KUJALLEQ KILLILIIVOQ

Inuit arlallit Allorfik Kujallermi katsorsartilersut

Kujallermi imigassanik matusisoqarmalli sapaatip-akunneri sisamat qaangiutilersullu, innuttaasut arlallit illoqarfinni assigiinngituni katsorsartillutik aallartittut Allorfiup ilisimatitsissutigaa.

Qaqortumi Nanortalimmilu katsorsartinnissamut periarfissiisoqarpoq, pilersaarutillu malillugit Narsami sapaatip-akunneri sisamat qaangiuppata katsorsaqatigiinnik aamma aallartittoqassaaq.

Assiliisoq: Oscar Scott Carl

Arnaq Nielsen Arnaq Nielsen Tusagassiortoq

Saqqummersinneqarpoq 28. Oktobari 2026 - 17:30

Ussassaarut

Qaqortumi Allorfik Kujalliup imigassamik matusinerup kinguninngua, oktobarip aallartinnerani, immikkut ammatinneqarnerani innuttaasunik katsorsartikkusuttunik saaffiginnittoqarnikuunngilaq.

Pissutsilli allanngoriartorpasipput. Qaqortumimi innuttaasut pingasuniit tallimanut amerlassusillit katsorsartillutik aallartissimasut Allorfik Kujallermit nalunaarutigaat.

- Qaqortumi innuttaasut pingasuniit tallimanut amerlassusillit katsorsartillutik aallartinnerat ilisimatitsissutigisinnaavarput, Allorfimmiit Sermitsiamut taama allapput.

Illoqarfinni arlalinni katsorsaasoqalersoq

Qaqortup avataani illoqarfinnut nunaqarfinnullu allanut pisariaqartitsineq aallaavigalugu katsorsaajartortitsisinnaallutik, Allorfimmeersut Sermitsiamut imigassamik matusinerup kinguninngua ilisimatitsipput.

Illoqarfinnilu arlalinni katsorsaaneq aallartinneqarpoq. Nanortalimmi katsorsaqatigiit sapaatip-akunnerini sisamani ullut tamaasa naapisinneqartartut aallartissimalerput. Allorfik Kujalleq Narsami katsorsaqatigiittussanik sapaatip-akunneri sisamat qaangiuppata aamma aallartitsissaaq.

Ussassaarut

Kommune Kujallermi imigassanik matusineq inuit amerlanerusut katsorsartikkusulernerannik kinguneqarsimanersoq Allorfiup ilisimatitsissutiginngilaa.