Illuatungiliuttut naalakkersuisoqatigiit isornartorsiorpaat: Aningaasanut inatsit akisussaassuseqanngilaq
IA-p Siumullu aningaasanut inatsisissaq kisimiillutik isumaqatigiissutigaat. Amerlanerussuteqartut politikkiat ataqatigiinngilaq aningaasaqarnikkullu paatsiveerusimaarluni, illuatungiliuttut isornartorsiuipput.
Jens-Frederik Nielsenip (D) aningaasaqarnermut naalakkersuisoq partiillu naalakkersuisuusut siunissamut aningaasaqarnikkut sinaakkusersuutaat isumaqatiginngilluinnarpai.
Assi: Leiff Josefsen
Aningaasaqarnermut naalakkersuisup Erik Jensenip (S) aappaagumut aningaasanut inatsisissaq IA-mik Siumumillu isumaqatigiissutigineqartoq ataasinngormat saqqummiuppaa. Siorna isumaqatigiissut siammasissoq assiginagu illuatungiliuttut tamarmik maanna isumaqatigiissummut peqataanngillat.
Aningaasanut inatsisissamut isumaqatigiissuteqartut aningaasaqarnikkut akisussaassuseqannginnerarlugit Demokraatit siulittaasuata Jens-Frederik Nielsenip isornartorsiorpai, ingammik akileraarutinik aaqqissuusseqqinnermut atatillugu.
- Suut tamarmik imminnut atassuteqarput - Naalakkersuisullu Inatsisartut tulliani ataatimiinnissaannut aningaasanik hunnoruju millionikkaanik matussuserneqanngitsunik akiligassiisussanngorput.
Naalakkersuisut sinneqartoorutinik atuinerat sinneqartoortuaannarnissaallu naatsorsuutigaat Demokraatit isoraat.
- Aningaasanik atuinerulerniarluni sanaartornermut aningaasaliissutit ilanngartornerat ajornartorsiuterujussuuvoq. Pissuserisaq torinngilaq, Jens-Frederik Nielsen oqarpoq.
Allatut oqaatigalugu Naalakkersuisut Inatsisartut aningaasaqarnermut ataatsimiititaliaata akuersineratigut kollegialiornermut aningaasartuutinut naatsorsuutiniit peerlugit oqimaaqatigiissitsiniarnerat Demokraatit isornartorsiorpaat.
Jens-Frederik Nielsen naapertorlugu isumaqatigiissutip ilaa naaperiutigineqarsimasinnaagaluarpoq, aningaasalersorneqarnerali pinnagu.
- Taanna kisiat avaqqunneqarsinnaaqqunagu piumasaqaatigaarput, taamaattumillu isumaqatigiissut tapersersorsinnaanatigu, oqarpoq.
Naleraq: Aningaasanut inatsit nuannareqqusaarneruvoq
Naleqqami aamma taamatut oqariartuuteqarput:
- Aningaasanut inatsit tukattorujussuuvoq. Suliarineqarnera aamma taamaappoq, maannalu inernerani tukappoq. Aningaasalersorneqanngitsoq missingersuutillu avaqqunneqarnerisigut aningaasaqarnikkut ataqatigiikkunnaarsimasoq maanna paasinarsivoq.
Suleqateqarusussuseqarneq Naleqqap malugisimanngilaa.
- Amerlanerussuteqartut allat peqataatikkusunngikkaat paasivarput. Aningaasanut inatsit qinersinissaq sioqqullugu nuannareqqusaarutitut assigiinngitsunik isumaqatigiissuteqarfiuvoq, Pele Broberg oqarpoq.
Illuatungiliuttut partiivisa pingajuat, Atassut, naalakkersuisut suliniutaasa ilaannut suli tapersersuivoq. Taamaattorli siunissami akileraartarnermut ineqarnermullu aaqqissuusseqqinnerit isumaqatiginnginnerisa kingunerannik aningaasanut inatsisip tallimanngornermi novembarip 22-ani Inatsisartuni taasissutigineqalerpat Atassut akuerseqataanianngilaq.
- Maannakkut aningaasanut inatsisissaq 2025-imoortoq qitiusumit annertuumik katersuutsitsisussaavoq, allaffissornikkullu pilersitsissasoq takusinnaavarput, aaqqissuuseqqinnerilli annertuut inuiaqatigiinnut akisoorujussuussasut isumaqarpugut, Bentiaraq
Ottosen ilisimatitsivoq.
Aningaasanut inatsisissaq Inatsisartut pilersaarutaasutut tallimanngornermi novembarip 22-ani taasissutigissavaat.
