Illoqarfiit pingaarnersaanni missingersuutit siammasissumik isumaqatigiissutigineqartut

2025-mut missingersuutinut atatillugu suliniutit nutaat makkuupput:

• Meeqqerivinnut akigititat appartinneqassapput
• Ilinniartut bussinut akikinnerusumik akiliisalissapput
• Meeqqat inuusuttullu timersornermut sunngiffimmilu sammisassanut akikitsumik akeqanngitsumilluunniit peqataasinnaalissapput
• Eqqagassalerinermut akigititat appariassapput

- Sulisunik piginnaanngorsaaneq aqqutigalugu angajoqqaat aamma meeqqeriviit pitsaanerulernerat qilanaarutigisinnaavaat, aamma Paamiuni ukioqatigiinngiiaanut meeqqerivimmut nutaamut aningaasanik immikkoortitsisoqarpoq. Meeqqat atuarfiattaaq pingaartinneqarpoq nalerisimaneq aamma immikkut ittunik neqerooruteqarneq ukkataralugu, taamaalillutik meeqqat tamarmik iluatsittumik ingerlanissaminnut periarfissaqarnerulerlutik, isumaqatigiissuteqartut tusagassiorfinnut nalunaaruteqarput.

Inissianik pilersaarut

Nuummi inissamik utaqqisut 2.000-t missaaniinnerat pissutigalugu inissiaatileqatigiiffik lserit A/S suleqatigalugu inissialiortiterneq ukiunut qulinut pilersaarusiorfigineqassaaq. Nutaanik inissialiornissamut ukiumut 50 mio. koruuninik ingerlatseqatigiiffimmut aningaasaliisoqartassalluni, assersuutigalugu utoqqarnut naleqqussakkat inissiat aamma utoqqarnut najugaqaqatigiiffit ukkatarineqassallutik.

- Aammattaaq isumaqatigiissuteqartut isumaqatigiissutigivaat namminneerlutik inissialiortut tapersersorneqarnissaat pingaaruteqartoq. Taamaaliorniarpugullu namminneerlutik inissialiortunut taarsigassarsisitsinissamut ukiumut 50 mio, koruuninik aningaasaliisarnitsigut - ukiuni missingersuusiorfiusuni katillugit 200 mio. koruunit, ilisimatitsissutigineqarpoq.

Inissialiortunut aningaasaliissutit katillugit 450 mio. koruunit sinneqartut ilisimatitsissutigineqarpoq.

Paamiut aamma Tasiilaq

Aningaasanut missingersuummi aamma Paamiuni Tasiilamilu immikkoortortaqarfimmi pisortat annertunerusumik akisussaaffilerneqarput, taakkulu ingerlatsinermut aningaasartuutinut akisussaasuussallutik. Taamaalillutik sumiiffinni sukkanerusumik iliuuseqartoqarsinnaalissalluni.

- Missingersuummi matumani ataatsimut suliniuteqarluni suleqatigiillunilu qanoq angusaqartoqarsinnaasoq takutipparput. Kommunalbestyrelsimi isumaqatigiissutigineqarpoq innuttaasut ulluinnarni pisariaqartitaat pingaarnersiorneqassasut aamma ilutigalugu kommunimi siunissami ineriartornissaq patajaassuserlu qulakkeerneqassalluni. Sapinngisamik innuttaasut aningaasartuutaat minnerpaaffissaaniitsissavagut aamma kommune najugaqarfigiuminartutut ineriartorfittullu patajaallisassallugu, borgmesteri Avaaraq Olsen IA-meersoq tusagassiorfinnut nalunaarummi oqarpoq.

Suliniutit allat

Isumaqatigiissumi allat eqqaaneqarsinnaasut makkuupput:

Oqaluffik: Toqusut timaannik ikuallaasarfiliornerup qanoq akeqarnissaa pillugu misissueqqissaartoqassasoq

Avatangiisit: Nuummi imaanut mingutsitsineq annikillisinniarlugu imukumut maskiinamik saliissuteqalissaaq.

Angallanneq: Angallannermut pilersaarusiornissamut ukiuni tulliuttuni sisamani ukiumut 30 mio. koruunit immikkoortinneqarput. Aqquserngit aaqqissugaanerannik tamatigoortumik pitsaanerulersitsinissamut qulakkeerinnissapput, pisuinnarnut assigisaannullu tunngatillugu pitsaasumik atugassaqartinneqarnissaat qulakkeerneqassaaq, tassani aamma pisortat angallassissutaat ilanngullugit eqqarsaatigineqassapput. Angallannermut pilersaarummi aamma Nuussuarmi sullorsuup allineqarnissaa ilaavoq.

Kultur: Holmikkut llluata Atuakkanut lllunngortinnissaa aamma aningaasaliiffigineqarpoq. Filmiliornermik inuussutissarsiornerup ineriartortinnissaanut piginnaasanik ineriartortitsinissaq aamma aningaasaliiffigineqarpoq.

Isumaqatigiissut tamakkiisoq uani atuarsinnaavat.