KL

DK

Immikkoortortap nutaap avammut nioqquteqarnissaq misissussavaa

NunaGreen nutaanik marlunnik immikkoortortaqalerpoq. Ataavartumik nukissiuuteqarnerup avammullu nioqquteqarsinnaanermik suliniutit piviusunngortinnissaat immikkoortortap aappaata suliarissavaa, aappaatalu Aasiaat Qasigiannguillu erngup nukinganik innaallagissiorfeqalernissaat sulissutigissallugu.

Nunagreenip suliassaasa annersaasa ilagaat Utoqqarmiut Kangerluarsunnguanni erngup nukinganik nukissiorfiup allilerneqarnissaa. Suliffeqarfik maanna marlunnik nutaanik immikkoortortaqarfeqalerpoq.
Thomas Munk Veirum
Tusagassiortoq
Saqqummersinneqarpoq

NunaGreen Namminersorlutik Oqartussanit pigineqartoq marlunnik immikkoortortaqarfittaarpoq: NunaGreen Construction Disko Bay A/S aamma NunaGreen Development A/S.

Ingerlatseqatigiiffik tusagassiuutinut taama nalunaarpoq.

NunoGreen Construction Disko Bay-ip, soorlu taaguutaani takuneqarsinnaasunut, erngup nukinganik innaallagissiorfimmik nutaamik Aasiannut Qaasianguinullu pilersuisussamik sanaartorneq pingaarnertut suliassaraa:

- NunaGreen Construction Disko Bay A/S-ip pilersinneqarnerani, immikkoortortaq suliassami tassani siunnerfilimmik sunniuteqarluartumillu suliniuteqarnissamik qulakkeerinnissinnaasoq pilersipparput.

Transmissionslinjer 100 kilometerit sinnerlugit

- Erngup nukinganik innaallagissiorfiup Aasianni Qasigiannguanilu pisariaqartitsineq naammassiinnartussaanngilaa, kisianni Kalaallit Nunaata piujuartussamik nukissiornermut allanngoriartortitsinerani anguniakkat killiffiattut pingaaruteqartutut aamma atorneqartussaalluni, NunaGreenimi pisortaaneq Aviaaja Karlshøj Knudsen oqarpoq.

"Utoqqarmiut Kangerluarsunnguannut piukkunnartussarsiuussinerup iluatsilluartumik aallartereernerani" NunaGreen A/S-ip maannakkut Qeqertarsuup Tunuani erngup nukinganik suliassaq ingerlateqqilerpaa aamma paasissutissiissutigineqarpoq.

Qeqertarsuup tunuani suliniummi  innaallagissamik pilersuinermi aqqusersuutinik 100 kilometerit sinnerlugit takissusilinnik pilersitsinissaq suliniummi ilaasoq aamma paasissutissiissutigineqarpoq. Avatangiisinut Sunniutaasussanik Nalilersuinermit nalunaarusiaq tusarniaassutigineqartussaassaaq, 2025-llu ingerlanerani innuttaasunik ataatsimiititsisoqartussaassalluni.

Nukissamik avammut nioqquteqarnissamut periarfissat misissorneqassasut

NunaGreen Developmentip ataavartumik nukissiornerup ineriartortinneqarnissaanik sulniutit ineriartortissavaat Nunagreen paasissutissiivoq:

- NunaGreen Development A/S-imi Kalaallit Nunaanni avataanilu mingutsitsinngitsumut allanngoriartortitsinerup siuarsarnissaa pillugu anguniagaqarnerput sukkatsiteqqissinnaavarput

- Ingerlatseqatigiiffik suliniutissanik nutaanik pilersitseqataaginnassanngilaq, kisianni aamma nunatsinni nunanilu tamalaani suliaqartuusut suleqatigalugit ineriartortitsinissamik qulakkeerissalluni, Aviaaja Karlshøj Knudsen oqarpoq.

Immikkoortortap nutaap nunaqarfinnut illoqarfinnullu mingutsitsinngitsunik nukissiuuteqarneq kisiat suliarinagu avammut nioqquteqarsinnaanermi periarfissat misissuiffigissagaat NunaGreen paasissutissiivoq.

inuiaqatigiit grønland bæredygtig energi aviaaja karlshøj knudsen nunagreen vandkraftværk samfund

ATORFIIT Se alle jobs

Powered by Labrador CMS