Ilisimatusarfimmi ilinniartut nutaat amerlanersaat arnaapput
Kalaallit Nunaanni Ilisimatusarfimmi ilinniartut nutaat sisamaagaangata pingasut sinnilaarlugit arnaasut, agguaqatigiissillugulu universitetini ilinniartunut allanut naleqqiullugu utoqqaanerusartut, misissuinerup takutippaa.
Ukioq manna Ilisimatusarfimmi ilinnialersut aatsaat taama amerlatigaat (2021-p kingorna).
Assiliisoq: Leiff Josefsen
Ilisimatusarfimmi 2024-mi ilinniartunngortut 211-usut amerlassusaasa takutippaat siunissami ilinnialersunit arnat amerlanerujussuussasut.
Ilisimatusarfimmimi misissuinermi tallimanngormat tamakkiisumik saqqummiunneqartumi paasineqarpoq taakkua 76 procentii arnaasut.
Angutit arnallu agguataarnerat Kalaallit Nunaanni ilinniarnertuunngorniarfinni arnat angutinit amerlanerunerannik pissuteqarpoq. Taamaakkaluartoq ukiuni kingullerni arnat Ilisimatusarfimmi ilinniarsimasut GUX-imi ilinniarsimasunit amerlanerupput.
Peqqissutsimut Pinngortitamullu Instituttimi assigiinngissut annerpaavoq, tassani ilinniartut nutaat tamarmik arnaammata. Instituttimili ilinniartut ikipput, peqqissaasunngorniartummi 16-iinnaammata, aappaagulu februaarimi biologimik ilinniagaq nutaaq aallartippat assigiinngissut annikillisinnaasoq, Ilisimatusarfimmit ilisimatitsissutigineqarpoq.
Ilinniartut utoqqaanerupput – angajoqqaajullutillu
Ilisimatusarfimmi aamma maluginiarneqarpoq ilinniartut ilarpassui suli aallartinnginnerminni ilinniarfiup avataani ilisimasanik misilittakkanillu katersuisarsimasut.
Ilinniartut agguaqatigiissillugu 30-t missaannik ukioqarput, tamannalu nunani allani amerlanerni, soorlu Danmarkimi, 20-t sinnilaarlugit ukioqarlutik aallartittunut sanilliullugu qaffasippoq. Misissuinerli naapertorlugu Savalimmiuni kisitsisit naleqqiunneqarsinnaapput.
Ilinniartut agguaqatigiissillugu ukioqqortunerat ilaatigut pissuteqarpoq nunatsinni ilinniartut amerlanerit ilinniakkanik ingerlaqqiffiusunik kingusinnerusukkut naammassinnittarnerat.
Aamma amerlasuut ilinnialertinnatik meeqqioqqaartarput. Ilinniartut nutaat 38 procentii bacheloritut ilinnialersut angajoqqaajupput, kandidatitullu ilinnialersut 56 procentii angajoqqaajullutik.
