PAUL WATSON-IP PISIMASA
Inatsiseqarnermut ministeria aalajangiisoqarnissaanut piareerpoq
Aalajangiiffissaq piffissanngorpoq arfernik illersuiniamut Paul Watsonimut. Inatsiseqarnermut ministeriaqarfiup Sermitsiamut paasissutissiissutigaa, paasissutissat kingulliit maanna tiguneqarsimasut aammalu tunniunneqassanersoq pillugu aalajangiinissaq qanillisoq.
Paul Watsonip juulip 21-ani 2024-mi tigusarineqarsimaneraniit, Inatsisinik atuutsitsinermut ministeri Peter Hummelgaard suliamut tunngatillugu folketingimi ataatsimiinnernik arlalinnik peqataanikuuvoq apeqqutinillu amerlasuunik akissuteqartarluni. Tasssuma aalajangiusimavaa aalajangerneq "inatsisitigut naliliinermik tunngaveqassasoq, tunniussinissamullu piumasaqaatit naammassineqarsimanersut, aammalu tunniussisoqassappat Europami inuit pisinnaatitaaffiinik isumaqatigiissummi, pingaartumik artikel 3-mi, tunngaviusumik pisinnaatitaaffinnut naapertuunnersoq."
Assiliisoq: Lars Svankjaer
ARTIKEL 3 EUROPAMI INUIT PISINNAATITAAFFINIK ISUMAQATIGIISSUMMI ARTIKEL 3
Naalliutsitsinermik inerteqquteqarneq
Kinaluunniit inuk naalliutsinneqartussaanngilaq aamma inuppalaanngitsumik pineqassanngilaq kiisalu nikanarsagaalluni pineqassanngilaq pilaagaassananilu.
Paul Watsonimik, hvalaktivistimik, tunniussisoqassanersoq pillugu suliaq qaammatini kingullerni tallimani ingerlasimasoq maanna naammassineqarnissaanut piffissaq takkukkaluttuarpoq. Suliap ingerlanneqarnera tamaat pineqartoq Nuummi pineqaatissinneqarsimasunut inissiisarfimmi parnaarussaaqqavoq.
Maannali piffissaq apeqqutaaginalerpoq aalajangiisoqarnissaanut. Inatsisinik atuutsitsinermut ministeriaqarfimmit Sermitsiamut ilisimatitsissutigineqarpoq Japanimi oqartussaasunit paasissutissat kingulliit maanna tiguneqarsimasut:
- Inatsisinik atuutsitsinermut ministeriaqarfik suliamik ingerlatsinermut atatillugu Japanimi oqartussaasunut paasissutissanik amerlanerusunik piumasaqarsimavoq. Taakkua maanna Justitsministereqarfimmit tiguneqarsimapput, ministereqarfiullu naatsorsuutigaa piffissap sivikitsuo iluani aalajangiisoqassasoq, Justitsministereqarfik uppernarsaavoq, nangillunilu:
- Suliap ingerlasimanera naatsorsuutigineqartumit sivisuneruvoq, ministereqarfiullu suliap tamanut soqutiginaateqarnera eqqarsaatigalugu aalajangiisoqareerpat tusagassiorfinnut nalunaarummik saqqummiussinissaq naatsorsuutigaa.
Ilanngulliugu inatsisit atuutsinneqarnerannut ministeriaqarfik naqissusiivoq suliap aalajangiiffigineqarnera eqqartuussivimmut ingerlateqqinneqarsinnaasoq, tunniussisoqarnissaanik aalajangiisoqassappat.
