Kalaallit atuartut ilitsoqqussaralugu oqaatsitik
atoraangamikkit angusarissaarnerusarput. Kalaallisut oqaatsit inuiaqatigiinni
ulorianartorsiunngillat. Taakkua ilaatigut tassaapput Linda Lyberth
Kristiansenip ilinniagartuunngorniarnermini misissuinermini inerniliussaasa
ilaat.
Misissuinera kalaallit oqaasiisa atuuffiannut ilisimatusarnernilu
atorneqarnerannut tunngavoq.
Kalaallit atuartut ilitsoqqussaralugu oqaatsitik
atoraangamikkit angusarissaarnerusarput. Kalaallisut oqaatsit inuiaqatigiinni
ulorianartorsiunngillat. Taakkua ilaatigut tassaapput Linda Lyberth
Kristiansenip ilinniagartuunngorniarnermini misissuinermini inerniliussaasa
ilaat.
Misissuinera kalaallit oqaasiisa atuuffiannut ilisimatusarnernilu
atorneqarnerannut tunngavoq.
– Ilinniartitaanerup iluani oqaatsit
naleqartinneqarnersut ilisimatusarnermilu qanoq inissisimanersut
ilinniagartuunngorniutitut ilisimatusaatinni akissutissarsiniarnikuuara, Linda
Lyberth Kristiansen, Ilisimatusarfimmi inuiaat kulturiat oqaluttuarisaanerallu
pillugit ilinniagartuunngoqqammersoq oqaluttuarpoq.
Nunaqaqqaartut
pisinnaatitaaffiisa naapertuilluartumik illersorneqarnissaat taassuma
anguniagaanut ilaavoq. Linda Lyberth Kristiansenip oqaluttuarisaanerput uagut
nammineq oqaluttuarissagipput ilinniartitaanerlu uatsinnut tulluarsassagipput
pingaartutut nalilerpaa. - Uagut nammineerluta oqaluttuarisaanerput nunanit
allaneersut atuakkiaat atorlugit ilinniartarparput.
Tamanna
pissusissamisuunngilaq, taanna oqarpoq. Linda Lyberth Kristiansenip
ilinniagartuunngorniummi suliarinerani Ilisimatusarfimmi Kautokeinollu
ilisimatusarfiani (Sámi University of Applied Sciences) ilisimatusartut ilinniartullu oqaloqatigai.
Ilisimatusarfiup kalaallit oqaasii pillugit inuiaqatigiinnut tunniussai
ilisimasallu pillugit saqqummiussai killeqartut suliamini ilaatigut
inerniliuppaa. – Ilisimatusarfik inuiaqatigiinnut kalaallinut
tulluarsagaanngilaq. Kalaallit oqaasii ilisimatusarnermut tunngasuni
aallunneqarnerungaartariaqaraluarput, Linda Lyberth Kristiansen oqaluttuarpoq.
Ileqqoq
“Kalaallit oqaasii
aallunneqarnerungaartariaqaraluarput.” Oqaaseqatigiit taakkua
nutaarsiassartaqanngilluinnarput. Linda Lyberth Kristiansenip
ilinniagartuunngorniutaani takuneqarsinnaavoq, Ilisimatusarfimmi ilinniartut
kalaalerpassuit namminneq oqaatsitik atorlugit allakkusuttaraluartut. Kisianni
taama iliortannginnerannut suna peqqutaava?
Linda Lyberth Kristiansenip
oqarnera naapertorlugu ilinniartut danskisut allanneq sungiusimaneruaat.
–
Ilisimatusartutut kalaallit oqaasii atorlugit allanneq amerlasuut ilinniarsimanngilaat.
Taamaattumik danskisut allanneq ajornannginnerutillugu danskisut allattarput,
taanna nassuiaavoq. Ilimmarfimmi ilisimatusartut aamma taama
nassuiaatissaqarput.
– Ilisimatusartut oqarnerat naapertorlugu ilinniartut
ilinniartitsinermut kalaallit oqaasiinik atuiffiusumut sungiusimanninngillat.
Inimili atuartitsiffiusumi oqallittoqaleraangat ilinniartut kalaallisut
oqaatsitik atorlugit nassuiaalluarsinnaanerusartut, Linda Lyberth Kristiansen
oqarpoq.
Kalaallit ilinniartut oqaatsit ilitsoqqussatik atoraangamikkit
angusarissaarnerusartut aamma takussutissaqarpoq. Ilisimatusarfimmi
misilitsissagaanni kalaallit oqaasiinik atuinissaq piumasaqaataanngilaq.
–
Kalaallit oqaasii ilisimatusarnermi nukittorsarneqassapput. Tamanna pillugu
oqallinneq pingaaruteqarpoq. Atuartorpassuit allattukkatik misilitsilernerminni
kalaallisut nutsernissaat erloqissutigisaraat misissuininni aamma paasivara,
taanna oqarpoq. Kalaallisulli oqaatsit atunnginnerinut peqqutaanerpaaq
allaavoq.
Linda Lyberth Kristiansenip oqarnera naapertorlugu tamanna tassaavoq
ileqqutoqqanik allanngortitserusunnginneq ileqqutoqqallu atornerannik
apeqqusiinnginneq.
– Ilinniartut danskisut sungiussisimanerusut
assersuutissaapput. Nunasiaataasimasutut eqqarsarneq aamma peqqutaasinnaavoq.
Nalikinnerusutut imminut isigineq. Tamanna danskit oqaasii atorlugit
ilisimatusarneq pitsaanerussasumik paasinninneruvoq, nassuiaavoq.
Akuerineqarneq
Qanorliuna iliornikkut
ileqqutoqqat allanngortinneqarsinnaasut? Linda Lyberth
Kristiansenip inuiaqatigiit kalaallit oqaatsitik pillugit iliuuseqarnissaannik
kaammattorpai.
- Akuerineqarneq aqqutissaavoq siulleq. Uagut inuiaqatigiittut ajoqutigisatsinnik
immitsinnulluunniit akornuserluta ileqqutoqaqarsimanerput akueralugu. Uagut
inuiaqatigiittut immitsinnut nikagisimanerput akueralugu. Aammalu uagut
inuiaqatigiittut iliuuseqarnissamut nukissaqartariaqartugut
aqqutissaqalernissarpullu suliarissagipput, taanna oqarpoq.
Linda Lyberth
Kristiansen isumaqarpoq nuna ilisimatusarnikkut nammineq oqaatsit ilisimasarlu
atorlugit ingerlatsisinnaasoq.
– Soorunalimi. ilinniartitaanermut suliassaqarfik nunatsinniippoq.
Taamaattumik uagut inuiaqatigiit oqaatsigut pillugit iliuuseqarsinnaanerput
angisoorujussuuvoq, Linda Lyberth Kristiansen oqaluttuarpoq.
