Ilinniakkat aallartinnerat: Ilisimatusarfimmi inatsisilerinermi kandidatinngorniat siullermeerluni tikilluaqquneqarput
Ilisimatusarfimmi inatsisilerinermi kandidatinngorniat aqqaneq-marluk septembarip aappaani aallartipput. Ilisimatusarfimmi siullerpaamik kandidatinngorniarluni ilinniagaq tamanna aallartinneqarpoq, tamannalu Ilisimatusarfiup nuannaarutigaa.
Ilisimatusarfimmi ilinniakkat aallartipput, inatsisilerinermilu kandidatinngorniat siulliit ilinnialerput.
Leiff Josefsen
Ilisimatusarfimmi septembarip aappaani ilinnialerneq aamma Ilisimatusarfimmut nutaarluinnarmik aallartiffiuvoq. Ukioq mannami siullermeertumik inatsisilerinermi kandidatinngorniat aqqaneq-marluk ilinnialerput. Kandidatinngorniarfik tamanna nutaajuvoq, tassanilu ilinniartut aqqaneq-marluk inatsisilerinermi kandidatitut nunatsinni ilinniagaqarsimasut siullersarissavaat.
- Ukioq manna tulluusimaarnerulersinnaavugut aatsaavissuaq inatsisilerinermi kandidatitut ilinniakkamik neqerooruteqarsinnaaleratta - tassanilu kandidatinngorniarlutik ilinnialertussat aqqaneq-marluk nuannaarutigisatsinnik tikilluaqqusinnaanngorpavut.
- Inatsisilerinermi ilisimasanik sukumiinerusunik aamma inatsisilerinermi apeqqutinut arlariiaanik ajornartorsiutilinni aqqutissiuinissamut piginnaasassanik atorfissaqartinneqartunik ilinniartunit pissarsivissatut ilinniagaq ilusilersugaavoq. Kandidatitut ilinniagaq una nutaaq aamma ilinniakkap nunatsinni inuiaqatigiinnut pingaaruteqassusaa nuannaarutigeqaavut.
- Inatsisilerituunik piukkunnaatilinnik atorfissaqartitsineq annertuvoq - kandidatitullu ilinnialertussaatitta nunatsinni inuiaqatigiinnut tapersiisinnaanngornissaat qilanaaraarput, tusagassiuutinut nalunaarummi Ilisimatusarfik allappoq.
Ukioq manna Ilisimatusarfimmi bacheloritut kandidatitullu ilinnialersut katillugit 214-iupput.
