Politiimut pinngitsaaliisimasutut unnerluussut eqqartuussisuuneqarfimmi suliarineqartoq
Peqatigiiffimmi suleqataasimasumut politiitullu atorfeqarsimasumut Nunatta Eqqartuussisuuneqarfiani eqqartuussinermi ilisimannittoq kingulleq tusarneqarsimalerpoq. Angutip niviarsiaqqanut pingasunut pinngitsaaliisimasutut allatigullu kannguttaatsuliorsimasutut Eqqartuussisoqarfik Sermersuumi pineqaatissinneqarnini suliareqqitassanngortippaa. Suliaq marlunngornermi nanginneqassasoq.
Politiiusimasumut suliaq Nunatta Eqqartuussisuuneqarfiani ulluni arfinilinni suliarineqartussanngorlugu missingerneqarpoq.
Assi toqqorsivimmit: Morten Okkels
Politii niviarsiaqqanik marlunnik pinngitsaaliisimasutut, arlaleriarluni kannguttaatsuliorsimasutut pingajuannullu isumapiloqarluni tatiginnilersitsiniaasimasunut eqqartuunneqarnera Sermitsiamit marsimi allaaseraarput. Niviarsiaqqat 13-it 15-illu akornanni ukioqarput.
Angut ukiut arfineq-aappaat avillugu Eqqartuussisoqarfik Sermersuumi pineqaatissinneqarsimasunut inissiisarfimmiittussassanngortinneqarpoq. Angutip eqqartuussut Nunatta Eqqartuussisuuneqarfianut suliareqqitassanngortippaa. Tamatuma saniatigut unnerluussisussaatitaasoq aamma suliareqqitassanngortitsivoq. Eqqartuussut sakkortunerulissasoq taassuma piumasaqaatigaa.
Suliaq Nunatta Eqqartuussisuuneqarfiani sapaatit akunnerata siuliani aallartinneqarpoq, ilisimannittullu kingulliit ataasinngornermi killisiorneqarput.
Matut ammasut matoqqasullu
Niviarsiaraq, Eqqartuussisoqarfik Sermersooq malillugu, angutip isumapiloqarluni tatiginnilersinniarsimasaa ataasinngornermi ullaap tungaani oqaluttuartinneqarpoq. Angut unnerluussummut allanullu pisuunnginnerarpoq.
Suliaq salliutitaq
Eqqartuussivinni suliat sivisuumik suliarineqartarnerat Sermitsiap qanittukkut sammivaa. Sulialli ilaat sukkanerusumik suliarineqarsinnaasarnerannut una takussutissaavoq.
2024-mi ukiakkut politiinut nalunaarutiginninnermit, Eqqartuussisoqarfik Sermersuumi Nunattalu eqqartuussisuuneqarfiani suliarineqareerpat, ukioq ataasiunngitsorluunniit suliaq naammassineqassaaq.
Suliap salliunneqarnera tamatumunnga pissuteqartoq nassuiaatigineqarpoq.
Suliap salliunneqarsinnaanera assigiinngitsunik pissuteqarsinnaavoq. Imaassinnaavoq unnerluutigineqartoq eqqartuunneqarnissani sioqqullugu tigummigallarneqarmat pisariaqartumit sivisunerusumik utaqqinnginnissaa pineqartoq.
Suliap salliunneqarneranut pissutaasinnaasoq alla tassaavoq meeqqanik ingasattumik kannguttaatsuliorsimasutut unnerluussineq.
Politiiusimasumut suliami taakku tamarmik atuupput, taamaattumillu eqqartuussiveqarfimmit pingaarnersiorneqarnissaa pissusissamisuuginnarpoq.
Grooming tassaavoq kinguaassiuutitigut innarliinissaq siunertaralugu meeqqamik inuusuttumilluunniit tatiginnilersitsiniaaneq.
- Snapchat aqqutigalugu angummit inersimasumit ikinngutigilerneqarnera tupaallaatigaara. Politiiummalli tatigalugu, Niviarsiaraq oqarpoq.
Taamani 14-inik ukioqarpoq, niviarsiaqqallu allat assigalugit angut taanna sammisamut aalajangersimasumut atatillugu, tassa peqatigiiffimmi suliniuteqartumut, attaveqarfigisarpaa.
Pinngitsaaliisoqarneranut suliami pineqartup allap ilisimannittup immiunneqarnera eqqartuussivimmi aamma takutinneqarpoq. Taassuma oqaluttuartinneqarneranit immiussap takutinneqarnera matoqqasumik ingerlanneqarpoq.
Marlunngornermi nanginneqassasoq
Politiiusimasup niviarsiaqqat pinngitsaalisimanagit namminnerlu piumasimasut suliaq Eqqartuussisoqarfik Sermersuumi suliarineqarmat oqarpoq.
Inersimasulli 22-t sinnerlugit ukiullit 15-it inorlugit ukiulimmik atoqateqarsimasut pinngitsaaliisutut eqqartuunneqarsinnaapput. Inatsit 2023-mi allanngortinneqarmat tamanna periarfissaalernikuuvoq.
Nunatta Eqqartuussisuuneqarfiani suliaq ataasinngornermi ualikkut nanginneqarpoq, uppernarsaatit kingulliit inissinneqarnissaat ilanngullugu. Allaqatigiinnermit takussutissat tassani saqqummiunneqassapput.
Unnerluussisoq illersuisorlu marlunngornermi inaarutaasumik oqaaseqassapput, ilimagaarpullu eqqartuussut marlunngornermi saqqummiunneqassasoq.
