Imminut toquttarnerup pinaveersaartinnissaanut Kujataani pikkorissartitsineq neriuuteqalersitsillunilu iliuuseqalersitsivoq
Imminut toquttoqartarnerata pinaveersaartinnissaa Kujataani ukkatarineqarpoq. Kujataani innuttaasut sullissisullu filmit, pikkorissaanerit workshoppillu aqqutigalugit ataatsimoorput, tamannalu eqqarsalersitsivoq iliuuseqarnissamullu periarfissanik nutaanik pilersitsilluni.
Foto: Trine Juncher
Kommune Kujallermi pitsaaliuinermik immikkoortortaqarfik, Nuka Konsulent, Anima Films innuttaasullu qanimut suleqatigalugit suliniummik ingerlatsipput.
Piviusulersaarut Life On The Edge sammineqarpoq. Siunnersuisartup saqqummiisartullu Aqissiap piviusut inuppassuit nipangiutiinnartagaat oqaasinngorlugillu assit atorlugit saqqummiivoq.
Filminik takutitsineq, sullissisunik pikkorissaanerit, inuusuttunut inersimasunullu workshoppertitsinerit aqqutigalugit peqataasut imminut toqunnissap pinaveersaartinnissaanut oqaloqatiginnissinnaanermik iliuuseqarnissamullu iluaqutigisinnaasaminnik sakkussanik tunineqarput.
Suliniummi inuusuttut inersimasullu akornanni imminut toquttarneq pillugu ilisimasaqarnerulernissaq pingaarnertut siunertaasoq Kommune Kujalleq tusagassiuutinut nalunaarummi allappoq. Paqumisuttarneq qaangerniarlugu peqataasullu atugarliortumik naapitsissagaluarunik iliuuseqarnissamut sakkussaannik tigussaasunik peqalernissaat siunertarineqarpoq.
Illoqarfinni pingasuni filminik takutitsineq aqqutigalugu tamanna pivoq. Aammattaaq sullissisunik pikkorissartitsisoqarpoq, pisumi qanoq qisuariarsinnaanermut aammalu pisoqartinnagu qanoq pinaveersaartitsisinnaaneq pikkorissaatigineqarluni. Inuusuttut inersimasullu imminut naleqartinneq, imminut tatigineq neriuutillu pillugit aamma pikkorissartinneqarput.
