Ilinniarnissamik
takorluugaq unitsikkallarneqarpoq.
Erneq Gjerulffip ilaquttanilu Nuummi
ilinniartut ineqarfiini inissarsisinnaannginnamik aquuteralannik
qamuteralannillu mekanikeritut ilinniarnini unitsittariaqarpaa. Erneq Gjerulffip
nulia piffissaq kingulleq atorlugu Kangaatsiami ilinniartitsisutut atorfinippoq
illoqarfigisaminnullu maanna angerlarsimalereerlutik. Ilaqutariit
aallarnissaannut ullualuinnanngortut AG-p naapippai.
Ilinniarnissamik
takorluugaq unitsikkallarneqarpoq.
Erneq Gjerulffip ilaquttanilu Nuummi
ilinniartut ineqarfiini inissarsisinnaannginnamik aquuteralannik
qamuteralannillu mekanikeritut ilinniarnini unitsittariaqarpaa. Erneq Gjerulffip
nulia piffissaq kingulleq atorlugu Kangaatsiami ilinniartitsisutut atorfinippoq
illoqarfigisaminnullu maanna angerlarsimalereerlutik. Ilaqutariit
aallarnissaannut ullualuinnanngortut AG-p naapippai.
- Maajimi
ilinnialeraluarpunga suliffimmillu ilinniarfissarsigaluarlunga. Ilinniartulli
inaat 2019-imili inigisarput paariinnarsinnaannginnatsigu Kangaatsiamut
angerlassalluta aalajangerpugut. Aalisaannartariaqarpasippunga, Erneq Gjeruff
pakatsisimaqisoq oqarpoq.
Erneq Gjerulffip nuliata Miitinnguaq Gjerulffip ilinniartitsisunngorniarnini aasaq
manna naammassimmagu ajornartorsiut pinngorpoq. Ilinniartut ineqarfianni inaat
tassunga allaqqavoq, pisarnerlu malillugu Erneq Gjerulffimut taanna
nuunniaraluaramikku ajornartoorput.
Ilinniartut
inaat pillugit inatsit 2019-imi allanngortinneqarmat taanna
periarfissaajunnaarsimavoq.
Nuummiutut
isigineqartut
-
Ilinniagaqarniarluta 2021-mi Nuummukarpugut, ukiullu marluk sinnerlugit maani
najugaqarsimagatta Nuummi innuttaasutut isigineqarpugut, Miitinnguaq Gjerulff
oqarpoq.
INIGISAQ ALLAMUT
TUNNIUNNEQARSINNAANNGITSOQ
Ilinniartut
ineqarfiinut inatsit 2019-imeersoq malillugu illoqarfinnit allanit
ilinniariartortut mattunneqassanngitsut Ilinniartitaanermut, Kultureqarnermut,
Timersornermut Ilageeqarnermullu Naalakkersuisoqarfik akissuteqarluni allappoq.
Inuk ilinniagaqartutut nalunaarsorneqarsimappat, ilinniakkallu aallartinnissaa
sioqqullugu illoqarfimmi allami minnerpaamik ukiuni marlunni najugaqartutut
nalunaarsorneqarsimappat, illoqarfinnit allaneersutut isigineqartarpoq.
Ilinniartut ineqarfiini inigisaq aapparmut inooqatigisamulluunniit
tunniunneqarsinnaanngilaq. Aapparisaq nammineerluni qinnuteqaateqarpat
piumasaqaatinillu naammassinnippat aatsaat inimik tunineqarsinnaavoq. Erneq Gjerulff
2021-miilli Nuummi najugaqarmat illoqarfimmit allaneersutut isigineqanngilaq.
Ilinniartut
illoqarfiup avataaneersut ineqarfissaminnik pisariaqartitsisut kollegiamut
inissinneqarsinnaasut ilinniartut ineqarfii pillugit Inatsisartut inatsisaanni
nr. 42-mi decembarip 12-iani 2019-imeersumi allassimavoq. Tassa ilinniartut
Erneq Gjerulffitut ittut. Illoqarfiulli avataaneersutut isigineqassagaanni
minnerpaamik ukiuni marlunni illoqarfiup ilinniarfiup avataani
najugaqarsimanissaq piumasaqaataavoq. Tassa ilaqutariit Gjerulffikkut
Nuummiuunngikkaluarlutik ukiuni kingullerni sisamani Nuummi ilinniartut inaanni
najugaqartuusimagamik Nuummi innuttaasutut maanna isigineqalerput.
-
Nuummiippugut ilinniagaqarniarluta, ilinniarnitsinnilu ilinniartut ineqarfianni
najugaqarluta. Nuummiuunngilagut. Inatsisilli malillugit Nuummi innuttaasutut
isigineqarpugut. Allat uagutsitut inissisimasut aamma nalunngilavut, aappariit
pakatsisimaqisut oqarput.
Suliffik
initalik
Ilaqutariit
Gjerulffikkut assigiinngitsunik aaqqiissutissarsiorsimapput. Ilinniartut
Ineqarfiisa Allaffeqarfiat aamma Iserit A/S arlaleriarlutik
saaffigisarsimavaat. Ikiorneqarsinnaanatilli. Erneq Gjerulffip ikiorneqarnissaa
anguniarlugu suliffia aamma kimigiisersimagaluarpoq – iluatsinngitsumilli.
Miitinnguaq
Gjerulff Nuummi atorfininnissaminut aamma qinnuteqartarsimavoq arlaleriarlunilu
iluatsitsisarluni. Ilinniartitsisunngoqqammerlunili atorfimmut atatillugu
inissarsinissaq periarfissaanngilaq. Taamaattumik ilaqutariit ilinniartut inaat
maanna qaliparlaaq isumalluutigigaluarpaat.
-
Pakatsinaqaaq isumalunnarsimallunilu. Uggornarpoq, pitsaasumik suliffimmik
ilinniarfissarsigaluarpunga 2029-milu naammassisussanngoraluarlunga. Aammami
sulinera nuannarigaluaqigakku. Ilinniarfigerusutara inatsit pissutigalugu
ingerlassinnaanngilara. Tamanna akuerisariaqarpara aappaagulu misileeqqissaanga
neriuutigalugulu kollegiassarsisinnaallunga. Praktikerfigisimasannut
qinnuteqaqqikkuma salliunneqassaaq, Erneq Gjerulff oqarpoq.
- Immaqa
aamma taamanikkussamut initalimmik atorfittaarnissannut misilittakkakka
naammalersimasinnaapput, Miitinnguaq Gjerulff oqarpoq.
Aappariit
Erneq Gjerulffip takorluukkamisut ilinniagaqalernissaa
aalajangiusimalluinnarpaat. Ilinniarusutaata atuagarsornertaa 2026-mi marsimi
aallartissaaq, aappariillu taamanikkussamut aaqqiissutissamik
nassaarsimanissartik neriuutigaat.
