Ilulissani mittarfissuassap illutaa tunniunneqartoq
Ilulissani mittarfiliornerup immikkoortua tulleq maanna aallartippoq.
Ilulissani mittarfimmi illut piareerput.
Assi: Greenland Airports
KJ Greenland A/S-ip Ilulissani mittarfiup illutaa Greenland Airportsimut tallimanngornermi oktobarip 31-ani tunniuppaa.
Taamaalilluni Ilulissani mittarfiliornermi alloriaateqartoqaqqippoq, taannalu aappaagu nunanit tamalaanit mittarfissuassap ammarnissaa naatsorsuutigineqarpoq.
Greenland Airports Facebookimi quppernermini allappoq.
- Ulloq alianaatsorujussuuvoq Ilulissat seqinnerluni, tassanilu mittarfissami illutassat nutaat pisortatigoortumik tigusinnaalerlutigu, anguniakkat ilaat annertooq pingaaruteqartorlu!
Tamannali suliap naammassisimaneranik isumaqanngilaq. 2026-mi ukiakkut ammaanissaq sioqqullugu suliassarpassuit maanna tullinnguupput.
Illut iluarsaannerat, sannaviup biilinillu uninngaviup piareersarneqarnerat, pinnguartarfiliorneq aamma upalungaarsimanermut isumannaallisaanermullu tunngasunik ilinniartitsineq ilaatigut taakkununnga ilaapput.
Ilulissani mittarfik 2200 meterisut takissusilik naammassisoq Munck Gruppenip Oktobarip qiteqqunnerani nalunaarutigaa.
