INATSISARTUT
Illuatungiliuttut kissaammeqqapput Jensen-illu tunuarnissaanik piumasaqarlutik
Sisamanngorneq apriilip 25-ani illuatungiliuttut ilaat aningaasaqarnermut akileraartarnermullu naalakkersuisumut Erik Jensen (S)-mut tatiginnikkunnaarnermik nittarsaassinissaminnut periarfissamik takupput saqqummiussillutillu. Kisianni naalakkersuisooqatigiit partiivisa naqissuserpaat Naalakkersuisoq tatigitsik taamaammallu pinngitsoortitsinissamik siunnersuuteqarlutik.
Aningaasaqarnermut akileraartarnermullu Naalakkersuisoq, Erik Jensen (S) siullerpaamik Demokraatinit Atassummiillu sisamanngornermi apriilip 25-ani tatiginninnginnermik nittarsaassiffigineqarpoq. - Tatiginnikkunnaarnermik saqqummiussisinnaanermut pisinnaatitaaffeqarput, tamanna ataqqivara tusaatissatillu tigullugu. Kisianni arlaannaatigulluunniit eqqunngitsumik saqqummiussaqarnikuunngilanga, nalunngeqatigiissuseralu aamma sulinerma tungaatigut kiffaanngissuseqarfigaara, oqarpoq.
Assiliisoq: Leiff Josefsen
Inatsisartuni ilaasortaq, Aqqalu C. Jerimiassen (A) sisamanngornermi siunnersuuteqarpoq akitsuuteqatigiikkaat 4-mi nioqqutissat akitsuutaat peerneqassasut, taakku tassaapput chokolade, lakrids aamma nioqqutissat sukkullit allat.
Ukiup aallartinnerani sukkut aamma sirupip akitsuutai peerneqareerput.
Naalakkersuisut Aqqalu C. Jerimiassenip siunnersuutaanut allannguutissatut siunnersuuteqarnerat pissutigisimagunarlugu, illuatungiliuttut ilaat (Demokraatit aamma Atassut) sakkortuumik akerliullutik qisuariarput, tamatumalu malitsigisaanik aningaasaqarnermut akileraartarnermullu naalakkersuisumut, Erik Jensen (S), tatiginninnginnermik taasisoqarnissaanik siunnersuuteqarlutik.
Naalakkersuisut siunnersuutigineqartumut allannguutissatut siunnersuut saqqummiuppaat, taamaaliornerminni innersuussutigalugu akileraartarneq pillugu aaqqissuusseqqinnerup pilersaarusiorneqarnerani qanoq ililluni aamma qaqugukkut akitsuutit pineqartut peerneqassagunik peerneqarnissaat naleqquttuussanersoq.
Akileraartarnermut aaqqissuusseqqinneq Inatsisartuni partiit illuatungiliuttut assigiinngitsunik pissuteqarlutik peqataaffiginiarnagu aalajangernikuupput, taamaalillutik naalakkersuisooqatigiit partiivi Inuit Ataqatigiit aamma Siumut naalakkersuisullu aaqqissuusseqqinneq pillugu isumaqatigiissummik atsiornikuullutik.
Jensen: Qaqugukkulluunniit eqqunngitsumik paasissutissiinikuunngilanga
- Naalakkersuisoq eqqaaneqartoq piffissami sivitsortumi aaliangiisarnermigut tatiginassutsimigut
ernumanaatilimmik saqqummertarsimavoq, arlaleriartumillu paasissutissanik eqqunngitsunik
inuiaqatigiinnut anngussisarsimalluni. Tamanna akuersaaginnarneqarsinnaajunnaarpoq.
Sukkut akitsuutaasa peerneqarnerat pillugu Jensen ima oqarpoq:
- Sukkunut akitsuutit ukiorpaalunni politikikut oqallisigineqarput, Naalakkersuisullu naatsorsuutigaat, akitsuutit atorunnaarsinneqarnerani innuttaasut ulluinnarni inuunerannut pitsaasumik kinguneqassasoq. Taamatut aalajangiineq innuttaasutta ulluinnarni inuunerannik pitsannguinissamut aamma aningaasaqarnikkut periarfissaannik pitsannguinissamut alloriarneruvoq. Tamatumanili aamma niuertarfiit akinik aaqqiinissaat tunngavigineqarpoq.
Paasissutissaq: Naalakkersuisut
Taama oqaaseqarpoq § 52-mut siunnersuutip tunngavilersuutaasa ilaat, tassaavorlu tatiginnikkunnaarnermut siunnersuut, Demokraatinit aamma Atassummit saqqummiunneqartoq.
Taanna naalakkersuisooqatigiit partiivinit Inuit Ataqatigiinnit aamma Siumumit pinngitsoortinneqarpoq, taakkulu erseqqissaatigaat Naalakkersuisuni ilaasortamut Erik Jensenimut (S) tamakkiisumik tatiginnillutik, Naleraq taaseqataanngilaq.
Sermitsiap nittartakkatigut nutaarsiassaqartitsivianit Erik Jensen qinnuigaarput qanga qanorlu illuatungiliuttut naapertorlugit eqqunngitsumik paasissutissiisarsimanersoq:
- Uanga tusagassiorfitsigut, Naalakkersuisut nittartagaatigut aammalu oqaluttarfimmiit eqqunngitsumik paasissutissiinikuunngisaannarpunga. Sulininni unneqqarinneq ammasumillu ingerlatsineq pingaartittuaannarpakka aammalu nalunngeqatiginnissutsikkut ilerasuuteqanngilanga, Erik Jensen (S) oqarpoq.
Peter Olsenip nalorninartumik oqaasiinik aallaavilimmik akuliunneqarneq
Sukkut akitsuutaasa peerneqarnerata nalunaarutigineqarnerata kinguninngua ingerlaannangajak, Inatsisartuni ilaasortaq, Peter Olsen (IA) naalakkersuisut iliuusaat pillugu nalunaaruteqarpoq, tassanilu paasissutissiissutigineqarpoq aamma ullaakkorsiutit akitsuutaat peerneqassasut.
Ulluinnarni nioqqutissanik niuertarfiit akileraartarnermut aqutsisoqarfik tamatuma malitsigisaanik erseqqissaasariaqalersinneqarput, sukkut sirupillu akitsuutaat taamaallaat pineqartoq (nioqqutissaqatigiit 001).
Tamatuma malitsigisaanik Erik Jensen tusagassiorfinnit apersorneqarpoq, tassanilu KNR isummersorpoq, Jensen paatsiveerusimaarnerarlugu.
- Suliamut tunngatillugu paatsiveerusimaarnikuunngilanga. Tusagassiorfiup apersorpaanga, tassanilu nassuiaagaluarpunga akitsuutit pineqartut peerneqarnissaannik aalajangernerup malitsigisaanik kingunissaasut suunersut. Tassami soorunami akitsuutit pillugit eqqussuinermi akitsuutit allattorsimaffianni nioqqutissaqatigiikkaat aalajangersimasut taamanikkut pineqarmata, tassalu nioqqutissat eqqussuinermut akitsuusersukkat immikkoortoq 001-mi allassimasut, Erik Jensen Sermitsiamut oqarpoq.
