Ice Cap Brasserie Arne Niemann Jensenimit pisiarai.

Arne Niemann Jensenip quleriinnik tallimanik initalimmik, 80-inik initalimmik akunnittarfiliornissani sivisuumik pilersaarutigisimavaa, maannalu sanaartornissaanut kommunimit akuerineqarluni. Pilersaarutip tamatuma ineriartorteqqinnissaa ilaqutariit Sandgreenikkut soqutigaat.

Isortaq Trawl Ilulissani Hotel Nukamik 32-nik initalimmik, akunnittarfimmik inissiartalimmik aamma cafénik arlalinnik, ilaatigut Cafe Nukamik, piginnittuuvoq. Taakku saniatigut raajarniutinik pingasunik kilisaataateqarput.

- Ilaqutariit Sandgreenikkut Ilulissani inunngorlutillu peroriartorput. Isumaqarpugut nunaqavissut, avataanit aningaasaliisartut pinnatik, illoqarfimmi takornariaqarneq aqussagaat. Taamaattumik takornariaqarnerup ineriartortinnissaanut aningaasarpassuarnik aningaasaliisarpugut, Hans aamma Laila Sandgreen oqarput.

Hotel Nuka, akunnittarfik nutaaliaasoq akisunerulaartunik initalik, Isortaq Trawlimit 2017-imi sanaartorneqarpoq. Siorna suliffeqarfiup ilaqutariinnit pigineqartup Arne Niemann Jensenip IceCap Toursimik ingerlatsiviutaanik allanillu millioninik marlunnik kisitsisitalinnik pisinermigut Ilulissat qeqqani Kussangajaannguami nunaminertami pilerinartumi sanaartornissaq qulakkeerpaa.

Tamaani Niemannip akunnittarfimmik tallimanik quleriinnik initalimmik sanaartornissamut akuersissut siusinnerusukkut pissarsiaraa. Taassumali pilersaarutini piviusunngortinngitsoorlugu, akunnittarfiliornissaminut aningaasalersuinissaq iluatsinngitsooramiuk. Pilersaarut tamanna ilaqutariit Sandgreenikkut maanna ineriartortikkusuppaat, aningaasaliisussarsiorlutillu.

- Sanaartorfissaq pisiarivarput pilersaarut piviusunngortinniarlugu nutaamillu akunnittarfiliornissamut periarfissaqarniassagatta. Qanoq angitigissanersoq suli misissussavarput. Taannali Hotel Nukamit annerussaaq amerlanerusunillu initaqassalluni, Hans aamma Laila Sandgreen oqarput.

Isortamik pingaarnertut piginnittoq tassaavoq ilaqutariit angajullersaat, Karen Sofie Sandgreen, 75-inik ukioqaleqqammersoq. Piginnittut allat tassaallutik meerai Hans, Jens-Peter aamma Sofie Sandgreen. Sofie Sandgreen pisortaavoq.

Angallatit Targat takornarianik angallassissutissat

- Ukiuni kingullerni illuliornernut angallatinullu aningaasarpassuarnik aningaasaliisarpugut. Ilulissani mittarfissuaq nutaaq ukiut marluk qaangiuppata ammarneqarpat takornariarpassuaqalernissaa naatsorsuutigaarput. Siorna ilaatigut takornarianut angallassissutissat Targat marluk katillugit 11 millionit koruunit sinnerlugit akeqartut inniminnerpavut. Januaarimi angallatit Kalaallit Nunaannut tikissapput, Hans Sandgreen oqaluttuarpoq.

Laila aamma Hans Sandgreen ilaqutariit takornariartitsinermik ingerlatsineranni annerusumik ingerlatsisuupput. Tamannalu pisarluni ingerlatseqatigiiffik Explore Ilulissat aqqutigalugu, takornarianik arfernik takuniaasitsisarput, Ilulissaniillu Ilulissat eqqaani Kangianut qamuteralannik qimussinillu angalaartitsisarlutik. Angalaartitsinerit 8 kilometerit angullugit isorartutigisinnaasarput.

Laila Sandgreen Explore Ilulissanik tamakkiisumik piginnittuuvoq. Taanna ilinniartitsisutut ilinniagaqarsimavoq, Hansili aalisartuulluni takornarianillu angallassisarluni arfernik takuniaasitsilluni, Kangiani sikumi qimussimik aamma qamuteralannik aalisariartitsisarluni.