Illersornissaqarfiup sulissutai siunissaalu pillugit  soqutiginninneq annertooq

Ukioq manna marsimi taamaaliorput - aamma piffissami matumani, tassa arfininngornermi novembarip 23-ani taamaalioqqipput.

Tassa Illersornissamut ministeria Troels Lund Poulsen aamma tikeraarsaasua, nunanut allanut tunngasunut Naalakkersuisoq, Vivian Motzfeldt, arfininngornermi innuttaasunik ataatsimiisitsipput.

Innuttaasut ikigisassaanngitsut soqutiginnillutik peqataapput, illersornissaqarfiullu sulinermini killiffia siunissamilu suleriaaseriligassaa assut soqutigineqarput, pingaartumik Naalagaaffiup issittortaani suliat matumani soqutigineqarlutik.

Amerikap Issittumi inissisimanera pillugu akissutissanik amigaateqarneq

Innuttaasunik ataatsimiisitsineq naammassimmat Sermitsiamit Esekias Therkelsen aperaarput suna pingaarnertut pissarsiarisimaneraa:

- Amerikap Issittumi inissisimanera, pingaartumik Kalaallit Nunaannut tunngatillugu, isumannaallisaanermut illersornissamullu pilersaarutaanik tunngasunik paasisaqarusullunga aperivunga. Amerikarmiut Kalaallit Nunaanni sanaartornikkut illersornissamullu tunngasunik atortulersuinikkut qanoq pilersaaruteqarnersut paasisaqarfigerusukkakku. Kisianni erseqqissumik akineqanngilanga, naluara sooq, Esekias oqaluttuarpoq nangillunilu:

- Nunarsuup avannarliani pisunut malinnaavunga, eqqarsaatigalugulu amerikarmiut pilersaaruteqarnersut sanaartornissamik aammalu illersornissamut atortulersuutinik ikkussuinissamut pielrsaaruteqarnersut, pingaartumik amerika avannarliup nunavittaani.

Naalagaaffiup issittortaani Danmarkip illersornissamut suliniutaa eqqarsaatigalugu, Esekias Therkelsen naammagisimaarinnippoq, kisiannili aamma amigaateqarluni:

- Naammagisimaarpara Illersornissaqarfiup Kalaallit Nunaanni sulissutigisaai ataatsimut isigissagaanni, kisianni Kalaallit Nunaata namminersulernissamut suliniutaa eqqarsaatigalugu, tusarusuppara Naalakkersuisut qanoq illersornissaq pillugu pilersaaruteqarnersut. Nalunngilara alloriartoqartartoq, ilaatigut tunngaviusumik ilinniarneq aallartereersoq aammalu Sirius-patruljep suliassaanut peqataasinnaaneq periarfissarsiorneqartut. Kisianni suliassat amerlanerupput, assersuutigalugu Kalaallit Nunaata killeqarfii imaatigut sineriaatigut nakkutiginninneq aammalu suliassat allat Illersornissaqarfiup nunatsinni  ullumikkut ingerlatai eqqarsaatigiinnarlugit. Taamaammat namminersulernissap aqqutaani paasissutissat oqallinnerillu amigaataapput, Therkelsen oqarpoq.

Paasissutissat amigartut apeqqusersuilernermik nassataqartarput

Jørgen Boassenip paasiuminaatsippaa issittumi piginnaasat annertusarneqarnissaanut tunngatillugu suliat sumut killinneqarnersut:

- Paasisinnaanngilara sooq Vivian aamma Troels taama paasissutissanik amigaateqartigisunik saqqummiussinersut,  tassami issittumi piginnaasat annertusarneqarnissaat pillugu isumaqatigiissuteqartoqareerpoq, tassunga atatillugu paaserusunnarpoq suliniutit isumaqatigiissutaareersut sumut killinnersut, Jørgen Boassen oqarpoq nangillunilu:

- Assersuutigalugu dronit eqqarsaatigalugit, dronit suminngaaniit aqunneqassappat, sooq Aalborgimiissappat, qanoq akulikitsigisumik timmisassappat. Tassa assersuutaannaavoq akissutissarserusutaraluannut.

Taamaattorli innersuussutigineqarpoq nutaamik illersornissaq pillugu isumaqatigiissutip iluani immikkoortumik isumaqatigiinniartoqassasoq, suna naatsorsuutigiviuk anguneqassasoq?

- Uanga naatsorsuutigivara iliuutsit Kalaallit Nunaannut toqqaannartumik attuumassuteqartut tamarmik aamma Kalaallit Nunaanniit aqunneqassasut. Assersuutigalugu ujaasisoqassappat utaqqisinnaanngilagut nalunaaquttap akunneri arlallit dronit Danmarkimiit Kalaallit Nunaannut apuunnissaannut. Tassami aarlerinarpoq ajornerpaamik pisoqarsinnaanera, dronip ujaasiartortussap Aalborgimiit Kalaallit Nunaannut apuunniaruusaarnerani. Taamaattumik naatsorsuutigivara erseqqissumik paasitinneqassasugut qanoq pisoqassanersoq, sumi inissisimasussaanersut, dronit atugaalernissaat aallartitsinnagu, Jørgen Boassen oqarpoq.

Jørgen Boassenip Therkelsenitut Issittumi Sakkutooqarfiup Kalaallit Nunaanni sulinerat naammagisimaarpaa, kisianni avataaneersunik imaatigut angalallutik tikittartunik nakkutilliineq aqutsinerlu annertusarneqarnissaat amigaataanerarpai:

- Assersuutigalugu tingerlaasersortut amerlasuut kangerlunnut pulaterlutik nakkutigineqaratik ingerlaartarput, sulerisartunuku? Aatsitassanik tillitaminnik annissuippat imaluunniit isertortumik paasiniaasarnernut atortunik ikkussuippat?, tassa imartarujussuatsinni pingaartumillu kangerlunni nakkutilliineq amigaataasoq misigivunga, Boassen oqarpoq.