Ilisimatusartoq: Sinerissami alapernaarsuisut kalaallit sakkutuujunngitsut isumaliutigineqartariaqarput
Illersornissaq pillugu isumaqatiginninniarnermut atatillugu Kalaallit Nunaanni sinerissami sakkutuujunngitsunik alapernaarsuisoqartalissanersoq isumiutigineqartariaqartoq ilisimatooq oqarpoq.
- Nunani allarpassuarni sinerissami sakkutuujunngitsunik immikkut ittunik alapernaarsuisoqarpoq. Danskit sakkutuuisa umiarsuaat qamutilillit nakkutilliinerat nalinginnaasuunngilaq, Ulrik Pram Gad oqarpoq.
Pressefoto / DIIS
Kalaallit Nunaanni
sinerissami alapernaarsuisut sakkutuunit ullumikkut
nakkutigineqarput. Politikerilli nunat allat, soorlu Savalimmiut
Islandilu, namminneq sinerissami alapernaarsuutillit
isumassarsiorfigisariaqarpaat.
Kalaallit Nunaanni sakkutuujunngitsunit sinerissami
alapernaarsuisoqalersinnaanera arlalinnik pissuteqarluni
eqqarsaatigineqartariaqartoq Dansk Institut for Internationale
Studiemi ilisimatooq Ulrik Pram Gad oqarpoq.
Kalaallit Nunaata sinerissami nakkutilliinerup
nammineerluni akisussaaffigilernissaanik kissaateqarnera, Danmarkillu
Kalaallit Nunaatalu Issittumi sakkulersorfiunnginnerusumik
pisoqarfiunissaa kissaatigigaat Ilisimatusartoq Berlingskemi
allaaserisamini tikkuarpaa.
- Nalinginnaasuunngilaq
Sinerissami alapernaarsuutit sakkutuujunngitsut
kissaatigineqartut tamaasa piviusunngortissinnaagunarpaa:
- Nunani allarpassuarni sinerissami
sakkutuujunngitsunik immikkut ittunik alapernaarsuisoqarpoq. Danskit
sakkutuuisa umiarsuaat qamutilillit nakkutilliinerat
nalinginnaasuunngilaq, Ulrik Pram Gad Sermitsiap nittartagaani
aviisimut oqarpoq.
Kalaallit sinerissami alapernaarsuinermi imaani
SAR-imillu annaassiniarnerit, aalisarnermillu nakkutilliinermik
suliaqarsinnaapput.
Naleqqami politikerip Pele Brobergip siornatigut
sinerissami alapernaarsuinermik pilersitsinissamik siusinnerusukkut
siunnersuuteqarnikuunera Ilisimatusartup tikkuarpaa.
Siunnersuut taamani qularutigineqarpoq Kalaallit
Nunaatali maanna pisortatigoortumik kissaatigisaanut ilaavoq.
Sineriammi alapernaarsuisunik sakkutuujunngitsunik pilersitsinissa
ajornakusuunngitsoq Ulrik Pram Gadip nalilerpaa:
- Peqatigiiffiit allat qiviaraanni
Namminersornerullutik Oqartussaasimasut Danmarkimit susassaqarfinnik
angerlaassinerani matut nutaamik allagartalerneqariarlutik kingorna
kalaalinngorsaasoqarpoq.
Periarfissaq piuvoq
Suliniut tamanna maanna
isumaliutersuutigineqartariaqartoq ilisimatusartoq oqarpoq.
Illersornissaqarfiummi umiarsuaat Issittumiittut illersornissaq
pillugu isumaqatigiinniarnernut ilaapput, umiarsuillu qanganisaasut
qaqugukkut qanorlu nutarterneqassanersut isumaqatiginninniutaammata.
- Sinerissami alapernaarsuineq sakkutuujunngitsut
suliassaannik suliaqartani umiarsuit aqqartartunik malersuinermut
Amerikamiullu soqutigisaannut atornerusariaqartut qallunaat
sakkutuuisa imarsiortut ilaat isumaqarput, Ulrik Pram Gad oqarpoq.
Suliaq tamanna isumannaallisaanermut politikkimik
misissuinermik tunngaveqarsinnaavoq. Tassani misissorneqassalluni
sinerissamik alapernaarsuinerup sakkutuujunngitsunit
akisussaaffigineqalerpat Issittup sakkulersorfiunnginnissaanik
kissaateqarnermut iluaqutaasinnaanera. Kalaallit qallunaallu
politikeriisa kissaataat aallaavigalugu.
Sakkutuut atortui pillugit immikkut
ilisimasaqannginnini ilisimatusartup naqissuserpaa. Oqariartuulli
tassaavoq sakkutuujunngitsunik sinerissami alapernaarsuisoqalerpat
sakkutuut suliassaminnut sakkulersornermut tunngasunik
ukkatarinnilissasut.