Inatsisartut ataatsimiinnerat aallarteqqippoq: Kuno Fencker ilaasortaaginnassaaq
Kuno Fenckerip USA-mut angalanermini politikkerinik ataatsimeeqateqarnera sunniuteqangaarsimagaluartoq Inatsisartuni ilaasortaanera ingerlaqqippoq.
Inatsisartut ataatsimiinnerisa ammaanersiornissaanut Kuno Fencker politikerini siulliit ilaanniilluni takkuppoq.
Morten Okkels
Siumumi Naalakkersuisunut ilaasortat marluk Inatsisartuni sulinngiffeqarnertik atorunnaarsinniarlugu isumaliutersuutigigaat taamaalillutillu Kuno Fencker (S) USA-mut angalanerata akerleriissutaanerata kingunerisaanik sulinngiffeqarunnaarsinniarlugu Sermitsiap sapaatip-kunnerata siuliani paasivaa.
Inatsisartut ataasinngornermi ataatsimiinnerat aallartippoq, isumaliutersuutillu aalajangiiffigineqarsimarpasipput. Siumup Naalakkersuisunut ilaasortaatitaasa arlaannaalluunniit ataasinngornermi februaarip pingajuani sulinngiffeqarnertik atorunnaarsinngilaat, taamaattumik Kuno Fencker sinniisussatut aggersarneqarnini pissutigalugu Inatsisartuni ilaasortaaginnassalluni.
Kuno Fenckerip USA-mut qanittukkut angalanera arlalinnit isornartorsiorneqarpoq, tassami USA-mi præsidenti Donald Trump Kalaallit Nunaata oqartussaaffigilernissaanik kissaateqarnerminik arlaleriarluni oqaaseqartareersoq Naalakkersuisut ataatsimoornissamik kaammattuutaannut malinninngitsutut isigineqarami.
Nammineq pingaartitaq malillugu iliornissamut kiffaanngissuseqarneq
Fenckerip USA-mut angalanini arlaleriarluni nassuiarpaa. Sapaatip-akunnerani kingullermi Sermitsiamit apersorneqarnermini erseqqissarpaa USA-mut tikeraarnermini suna ajortuunersoq takusinnaanagu, Inatsisartunut ilaasortaq nammineq isumani naapertorlugu iliuuseqarsinnaatitaammat, aamma ajornartorsiortoqartillugu.
- Naalakkersuisunut ilaasortaanngilanga, aap, parteerput Naalakkersuisunut ilaasortaatitaqarpoq, kisianni inuttut periarfissaqarpunga nammineq pingaartitakka malillugit, sulininnilu arlaannaatigulluunniit partiitta politikkia unioqqutinngilara.
- Uteqqiinnassavara, angalanera nammineq akilerpara aamma akisuvoq. Aamma uteqqissavara, partiitta politikkia unioqqutinnagu iliuuseqarnikuunngilanga, Kuno Fencker sapaatip-akunnerani kingullermi oqarpoq.
Siumup siulittaasua Erik Jensen pisumut atatillugu qanoq oqaaseqarusunnersoq aperaarput. Inatsisartuni sulinngiffeqarnermut tunngatillugu allanngortoqassanngitsoq oqaatigaa allamillu ilassutissaqannginnerarluni.
