Ilinniartut maanaannaq unitsitsisarnerannik GUX Aasiaat annikillisaavoq 

Aggustip 9-ani GUX Aasiaanni ilinniartut nutaat 135-it 1.G-mi ilinniarlutik  aallartissapput. 2.G aamma 3.G aggustip 17-ani aallartissapput.

Ukiup atuarfiusup nutaap aallartinnginnerani, piareersarnerit amerlasuut pisarput, taakkulu aallartittarput ilinniartut misilitsinnerat suli aallartitsinnagu aasaaneranilu feriarneq nallertinnagu. Taamaattumik rektori Dorthie, ilinniartitsisut, ilinniartut ineqarfiisa sulisui allallu ilinniarfimmi atorfeqartut peqatigalugit, ilinniarfiup aallarteqqinnissaanut ataqatigiissaarinermik annertuumik suliaqarlutik ulappupput.

Ilinniarfimmi sammiviit assigiinngitsut toqqarneqarsinnaasut tallimaapput, taamaattumillu Dorthie Siegstadip sulissutigisaasa ilagaat ilinniartitsisut naammattut eqqanaarneqarnissaat, tassa ilinniartitsisut aalajangersimasut saniatigut ilinniartitsisinnaasut pissarsiariniartussaagamigit. Sammiviit tallimaasut ukuupput:

• Timi peqqissuunerlu tunngavigalugit ilinniarneq
• Pinngortitalerinermik sammiveqarluni ilinniarneq
• Kulturi inuiaqatigiillu aallaavigalugit ilinniarneq
• Oqaatsinik sammiveqarluni ilinniarneq
• Pinngorartitsisinnaanermik sammiveqarluni ilinniarneq

Dorthie Siegstad oqaluttuarpoq ilinniartitsisut aalajangersimasut aalajaalluinnartuusut, ilinniartitsisullu amerlanerpaartaat ukiorpassuarni ilinniarfimmi atorfeqartuusartut:

- Assut toqqissisimanarpoq ilinniartitsisut ukiorpassuarni ilinniartitsisut aalaakkaasut isumalluutigisinnaagatsigit, taamaattorli ataavartumik sulissutigiuaannarparput ilinniartitsisut takkuttartut pisoqqatulli aamma sivisuumik ilinniarfitsinni atorfeqarusussuseqarnissaat, soorlu assersuutigalugu flex-eqartitsisarpugut, taamaaliornikkut ilinniartitsisunut periarfississarissaartitsisarpugut assigiinngitsunik sammisaqarnissaannut, soorlu tuttunniarnissamut, Arctic Cirkle Race peqataanissamut allanillu soqutigisaminnik sammisaqarsinnaanissaannut.

Tamatuma saniatigut rektorip atorfimmut tassunga ivertinneqaramili sulisunik ilinniartitsisut saniatigut ilinniarfimmi atorfeqartunut pikkorissartitsinerit piginnaanngorsaqqiinerillu aallartitsisimavoq, tassa soorlu igaffimmi sulisut, pedelit, kollegiami sulisut, allaffimmi sulisut, pikkorissarnissaminnut piginnaanngorsaqqinnissaminnullu periarfissaqartinneqartartut, taamaaliornikkullu ilinniartunut suli imminnut oqartussaaffigileratik ilinniarfimmi aallartittartunut aalaakkaasumik ingerlatsineq tunngavigineqartarluni.

- Suliassanik akisussaaffinnillu agguataarisinnaalluarneq aqqutigalugu aqutsisut oqartussaassusikinnerusut (mellemledere) akornanni ikililerinissamut periarfissaqalersimavunga, taamaalillutalu aningaasat sipaarutigisagut atorlugit ilinniarfik pitsaanerusumik inissisimalersissimavarput, ilaatigut inuusuttunut ilinniartunut ilinniarfitta najugaqarfii najugariuminarsarnerannut, rektori Dorthie Siegstad oqaluttuarpoq.

Amerlanerit suli meeraallutik GUX-imi aallartittarput

Tassa ilinnialersussat aallartittarput pitsaasunik, patajaatsunik aalajangersimasunillu atugassaqartitaallutik.

- Tamannami pisariaqarluinnarpoq, amerlanerpaammi ilinnialersut suli meeraasarput 18-it inorlugit ukiullit, aammalu siullerpaamik ilaquttaminnit avissaartut amerlanerpaasarput, taamaattumik pingaaruteqarpoq ilinniartut isumannaatsumik avatangiiseqartitaanertik ullormi siullermiilli malugissagaat, rektori oqaluttuarpoq.

Taassumalu ilanngullugu oqaluttuaraa aamma ilinniarfimmit pingaartinneqartoq ilinniartut peqqinnartunik nerisaqartitaanissaat, timersornermut aamma aalanissamut pitsaasumik periarfissaqartinneqarnissaat, kulturikkut misigisassat allallu ilinniartut ilinniagaqarnerannik siuarsaataasut, aamma atuarfik atornerluinernut sumiginnaanernullu sunulluunniit naaggaarluinnartuuneranik politikkeqarlutik.

- Malugisinnaasarparput ilinniartut nutaat atuarfiup malittarisassaanut akerlilersuisartut. Tassami inersimasutut inuuneqarnissamut misilittaaleruttornerusaramik killissaminnillu misilittaasuusarlutik, kisianni pitsaasumik aalaakkaasumillu malikkuminiartunillu malittarisassaqarnitsinni siunertariuaannarparput ilinniartut maanaannaq unitsitsinatik atuarfimmiissasut naammassinninnissamik tungaanut, malugisimavarpullu sunniuteqarluartoq maanaannarlu unitsitsisarneq atuanngitsoortarnerlu arriikkaluamik annikilliartuaalersoq, maluginiarparattaaq Aasianni ilinniarfitsinni periutsit atukkavut ilinniarfinnut allanut iluaqutaasumik sunniuteqartut.

Dorthie Siegstad aamma oqaluttuarpoq ilinniartut ikiorserneqarnissamik pisariaqartitsisut arlallit, siullerpaamik ikiorserneqalersartut, GUX Aasiaat aallartikkaangamikku.

- Ilinniartut kollegiani inuunerat pillugu malinnaaviginnittarpugut, aqutsiniarneq siunertarinagu, kisianni ilinniartut ataasiakkaat imminnut mattullutik kiserliulinnginnissaat nakkutigilluartarparput. Taamaattumik kollegiani sulisut ilinniarfitsinnut aamma pingaaruteqarluinnartuupput, tassani ilinniarfimmi maani ilinniartut kiserliulissanngillat imminnullu mattutissanngillat, taakkulu ilisimajuaannassavaat naatsorsuutigisinnaalluta. Tamatuma saniatigut aamma ilinniartut piffissaq eqqorlugu skematillu malillugit takkuttarnissaat alaatsinaattarparput, taamaalilluta ilinniartut ataasiakkaat atuanngitsuukulavallaalertinnagit kaammattuinikkut iliuuseqarniarsinnaasarluta.

Rektorip aamma isertuunnagu oqaluttuaraa maluginiartakkatik naapertorlugit ilinniartut arlallit angajoqqaaminnit GU-mut aallartinnissamut piumaffigineqartartut, tamannalu ilinniartut namminneq kissaatiginngisaannik pisarsinnaasoq, tamannalu pissutaalluni ilinniartut ilinniarnerminnik unitsitsiinnartarnerat annertuumik tassannga nassuiaatissaqartoq.