Illussanik titartaasartutut naammasseqqammersoq Nuummut angerlartoq

Sika W. Filemonsen soraarummeeqqammerpoq, maannalu Nuummut utertussanngorluni, Aarhusimi illussanik titartaasartut ilinniarfianni naammasseqqammersutut illussanik titartaasartutut, illussanik titartaasarnermut aamma illunik kulturikkut kingornussanut paasisimasaminik ilisimasaminillu nassarluni.

– Maanna nutaamik aallartittussanngorpunga. Ilinniakkannik nassataqarlunga Nunatsinnilu illussanik titartaasartut ineriartornissaannut tapersersueqataanissannut piumassuseqarluarlunga Nuummut utertussanngorpunga. Suliffeqarnikkut sumut alloriassanerlunga, upernaap ingerlanerani aalajangerniarpara, pitsaanerpaarli tassaavoq Nuummut angerlaqqinnissara – inuuninni piffissaq pissanganarluinnartoq, Sika W. Filemonsen oqarpoq.

– Nuuk illoqarfigaara, nunarsuarmilu sumiikkaluarumaluunniit illoqarfik taanna maqaasissavara. Danmarkimi ukiuni arlalinni ilinniartuuninni tamanna misigisarsimaqaara.

 Ilinniagassatut takorloortagaq

Sika W. Filemonsen Danmarkimut 2017-imi nuuppoq, Rødding Højskolemi ilinniartunngorluni, tassanilu ilusilersuineq illussanillu titartaaneq ilikkagaqarfigineruniarlugit.

– Ilusilersuinerup silarsuaani sammivissarsiornissara siunertarigakku, aammali ilinnialertinnanga qallunaat kulturiat paasisaqarfiginerulerniarlugu. Taamanikkulli nalunngilara illussanik titartaasartuujumallunga. Pinngorartitsisinnaajuaannarpunga ajornartorsiutinullu aaqqiiumassuseqartarlunga, højskolemilu ilinniarninni uppernarsarneqarluni piginnaasat tamakkua illussanik titartaasartutut ilinniagaqarnermi pingaaruteqartut. Aarhusimi Arkitektskolimut qinnuteqarsinnaanissannut pingaarutilinnik sakkussaqalerpunga, akuerineqarnissamullu misilitsinnernut angusigama, tassanngaannarlu ilinniagassatut takorloortakkanni ilinniarnissara aallartippara.

Norgemi ilinniartunik peqateqarneq

Sika W. Filemonsenip Danmarkimi ilinniartuunini assigiinngitsorpassuarnik paasisaqarfigaa.

– Nunarsuarmi Nunatta avataaniittunik isumassarsitinneqarlunga paasisaqarpunga. Tamatumunnga peqatigitillugu nammineq tunuliaqutara aamma Nunatsinneersutut unammillernartut paasilluarnerulerpakka. Ilinniarnera nuannerluinnaraluartoq ilaquttannit ikinngutinnillu ungasissumiinneq allanngornerujussuartut isigaara. Angerlarserneq ulluinnarsiutaalerpoq, ilinniartullu akornanni Norgemiunik ataatsimoorfissarsivunga, nunamit angerlarsimaffitsinnit ungasissumiinnitsinnik misigisatsinnik avitseqatigiittarluta.

Issittumi illulioriaatsit

Issittumi illulioriaatsit soqutigisorujussuuai, Sika W. Filemonsenilu ilaatigut Nunatsinni illunik eqqissisimatitanik suliaqarsimavoq.

– Ilinniarninni Titartaasarfimmi TNT Nuummi suliffimmik misiliigama, kingornalu Nunatta Katersugaasiviani Allagaateqarfianilu ilinniartutut ikiortitut sulillunga, tassanilu nuna tamakkerlugu illut eqqissisimatitat suliarisarpakka. Illussanik titartaasartut suliaat assigiinngitsut marluk, taakkuli tamarmik suliassanut pingaaruteqarlutik, tamannalu iluaqutigalugu suliani pingaarutilinnik paasisaqarpunga.

– Bachelorinngorniarninni piujuartitsineq immikkut sammivara, tassanilu atortussat atorneqartarnerat aamma sanaartorneq illussanillu titartaaneq ataatsimut isigalugit qanoq isigineqartarnerat – piffissamut, atuinermut inuiaqatigiinnullu tunngatillugu – ilinniarpakka. Kandidatinngorniarninni sanaartornermi kulturikkut kingornussat sammivakka, sanaartukkat eqqissisimatitat tammatsaalineqartariaqartullu pingaarnerutillugit, taamaalillunga tamakkununnga tunngasut itinerusumik paasisaqarfigivakka-

– Ilinniarnermali nalaani Nunatsinni Issittumilu illussanik titartaasarnermut tunngasut amigaatigaakka. Ilinniarnermami nalaani suliassiissutit amerlanersaat qallunaat illussanik titartaasarnerannut tunngassuteqarput, taamaattumik soraarummeerutissannik nammineq suliassinneqarama, kalaallit illussanik titartaasarnerannut tunngasunik misissuinissara suliarerusullugu nalunngilara.