Ilisimatusarfik inissamik aningaasaanillu amigaateqartoq
Ilisimatusarfiup allilerneqarnissaata Danmarkimit aningaasaleeqataaffigineqarsinnaanera Danmarkimi ilinniartitaanermut ilisimatusarnermullu ministerip Christina Egelundip tunuarsimaarfiginngilaa.
Danmarkimi ilinniartitaanermut ilisimatusarnermullu ministeri Christina Egelund (Moderaterne) tallimanngormat Ilisimatusarfiup ukiumoortumik nalliuttorsiorneranut peqataavoq. Ilisimatusarfiup allilerneqarnissaa pillugu ilinniartitaanermut naalakkersuisumik oqaloqateqarsimalluni uppernarsarpaa. - Ullumikkulli aningaasanik nassataqanngilanga, taanna oqarpoq.
Assi: Trine Juncher Jørgensen
Ilinniartitaanermut ilisimatusarnermullu ministeri Christina Egelund (Moderaterne) tallimanngormat Nuummut tikippoq, tassanilu ilinniartitaanermut, kultureqarnermut, timersornermut ilageeqarnermullu naalakkersuisoq Nivi Olsen (D) ataatsimeeqatigalugulu kingorna Ilisimatusarfimmi ukiumoortumik nalliuttorsiornermi peqataavoq.
Ilisimatusarfiup inissaqarpallaarunnaarami allilerneqarnissaa oqaluuserineqarluarpoq.
Ilisimatusarfik 2008-mi ilinniartut 130-nut ilinniartitsisunullu 20-nut inissaqarpoq. Ullumikkut 600-nit amerlanerusunik ilisimatusartoqarlunilu 100-it sinnerlugit ilinniartitsisoqarpoq.
Tamanna pissutigalugu nunaminertat atorneqartut amigalerput, ukiunilu aggersuni ilisimatusartut suli amerlanerulernissaat ilimagineqarmat Ilisimatusarfimmi siulersuisut suliniut Uppik aallartippaat, taannalu aqqutigalugu ilisimatusarfiup allilerneqarnissaanut sanaartorneqarnissaanullu avataaniit tapiissutinik pissarsisoqassaaq. Avataaniit tapiissutit taakku Danmarkimiit pissarisiarineqarsinnaapput.
Suliniut tapersersortarialik
Naalakkersuisut suliniut Uppik tapersersorluinnaraat, “Ilisimatusarfiullu ineriartorluartuarnissaanut inissaqarniarneq sukkasuumik aaqqinneqarsinnaassasoq” neriuutigigaat Nivi Olsen tallimanngornermi oqalugiarnermini oqarpoq.
Nivi Olsen Ilisimatusarfiup allilerneqarnissaanut aningaasat Danmarkimit pissarsiarineqarsinnaanersut aperineqarami ima akivoq.
- Aap, soorunami. Periarfissatsialaasoq isumaqarpunga. Suliniut tapersersortariaqarparput, taamatuttaarlu naalagaaffeqatigiinneq pitsaanerusumillu suleqatigiinneq eqqartoraangatsigit ilinniartitaanerup iluani suliniutit taamaattut ikioqatigiinnissatsinnut tunngaviulluinnartut isumaqarpunga. Ilisimaneqartutut aningaasaateqanngilagut, tamannalu pissutigalugu ineriartorneq unissappat ajuusaarnassaaq.
Ilinniarfinni avatangiisit nutaaliaasut, ilinniartitaanermik, ilisimatusarnermik ataatsimoortitsinermillu siuarsaasut pilersinnissaat suliniummi Uppimmi siunertarineqarpoq.
Titartagaq: TNT Nuuk
Inuusuttunut aningaasaliineq
Christina Egelundip Danmarkip Ilisimatusarfiup allilerneqarnissaanik tapersersuisinnaanera apeqqutigineqarmat aamma tunuarsimaarfiginngilaa.
– Ullumikkut aningaasanik nassataqanngilanga, suliniulli taanna pingaaruteqartoq, pitsaasoq siunissamullu isumalluarnartoq, taamatuttaarlu inuusuttunut siunissamullu ajunngitsumut aningaasaliinermut tunngasoq isumaqarpunga. Kalaallit Nunaat ilinniartitaanermik ilisimatusarnermillu akisussaaffeqalernikuugaluartoq suleqatigiinnissaq pillugu oqaloqatigiilluartarpugut, tamatumalu saniatigut qallunaat kalaallillu ilisimatusarfiisa akornanni nukittuumik suleqatigiippugut. Ukiumoortumik nalliuttorsiornermi peqataasinnaanera nuannaarutigalugulu ataqqinaatigaavara.
Christina Egelund Kangiata Illorsua takuniarlugu Ilulissanukarluni arfininngormat ingerlaqqippoq, ataasinngornermilu ullaakkut Danmarkimut utissaaq.
