OBS: Allaaserisaq illersuisup Julie Stagep oqaaseqaatai ilanngullugit nutartigaavoq.
Illersuisoq peqquserlunneraarnermut suliami ukioq manna eqqartorneqarnerpaami Nunatta Eqqartuussisuuneqarfiani naggataarutaasumik oqaaseqartussanngorpoq.
OBS: Allaaserisaq illersuisup Julie Stagep oqaaseqaatai ilanngullugit nutartigaavoq.
Illersuisoq peqquserlunneraarnermut suliami ukioq manna eqqartorneqarnerpaami Nunatta Eqqartuussisuuneqarfiani naggataarutaasumik oqaaseqartussanngorpoq.
Anders Németh Lars-Emil Johansenip illersuisoraa. Sullitanilu siunnersortitut atorneqarsimanera qularutissaanngitsoq oqapoq.
Atorfinitsitsinermut isumaqatigiissummi suliassat aalajangersimasut allassimannginnerannut pissutissaqarluartoqarsinnaasoq, illersuisoq isumaqarpoq.
- Isumaqatigiissut naatsoq allaffissorujussuaqqaanngikkaluarluni sulinermik aallartitserusunnermik takussutaaginnarpoq, oqarpoq.
Uppernarsaatit nutaat sammigai
Anders Némethilli eqqartuussivimmi illersuisup uppernarsaatit nutaat saqqummiussai sammivai. Eqqartuunneqartut e-mailikkut messengerikkullu allaqatiittarsimanerannut tunngasut.
- Allaqatigiinnerit pinerlunnermut suliamut tunngatillugu eqqartuussuvimmi saqqummiunneqarumaartut takorloorsimanngisaannarsimagaluarparput, oqarpoq.
Lars-Emil Johansenip allakkatigut kommunimi pisortamut sullissinini pillugu paasissutissiisarsimanera aamma takuneqarsinnaavoq.
Unnerluussisoq Kofoeds Skole pillugu ajornartorsiummut eqqartuussivimmi oqaluuserineqarluartumut kukkusumik isiginnittoq, illersuisoq oqarpoq. Sulianik allanik aamma suliaqarsimasoq oqaatigalugu.
Illersuisoq: Unnerluussisup oqaasiisa ilumuunnginnerannut takussutissaq
Anders Némethip ilisimannittut paasissutissanik nutaanik marlunngornermi ualikkut oqaluttuarnerat ilannguppai.
Christina Heilmann Rasmussen aqutsisut allaffiani pisortatut atorfinitsitaanermini pisortap tullia Marie Fleischer atorfinitsitsinermut isumaqatigiissut pillugu oqaloqatigisimallugu oqaluttuarpoq.
- Tamanna unnerluussisup isertuussisoqarsimaneranik unnerluussutaasa eqqunngitsuuneranik ersersitsivoq.
Pisumili ataatsimi unnerluussisoq isumaqatigaa: 78-inik ukiulik Lars-Emil Johansen pisuutinneqassagaluarpat pinerluuteqaqqissappat aatsaat atuutsinneqalissasoq. Eqqartuussisoqarfik Sermersuumi ukiup affaani piumasaqaatitaqanngitsumik pineqaatissinneqarsimasunut inissiisarfimmiittussanngortinneqarnikuuvoq.
Julie Stage: Paasissutissat nutaat uppernarsaataapput
Lars Møller-Sørensenip nassuiaataa uppernarsaatini nutaanit siusinnerusukkullu saqqummiunneqareersunit uppernarsarneqartoq illersuisua Julie Stage isumaqarpoq. Pingaarnertut pineqartut marluk assigiimmik soqutigisaqarput, taamaattumillu illersuinerat imminnut naapertuuppoq.
– Tasiilami suliniummi Kofoeds Skole pillugu attaveqartoqartarsimanerani takusutissaqarluarpoq.
Julie Stagep erseqqissarpaa isumaqatigiissut aamma suliniuteqarnissamut pisussaaffimmik imaqartoq. Allatut oqaatigalugu Kofoeds Skolep pilersinneqannginnera pineqartut pisuussutiginngilaat.
- Lars-Emil Johansenip Tasiilamut tunngatillugu taamaallaat siunnersortitut atorsimanngitsoq uppernarsarneqartoq aamma isumaqarpunga, oqarpoq.
Nuummi ineqarnermut, sanaartornermut attaveqaqatigiinnermullu tunngasut, ilaatigut kommunip Namminersorlutillu Oqartussat aaqqiagiinngissutaannut tunngasut illersuisup eqqaavai.
Messengerikkut attaveqarnerit eqqaagai
Lars-Emil Johansenip kommunimi siunnersortitut Namminersorlutik Oqartussani eqqartuussissuserisoq attaveqarfigisimagaa illersuisup maluginiarpaa. Peqquserluttuliorniartilluni attaveqarfigissallugu eqqumiissaaq.
Julie Stagep aamma oqaatigaa ikinngutigiittut attaveqatigiinnertik, taannalu naapertorlugu suleqatigiinneq aallartimmat Messengerikkut allaqatigiinnerat uppernarsaavoq ikinngutigiinnerat inuttut ikinngutigiinnerusoq.
Inuttut attaveqatigiinneq Julie Stagep aamma eqqaavaa. Taakkua marluk akornanni ikinngutigiittut atassuteqanngitsut Messengerikkut attaveqatigiittarnerisa takutippaat, illersuisoq oqarpoq.
Unnerluussisussaatitaasup "kammalaatersorluni isumaqatigiissusiortoqarneranut" akerliusoq illersuisoq isumaqarpoq.
Stagep aamma unnerluussisoq nalunaarusiortoqarsimaneranik apeqqusiinera isumaqatiginngilaa. Allaqatigiinnerit takussutissaasut taanna isumaqarpoq. Lars-Emil Johansenip isigiarsuttuunera pissutigalugu oqaloqatigiinnikkut nalunaarusiortoqartarsimasoq tikkuarpaa.
Lars Møller-Sørensen pinngitsuutinneqassasoq Julie Stage inerniliivoq. Eqqartuussivik isumaqataanngippat, pinerluuteqaqqittoqassagaluarpat atuutilersinneqaqquaa, oqarpoq. Møller-Sørensen peqqiilliornera tunngavilersuutigaa.
