Iddimanngiiu Jensen Bianco: Avannaa nunarsuup sinneranut ammarpoq

Ilulissani mittarfissuup atoqqaarfissiornera Kalaallit Nunaannut pingaarutilimmik angusaqarfiusoq ullumi pissaaq. Mittarfik 2.200 meterisut takitigisoq, Københavnimit toqqaannartumik timmisartumik miffigineqarsinnaasoq takornariaqarnermi, inuussutissarsiornermi avannaaniillu nunarsuup sinneranut angalasinnaalernermik periarfissanik nutaanik ammaavoq.

Tamanna ineqarnermut, attaveqaasersuutinut isorliunerusunut upalungaarsimanermullu naalakkersuisup Iddimanngiiu Jensen Biancop (IA) Københavnip mittarfiani sisamanngornermi ullaakkut ammaanersiornermi oqalugiarnermini erseqqissarpaa.

– Nutaamik mittarfittaarnermi Kalaallit Nunaata Avannaata Danmarkillu akornanni angalaneq oqinneruliinnassanngilaq. Nunarsuaq tamarmi Kalaallit Nunaata Avannaanut ammartussaavoq, oqarpoq nangipporlu:

– Tamanna inuussutissarsiortunut, takornarianut, ilinniariartortunut, minnerunngitsumillu innuttaasunut danskit peqqinnissaqarfianni katsorsartinnissamik pisariaqartitsisunut pingaaruteqalertussaavoq.

Silaannakkut angallanneq Kalaallit Nunaannut pingaaruteqarluinnarpoq

Kalaallit Nunaanni illoqarfiit akornanni aqqusineqanngimmat silaannakkut angallanneq pingaaruteqarpoq, sumiiffiit isoratoorujussuupput

nunamilu angallannermut immikkuullarissunik piumasaqaateqarfiullutik.

Timmisartumik angalaneq takornarianut ilaasunillu angallassinermut pingaaruteqaannarani ilaquttariit ikinngutillu akornanni qaninnerulersitsisarpoq. Aamma ilinniartitaanermut, suliffissanut, inuussutissarsiornermut pisortallu sullissinerannut aalajangiisuulluinnarluni.

Attaveqaatilli maannakkut pioreeraluartut periarfissat atorluarumallugit suleqatigiittoqartariaqarpoq.

– Mittarfik sinaakkutissiivoq. Periarfissat takkuttussat atorluarnissaat ataatsimoorluta akisussaaffigaarput, oqarpoq.

Suleqatigisanut qujassuteqartoq

Nunatsinni mittarfiliortiternerit ukiut ingerlanerini oqallisaangaatsiartarput. Ilulissani mittarfissuup ammarnersiorneqarneranik suliniut annertooq maanna naammassivoq.

Iddimanngiiu Jensen Biancop sulisut, sanaartortitsisut siunnersortillu, Greenland Airports, oqartussat, Avannaata Kommunia aammalu najukkami suliffeqarfiit suliniummullu tapersersuisut qutsavigai.

Danmarkimi naalakkersuisut Folketingimilu ilaasortat Nuummi Ilulissanilu mittarfiliornissamut piviusunngortitseqataanerat aamma qujassuteqarfigai.

Danskit naalagaaffiat 2018-imi isumaqatigiissuteqarfigineqarneratigut aningaasaliissuteqarlunilu taarsigassarsisitsivoq. Suliniutit naammassineqarnissaanut tamanna aalajangiisuusoq naalakkersuisup oqaatigaa.

Aammattaaq Greenland Airportsimi pisortaq Jens Lauridsen, pisortatut tunuartinnani mittarfiliortiternissanut pingaarutilimmik inissisimaffeqarnera immikkut qujassuteqarfigaa.

Ulluinnaat aallartissasut

Mittarfik atoqqaarfissiorneqareerpat ulluinnarni sulineq aallartittussanngorpoq.

Mittarfimmi sulisut ilaasunik timmisartumillu angallassinermik isumannaatsumik pitsaasumillu sullississapput, takornariaqarnermullu inuussutissarsiornikkullu ineriartornissamut periarfissat piviusunngortinneqartussanngorlutik.

– Tassami ulloq ammaanersiorfiusoq naappat, ulluinnaat aallartittussaapput, Iddimanngiiu Jensen Bianco oqarpoq.

København, Ilulissat, Avannaata Kommunia Kalaallit Nunaatalu sinnera mittarfittaarnermi naggasiutigalugu pilluaqquai.

– København – Ilulissat pilluaritsi. Avannaa Kommunia pilluaritsi. Aammalu Kalaallit Nunaat tamakkerlugu pilluaritsi. Qujanaq.