NUUK
Illersornissamut isumaqatigiissutip immikkoortua 2 pillugu Nuummi innuttaasunik ataatsimiisitsineq
Illersornissaq pillugu Danmarkimi attuumassuteqanngitsumik suliniut "Folk & Sikkerhed" Kalaallit Nunaanni immikkoortortaqarfimmik pilersitsiniartoq UNICEF Kalaallit Nunaat peqatigalugu Nuummi innuttaasunik ataatsimiisitsissapput Katuami ataasinngornermi oktobarip 27-ani nal. 19:00.
Isumannaallisaanermik pitsanngorsaanissap Kalaallit Nunaanni ingerlanneqartussap saniatigut, nunat tamalaat NATO-mi ilaasortat sakkutuui aamma Kalaallit Nunaanni ersarinnerulerput, tassami Issittumi silap atugassarititaata sakkortusinnaasaqisup iluani sungiusarnerit aalaakkaanerusut aallartinneqarnikuummata.
Asseq: Franskit illersornissaqarfiat
Illersornissaq pillugu isumaqatigiissut nutaaq imaqarpoq illersornissaqarfiup najuunneranik nukittorsaanermik, nunap iluani, qulaani, eqqaanilu, aammalu anguniagaavoq innuttaasunut isumannaallisaaneq nukittorsarneqarnissaa kiisalu Kalaallit Nunaata killeqarfiisa innimigineqartussaanerata nakkutigineqarnerunerat.
Isumannaallisaaneq annertunerusoq aamma pilersitsivoq pissutsinik nutaanik, tassa illersornissaqarfiup ersarinnerulerneranik. Tamanna nunatsinni innuttaasunit assigiinngitsumik qisuariarfigineqarpoq.
Innuttaasoqarpoq isumannaallisaanerup annertunerulerneratigut toqqissisimanerulersunik, aammali innuttaasoqarpoq sunniutissaanik ernumassuteqartunik.
Taamaattoqarnera pillugu Danmarkimi isumannaallisaanermut suliniaqatigiiffik arlaannaannulluunniit attuumassuteqanngitsoq, upalungaarsimanermik isumannaallisaanermillu suliniaqatigiiffiusoq "Inuit isumannaallisaanerlu" UNICEF peqatigalugu innuttaasunik ataatsimiititsinermik aaqqissuusisussanngorpoq.
Ernumanermiit ilisimasaqarnerulernermut
Illersornissaq pillugu isumaqatigiissutit allat assigalugit isumaqatigiinniarnerit isertuussaanikuupput, isumaqatigiittoqarnissaa tikillugu.
Tamatuma malitsigisaanik, isumaqatigiissut innuttaasut ilaannut ernumalersitsivoq nalornilersitsillunilu - tamannalu siunertarineqartumut sanilliullugu mumingariinnik misigisimalersitsivoq, naak isumannaallisaaneruo nukittorsarneqarnissaa siunertaralugu iliuusaagaluartoq, piffissami nunarsuarmi isumannaallisaanikkut pissutsit unammillernartillugit, aaqqissuisut tunngavilersuipput.
- Paasisimasat tunngavigalugit oqaloqatigiinnissamut paasinninnissamullu inissaqartitserusuppugut. Illersornissakkut isumannaallisaanikkullu piareersimaneq ammasumik soqutiginnittumillu oqaloqatigiissutigigutsigu, siunissaq pitsaanerusumik piareersimaffigilersinnaavarput, Rasmus Lohse, Folk & Sikkerhed - Kalaallit Nunaat siulittaasua oqarpoq.
Illersornissaq pillugu isumaqatigiissutip Issittumut Atlantilullu Avannaanut ilassutitut isumaqatigiissutaasoq 2 paasisaqarfiginerusukkaanni, taamaalilluni periarfissaqarpoq ataatsimiisitsinermi najuutissalluni, taannalu tassa pissaaq ataasinngornermi unnukkut Katuami. Aaqqissuussaq nal. 19:00 aallartissaaq.
