Nivi Olsenip tatiginnikkunnaarnerit marluk anigorai

Siumup Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Nivi Olsen (D), tatigiunnaarpaa. Tamannalu pillugu tatiginninnginnermik taasisoqassasoq, Erik Jensen (S) siunnersuuteqarpoq. 

- KNQK-mut tapiissutinut tunngasup suliap ingerlanneqarnera tunngavigalugu Siumumit Naalakkersuisup pisortat aningaasaataannik akisussaassusilimmik aammalu Inatsisartut aalajangiinerinut naapertuuttumik aqutsisinnaanera tatigiunnaarparput, Erik Jensen oqarpoq.

KNQK-p 2025-mi tapiissutisiamik ilaat missingersuutini akuerisani siunertarineqartunit allanut atorsimagaat Naalakkersuisut nalusimanngikkaat ullumi oqallinnermi ilanngussani atuarneqarsinnaavoq. Tamannalu Siumup tatiginnikkunnaarneranut tunngaviuvoq.

Ilinniartitaanermut, Kultureqarnermut, Timersornermut Ilageeqarnermullu Naalakkersuisup taama pineqarnini ima oqaasertalerpaa. 

- Takusinnnaanngilara sukkut inatsisinik unioqqutitsisimallunga, sioorassutissaqanngilanga, naalakkersuisoq oqaluttarfimmit oqarpoq.

Inatsisartut tatiginnikkunnaarneq pillugu maanna unikkallarput. Ataatsimiinnermi aqutsisup oqarnera naapertorlugu ataatsimiinneq nalunaaqutaq 15.30 aallarteqqissaaq.

Inatsisartut Siulittaasuat, Kim Kielsen, nalunaaqutaq 15.39 nalunaarpoq, ataatsimiinnerup unikkallarnera sivitsorneqartoq. Maannamut pilersaarutit malillugit ataatsimiinneq nalunaaqutaq 16.00 aallarteqqissaaq.

Inatsisartut Siulittaasuat, Kim Kielsen, nalunaaqutaq 16.24 nalunaarpoq, ataatsimiinnerup unikkallarnera 17.00-ip tungaanut sivitsorneqartoq.

- Inatsisartut piffissamik sivisunerusumik pisariaqartitsigamik, taanna oqarpoq.

Naalakkersuisoqataasut tatiginnittut

Ataatsimiittut nalunaaqutaq 17.15 aallarteqqipput. Tassani naalakkersuisoqatigiinnit pinngitsoortitsinissamik siunnersuut Kristian Jeremiassenip (IA), saqqummiuppaa.

- Ilinniartitaanermut, Kultureqarnermut, Timersornermut Ilageeqarnermullu Naalakkersuisoq suli tatigaarput, Kristian Jeremiassen oqarpoq.

Naleraq: Naammatsivippugut

Tamanna pereersoq Jens Napaattooq oqaluttarfimmut qaqivoq. Taassuma Naalakkersuisumut tatiginninnginnertik aammarluni saqqummiuteqqippaa.

- Naalakkersuisunut ilaasortatut ingerlaannarnissaanut tatiginnikkunnaarluta maannakkut naammatsivippugut. 

Tatiginninnginneq saqqummiuteqqinneqarmat ataatsimiinneq unikkallassasoq siulittaasoqarfik aalajangerpoq. Ataatsimiinneq nalunaaqutaq 17.35 aallarteqqissasoq nalunaarutaavoq.

Demokraatit: Suli tatigaarput

Ataatsimiinneq aallarteqqimmat, Pipaluk Olsen (D), pinngitsoortitsinissamik siunnersuuteqarluni saqqummiussivoq. 

- Naalakkersuisoq suli tatigaarput, Pipaluk Olsen tunngavilersuivoq.

Tamanna pereersoq Jens Napaattooq oqaluttarfimmut qaqeqqippoq. Taassuma maannamut killiffik tupigusuutigeqaa. 

- Naalakkersuisoqatigiit maannakkut ataatsimoorlutik imminnut illersornerat malunnaq, siunissaq ernumanaq, taanna oqarpoq.

Taassuma tulleriiginnarnik marloriarluni tatiginnikkunnaarnermik takutitsisoqaraluartoq Naalakkersuisup tunuannginnera tupaallaatigaa.

Siumut: Kanngunartuliat annersaannut killippasippugut

Ilinniartitaanermut, Kultureqarnermut, Timersornermut Ilageeqarnermullu Naalakkersuisup tunuliaquttaminit suli tatigineqarnera Siumup kanngunartuliatut nalilerpaa.

- Kanngunartuliat annerpaartaannut killippasippugut. Inuiaqatigiit tupinnartorujussuarmut killeqqarpasipput. Malinnaasut tupaallaqqassappata tupigusunnavianngilagut.

- Amiilaarnartumut killippugut. Inatsisartut inatsisaat avaqqullugit sulisinnaaneq naalakkersuisoqatigiit maanna ammaappaat, Erik Jensen oqarpoq.

Atassut: Suliaq ataatsimiititaliamut uterli

Ataatsimiittut killiffiat siuariartorfiunngitsoq, Aqqalu C. Jeremiassen oqarpoq. Taamaattumik siunnersuuteqarpoq.

- Kukkunersiuinermut Ataatsimiititaliap suliaq tigoqqinniarliuk maani inersuarmi oqaatsit uteqattaartinneqarnerat naammalerpoq, Aqqalu C. Jeremiassen oqarpoq.

Taassuma taama siunnersuuteqarnera Siumumeersup, Erik Jensenip taperserpaa.

Taasineq

Tamannali malinneqanngilaq. Taarsiullugu tatiginninnginnermut pinngitsoortitsinissamik taasisoqarpoq. Tassunga akuersisut 14-pput. Akerliusut arfineq-marluk. Taaseqataanngitsut marluk. Taamaalilluni Nivi Olsen Naalakersuisutut ingerlaannarsinnaanngorpoq.

Oqaluuserisaq taassuma kingorna inaarutaasumik aamma taasissutigineqarpoq. Partiit suli oqaaseqarsimanngitsut suliaq immikkoortoq suliarineqartoq pillugu oqaaseqaamminnik saqqummiussinngitsoorfigaat.