Ilimmarfimmut neriartorneq

Ilimmarfimmi kantiina inussiassaaleqinanngilaq. Nalunaaqutaq ulloqeqqangajalerpoq. Lena Bidstrupip ulloqeqqasiutissani unikkallartarfimmi tuaviinnaq nerivaa. Sandwichinik Ilimmarfimmi ilinniartut 200-t missaanniittut ulloqeqqanut pisiarisinnaasaannik taneeqqammerpoq.

Ilisimatusarfiup sapaatip akunneri marluk matuma siornagut ilinniarneq aallarteqqimmat kantiinamik ingerlatsineq nammineq ingerlatilerpaa, Lenalu kantiinaqarfimmi pisortanngoqqammerluni. Taanna ukiunik arlalinnik misilittagaqarpoq taamaattumillu Ilimmarfiup pingaartitaannik pisariaqartitaannillu paasinnilluarsimalluni.

- Suli aallarnisarfimmiippugut, nerisassalli pillugit politikitsinnut tunngatillugu takorluugaqarlutalu anguniagaqarpugut, tamatumanilu ilaatigut ilaallutik nerisassat Nunatsinneersut. Tamanna qilanaareqaarput, Lena Bidstrup ulloqeqqasiutissaminik salaatinik angerlarsimaffimminit nassataminik neriitigaluni oqarpoq.

Kantiinami qaqqamut Sermitsiamut isikkivilimmi nikorfavunga. Ilinniartut ullormut suliassarpassuatik unitsilaarlugit ilinniarfimmilu atuarnerminnit qasuersaarlutik neriartorput. Kantiina tassaaneruvoq anersaartorfissaq aqajaqqumullu nerisassanik immiiffiusartoq. Ilinniartut ullormut suliassarpassuaminnut ilinniarnissaminnullu nukissaqarumallutik neripput. Ini qernertunik nerrivinnik issiavinnillu ammalortunik ulikkaarpoq, silaannarlu oqillunilu inituvoq.

Ilisimatusarfiup pequsersorneqarnera New Yorkimiunut eqqaanarsinnaavoq, init silaannaqarluartut attorneqanngitsutut isikkullit. Taamaalillunga ukiorpassuit matuma siornagut Ilimmarfimmut iseqqaarama misigisara eqqaaqqippara. Ernumaammerneq nuannaarnerlu.

Aanaatut misigisimaneq

Kalaallit assilialiaat iikkamiittut inimut kissalaarnermik kinaassutsimillu tunisipput. „Eqqaamasannit“ anillappunga kantiinamullu inip isuaniittumut ingerlalerlunga. Ilinniartut nerisassanut ilitsivinnik qaqortunik tigumiarlutik tulleriiaarlutik pisiniartitsisup pisinianik kaattunik kiffartuussinissaa utaqqivaat.

- Ilimmarfimmi kantiinap piffissaq nutaaq pissanganartoq aallartiffigaa, maannami kantiinap ingerlanneqarnera nammineq isumagileratsigu, nerisassat najoqqagassallu pitsaassusaat assigiinngissusaallu pitsaanerusumik aqussinnaalerlugit, Ilisimatusarfimmit nalunaarumminni taama allapput.

Sandwichit kantiinami nammineq tanitat aamma nerisassat kissalaartut illup avataanit inniminnikkat sassaalliutigineqarput.

– Iggavimmi atortussat assigiinngitsut, soorlu igat assigisaallu inniminnernikuuavut, taamaattumik nerisassat kissartut suli suliarisanngilavut. Kisianni nerisassanik tamanik nerisassiortarnissarput takorloorparput. Suut tamarmik inissippata puisip neqaanik, tuttup neqaanik savaaqqallu neqaanik qularnanngitsumik nerisassiortassaagut, Lena Bidstrup oqarpoq.

Iggavimmi sulisut allat pingasut peqatigalugit ullormut pingasoriarlutik, ullaakkut, ulloqeqqanut ualikkullu, kantiinap ulikkaartarnissaa isumagisassaraat.

Inoqatiminut sunniisinnaanera inuttullu pissusia kissalaartuuvoq inussiarnersuullunilu. Taamalu Inuunermut tamarmut tikilluaqqusaasutut misigititsisarpoq. Aanaamut eqqaanartoq, kikkunnik tamanik nerisassanik pitsaanerpaanik ingerlaannartumik nerisitsisinnaasoq. Saneqquttunik tamanik oqaloqateqartarpoq. Nipaa illalaarneralu inimik nuannersunngortitsisartoq.

Miseraannaq

Patitat nammineq sanaavi usserniarlugit tulleriaattuniippunga. Assigiinngitsunik toqqagassaqarpoq. Ataaseq kukkukuuaqqamik karrylimmik akulik allalu manninnik raajanillu akulik. Isigiinnarlugit naakka quluarput.

Issiavissat inunnik ulikkaarput. Aviisimi assiliisorlu marluulluta inuit akornanni issiavinnik inoqanngitsunik marlunnik nassaaratta iluatsitsisutut misigaanga.

Ingiitigalunga puugutara iligakku eqqara qimerluulerpara. Inuit nerrillutillu, ilorrisimaarlutillu, illarlutillu oqalupput. Maani nuanneqaaq.

Patitaq kukkukuuaralik nerisassara qiviarakku assannik illuttut tiguara. Aatsaarnissara tamaat aatsarlunga kiisiniarsarivunga. Kim Larsenitut aatsarnera amippallaarpoq patitarlu ileqqippara. Ajunngilaq, imminut oqarfigeriarlunga savimmik ajassaammillu aallerpunga. Misileqqeriartigu. Avisseriarlunga oqummiuppara. Mamaq. Igasup miseraq sipaarsimanngilaa, taamaalillunilu akoqarnerullunilu mamarnerulerpoq. Naammaqqissaartumik akusaq, miseqqilaaginnagaanngitsoq, nuannaarnerulli pianeik qungujunnartumik miseqqerluagaq. PIlluaammernera pillugu utoqqatsisunnguamik eqqara marserpara qungujullungalu.

Sermitsiaq isikkivigalugu nerisarfimmi ullup-qeqqasiutigut mamarsaatigaagut. Wow, ilisimatusarfinni isikkiviginnerpaasimassaaq!

Patitaq imaaliallakkakku nunguppara Faxe Kondimilli najorsillunga. Qaaliataajutaa issiviannut ingilluartitaarpunga eqqaralu marsilerlugu. Inuit nerripput, ilai eqimattakkaarlutik, ilai qarasaasialeriutaa kisimiillutik.

Lenap nerisani nunguppai, nerinermullu atortussat erroriikkat ilinniartunit atorneqartussanngorlugit iliorarlugit aallartippai. Ilisimatusarfimmi sulisoq qungujulluni tungaanukarpoq.

- Sandwich mamaq!, sulisup Lena nersualaarpaa.

Nuannaarluni qungujuppoq. Isumaqataallunga sulisoq isigaara, sumininnguullu sunniuteqangaatsiarsinnaanera eqqarsaatigaara.

Inuit Lena ilassisarpaat, taassumalu inuit ikasarfigalugillu illaqatigisarpai.

- Lenap pitsaasumik allannguinissaa aamma kantiinami misigisat pitsaassusaasa kivissagai qularinngilluinnarparput.

- Lenap ulluinnarni aqutsineq akisussaaffigissavaa, igaffimmi sulisortaavut tunniusimalluartut peqatigalugit pulaartutsinnut tamanut nuannersumik mamartunillu taakkua misigisaqartitsisassapput, Ilimmarfik tusagassiutitigut nalunaarummi allappoq.

Suaasat

- Ulloq ataaseq kalaaliminertorfiusassasoq anguniarparput. Sapaatip-akunneranilu ulloq aalajangersimasoq sassaalliutigisassallugit eqqarsarpugut. Assersuutigalugu pingasunngornerit tamaasa, taava inuit assersuutigalugu ulloq taanna puisimik suaasartussallutik nalussanngilaat, Lena Bidstrup oqarpoq.

Pingasunngornikkut nerisarfik inunnik ulikkaartassasoq inuillu puisimik tuttumilluunniit suaasalianik qaaliivittassasut takorloorpara. Kalaaliminertorsimatilluni iluartumik isikkorinnarlunilu nukissaninnartarami.

Lena suleqatailu nerisatsinnut mamartunut qutsavigeriarlugit aniartorpugut. Nuannaarluta qungujulallutalu, qaaliivilluta ullormullu suliassat naammassinissaannut piareersimalluta.

Nerisarfimmi ulloq suna kalaalimertortassanersut paasiniassallugu imminut eqqaasitsissusiorpunga. Nunatsinni ilisimatusarfituaq siunissami ulloq taanna alakkassallugu imminut akilerluarsinnaassaaq.