Inatsisartunut qinersinissaq qanillivoq: Inuiattut kinaassuseq nunattalu siunissaa ukkatarineqassasut

Inatsisartunut qinersisoqalerpat suut qineqqusaarnermi oqallisigineqassappat?

- Oqallinneq aallartereerpoq, Naja Paulsen, Ilisimatusarfimmi tusagassiornermik immikkoortortami pisortaasimasoq naliliivoq.

Taassuma nalilerpaattaaq inuiattut kinaassuseq, USA-mut Danmarkimullu tunngasut kiisalu nunatta siunissaa annerusumik oqallisigineqarumaartut.

USA-miit oqaariartuutigineqartut inuiannut toqqissisimatitsinngillat. Taamaattumik inuiattut kinaassusermik illersuerusussuseq aatsaat taamak sakkortutigaaq, tamannalu qinersinissamut ukkatarineqassangatippaa.

Kingullermik qinersisoqarmat Kuannersuit, mittarfittaassat aalisarnerlu ukkatarineqarput. Maannali inuiaat qanoq ingerlaqqissanerat ukkatarneqarnissaa pinngitsoorneqarsinnaanngilaq.

- Oqallinneq aallartereerpoq, Naja Paulsen oqarpoq nangillunilu:

- Kisianni pissanganartua uaniippoq kikkut isumatusaarnerullutik piviusorsiornerullutik inuiaassutitsinnik killiffipput eqqartorsinnaavaat, angusaqarniarfigalugulu.

Naalakkersuisut siulittaasuata piffissaq eqqortoq utaqqivaa

Naalakkersuisut siulittaasuata, Mùte B. Egede ullumik qinersivissamik siunnersuuteqartussaavoq.

Isumatusaarnissaq taassuma pingaartinnerarpaa:

-  Tassa soorunami pissutsit kingulliit aallaavigisaanik isumatusaarnissaq, uivinnginnissaq aammalu atatasimoornissaq pisariaqarluinnarput.

- Taamaammallu ataatsimoortariaqarnerup uivernaveersaarnissap aamma isumatusaarnissap nalaani qinersinissap pisussaanera soorunami ulluliiniarnermi inissiinissamik uanni aamma nalilersuutini annertuumik inissisimatitsivoq, Naalakkersuisut Siulittaasuat oqarpoq.

Inatsisartut februaarip ulluisa pingajuanni nalunaaqutaq 10.00 immikkut ataatsimiissapput

Inatsisartunut qinersinissaq kingusinnerpaamik apriilip arferngani pissaaq.