Kiisami: Sarfaarsuit Center aqagu sisamanngornermi ammassaaq 

Qaqugumita ammassava?

Apeqqut taanna nuummiorpassuit qaammatit kingulliit eqqarsaatigisimanngikkunikku allat peqatigalugit eqqartorsimassajunnarsivaat.

AAMMA ATUARUK

Ammarneqarnissaanut qilanaarpoq: – Soorlu juulliliinnallartoq

Maannali pisoqartussanngorpoq. Sarfaarsuit Centerimmi ammarnissaanut akuersissut ualingaatsiartoq pissarsiarineqarami. Taamaalilluni pisiniarfeqarfissuaq aqagu sisamanngornermi oktobarip 29-ani nalunaaqutaq 10.00 ammassaaq. Pisiffimmiit Sermitsiamut taama ilisimatitsipput.

- Maanna utaqqineq qaangiuttussanngulerpoq, Pisiffimmi pilerisaarinermut, attaveqatigiinnermut CSR-imullu pisortaq, Tina Alibina Hansen taama oqarpoq.

- Nalunngilarput pisisartorpassuit uatsitut qilanaarlutik utaqqisimasut, taamaammat tikilluaqqunissaat qilanaareqaarput. Niuertarfittaassani ulluinnarni angerlarsimaffimmilu atorneqarsinnaasorpassuit nioqqutigisussaavagut - tamussilaarusukkaannilu Burger Kingimut aqqusaartoqarsinnaavoq.

Pisiniarfiit nutaat

Pisiniarfeqarfissuarmi 9.000 kvadratmeterinik angissusilimmi pisiniarfiit sutorniartarfiillu ukuussapput: Pisiffik, Burger King, Sannatit, thansen, Jysk, Ilva kiisalu Caféerta. 

Centerimi sulisut 100-t missaanniissapput, ammaanissarlu Pisiffimmiunit qilanaarineqaqaaq.

- Ammaanerput pitsaasunik neqerooruteqarluta, kaffillerluta pisisartunullu siullernut 130-nut tupaallaatissaqartitsilluta nalliuttorsiutigissavarput. Neriuppugut inuppassuit takkullutik nalliuttorsioqatigiumaaraatigut, Tina Alibina Hansen oqarpoq.