Mittarfik nutaaq Angallannermut Aqutsisoqarfimmit akuerineqarpoq — killilersuutit aallaqqaammut atuutilersinneqarallarput

Akuersissutit kingulliit sisamanngornerup unnuaani  tunniunneqarput, Ilulissanilu mittarfik nutaaq ullumi atoqqaartinneqartussaavoq.

Nakkutilliisut mittarfimmi sillimaniarneq eqqarsaatigalugu qanoq innera qaammatini kingullerni misissorlugulu, misileraavigineqareersorlu, Greenland Airports inaarutaasumik akuersissummik unnuaq tunineqartoq, Angallannermut Aqutsisoqarfik tusagassiutitigut nalunaarummi ilisimatitsivoq

Angallannermut Aqutsisoqarfimmi pisortap tullia Lars Korsholm ima oqarpoq:

- Misissueqqissaareerluta timmisartumillu misiliiffigineqareernerata kingorna mittarfimmi isumannaallisaanermut nunat tamalaat akornanni mittarfinni nutaaliaasuni piumasaqaataasut naapertorlugit mittarfik akuerineqarpoq, aviisimi The Guardian-imi allassimavoq.

– Mittarfimmi sulisut nakkutilliisullu piffissami sivisuumi ilungersorlutik, suliniuteqareersullu tamanna pivoq. Tamanna anguniarlugu Angallannermut Aqutsisoqarfik Greenland Airportsilu qanimut pitsaasumillu suleqatigiipput, Lars Korsholm oqarpoq.

Mittarfimmut akusersissummi akuersissutigineqartut  tassaapput; mittarfik nutaaq 2.200 meterisut takissusilik, qatserisartut annaassiniarnissamullu sillimaniarneq, isumannaallisaanermut periutsit, mittarfimmi isumannaallisaaneq timmisartullu ingerlaarnerannik nakkutilliineq.

Utaqqiisaarutaasumik killilersuutit

Akuersissut tunniunneqareernerani utaqqiisaarutaasumik killilersuutinik malitseqartoq pisortap tulliata nassuiaatigaa:

– Assersuutigalugu timmisartut mittartut amerliartuinnarnissaat isumannaallisaanermilu malittarisassat sungiunneqarnerujartortillugit mittarfiup timmisartunik aqqusaarneqarsinnaanera annertusiartuinnassaaq. Timmisartuussinissamulli pilersaarutaareersut, takornariarfiunngitsumilu killilersuutaareersoq, sunnerneqarnavianngillat, Lars Korsholm oqarpoq.

Ilulissani mittarfimmi qulakkeerinninnissaq eqqarsaatigalugu piffissami aggersumi, akuersissummi piumasaqaataasut malinneqarnersut nakkutigineqassapput, tamatumalu kingorna killilersuutit, annikillisarneqarsinnaassallutik.

Isumannaallisaanermi nakkutilliisunut akuersissummik tunniussisoqarnera pisortap nuannaarutigaa

Greenland Airportsimi pisortaanerup Jens Lauridsenip akuersissut nuannaarutigaa:

– Ilulissani mittarfimmi nutaami ilaasut siulliit tikilluaqqusinnaalerpavut. Tamanna ukiorpassuarni qilanaaraarput, inuillu hundredellit ilungersorlutik tamassuma tikinnissaanut sullapput, Kalaallit Nunaanni attaveqaatit annertusarneqarnerat oqaluttuarisaanermut ilannguttoq naammassisinnaalerumallugu, Jens Lauridsen tusagassiuutinut nalunaarummi oqarpoq.

Ammaanersiorneq Avannaani oqaluttuarisaanermi pingaarutilittut pisoqarneranik pisortaanerup taavaa, akuersissuteqartoqarneranullu tunngatillugu mittarfimmi isumannaallisaanikkut nakkutilliisut killilersuisoqaratik akuerineqarnissaat pisortap immikkut pingaartippaa:

– Ulloq tamatsinnut pingaaruteqarpoq, suleqatittalu angusaat tulluusimaarutiginissaannut pissutissaqarluarpugut. Tamaviaarlutik sulipput, ilungersornerallu kinguneqarluartoq takusinnaallugu nuanneqaaq. Suliniulli matumik ammaanneratigut unittanngilaq. Suliarineqartartut sungiusartuaannarpavut, sulisunik pitsaanerpaamik atuinissaq sulissutigiuarparput, ingerlalluartumik ingerlatsinissatsinnik qulakkeerinninniarluta ilaasullu pitsaanerpaamik misigisaqartinniarlugit suleqatigiinnissarput nukittorsarlugu, Jens Lauridsen oqarpoq.

Greenland Airports Nuummi mittarfimmi nutaami isumannaallisaanermut tunngatillugu ajornartorsiuteqangaatsiarpoq.