Inatsissatut siunnersuut: Pisortat inissiaatiminnik piginnittuujunnaarniartut - ima iliussapput
Inissianut tuniniaanermut allannguuteqarujussuartussat inatsisissatut siunnersuutit sisamat Naalakkersuisut tusarniutigaat. Allannguinikkut pisortat inissiaataat ikilisinneqassapput.
Inatsissatut siunnersuutit Naalakkersuisut kommunalbestyrelsiluunniit namminneq pisortat inissiaataannik inissiatut pigisatut imaluunniit piginneqatigiilluni inissiatut aalajangiisinnaanngortissavai.
Leiff Josefsen
Pisortat inissiaataat ikilisarniarlugit innuttaasullu amerlanerusut namminneq inissiaateqarnissaannik ikiorniarlugit Naalakkersuisut kissaateqarput.
Inatsisit atuuttut naapertorlugit attartortup inissiaq attartorsimasani nammineq inigilersinnaanissaanut Naalakkersuisunut kommunalbestyrelsimullu qinnuteqarsinnaasarpoq. Malittarisassat taakku allanngussanngillat.
Nammineq piumassutsimik
Naalakkersuisut kommunalbestyrelsillu inissiat attartortittakkat pioreersut piginneqatigiilluni inissiatut imaluunniit inissianut nammineq pigisanut - namminneerlutik allanngortinnissaannut - piginnaatinneqalersinnaanerat nutaartaavoq.
Maannakkut attartortut attartornerminnit piginnittunngornissamut tatineqarnissamik ernumassutissaqanngillat. Tassa inissiamik piginnittunngornissat kissaatigineqanngippat attartorneq allanngortinneqarani ingerlaannaassaaq.
Siunnersuutit sisamat qitiusut, Naalakkersuisut tusarniaanermut nittartagaannut ilineqarsimasut, pingaarnersaat uani takusinnaavatit. Inatsisissatut siunnersuutinut ataasiakkaanut iserfissat tassaniipput, taamaalilluni malittarisassat nutaat sukumiisumik atuarneqarsinnaallutik:
Inissiat attartortittakkat piginneqatigiilluni inissianut allanngortinnerat
- Naalakkersuisut kommunalbestyrelsillu inissiat attartortittakkat pioreersut piginneqatigiilluni inissiatut allanngortinnissaannut piginnaatinneqarput, matumani attartortunit pioreersunit isumaqataasoqarnissaa piumasarinngikkaluarlugu.
- Allanngortitsisoqarnerani Naalakkersuisut kommunalbestyrelsilu piginneqatigiilluni inissiat attartoreersunut iliuuseqarlutik tunisisarnissaannut, inoqanngitsoqartillugulu piginneqatigiilluni inissiaatillit peqatigiiffiat aqqutigalugu tunisisarnissamut, pisussaaffeqarput. Attartortooreersut piginneqatigiilluni inissiami allanngortinneqartumi najugaqaannarnissamut pisinnaatitaaffeqarput.
- Naalakkersuisut kommunalbestyrelsillu piginneqatigiilluni inissiat pillugit Inatsisartut inatsisaanni killiliunneqartut atuuttut iluanni inissiat attartortittakkat pisiarinissaannut piginneqatigiilluni inissiaatillit peqatigiiffiannut taarsigassarsisitsisinnaanissaat siunnersuutigineqarpoq. Pisinermi inerniliunneqartoq tamatuma saniatigut nammineerluni aningaasaliinikkut aningaaserivimmiluunniit imaluunniit taarsigassarsisitsisarfimmi taarsigassarsinikkut aningaasalersorneqartariaqarpoq.
- Piginneqatigiilluni inissianik inoqanngitsunik tuniniaanerup akuttoqatigiissillugu pisarnissaa anguniarneqartariaqarpoq, matumani inissianut nammineq pigisanut neqeroornerit piumanerillu akornanni sapinngisamik pigiinnarnissaat anguniarlugu.
Siunnersuut pillugu sukumiinerusumik atuarit – una tooruk
Inissiat attartortittakkat inissiatut nammineq pigisatut allanngortinnerat
- Naalakkersuisut imaluunniit kommunalbestyrelsip namminneq suliniuteqarnerisigut pisortat inissiaataasa attartortittakkat inissiatut nammineq pigisatut allanngortinnissaannut aalajangiisinnaanngortillugit periarfissaannik aalajangersakkamik ilanngussisoqarpoq. Inissiat nammineq pigisatut allanngortinneqartut tamatuma kingorna attartortooreersunut tunineqarnissaannut neqeroorutigineqassapput. Attartortup inissiaq attartukkani pisiarerusussanngippagu, attartornermi atukkat allanngortinneqaratik ingerlaannassapput. Inissiaq nammineq pigisaq inigineqarunnaaraangat inissiaq nammineq pigisassatut tamanut ammasumik tuniniarneqartassaaq.
- Pisortat inissiaataasa tuniniarnerinik aallaavittut niuerfinni naligitinneqartut naleqqataannik akilersillugit tuniniarneqartassasut aalajangertoqarpoq. Inissiaq tamarmiusoq kvadratmeterimut minnerpaamik 7.000 kr.-mut akeqartinneqartassasoq aalajangertoqarpoq. Akip akikinnerpaaffissaanik aalajangersaanermi illoqarfiit anginerusut avataanni inissianik nammineq pigisanik allanngortitsineq inissiat nammineq pigisat piviusumik pisiarinerini akikinnerusumik akeqarsinnaasarneri pingaartinneqarput.
- Attartortup ukiunik attartorsimanera aallaavigalugu tunisinermi akimik maannakkut akikillisaaneq nalinginnaasumik procentinngorlugu akikillisaassutigineqartassaaq. Maannakkut attartortumut tunisinermi aki 20 %-imik akikilliliisoqartassasoq siunnersuutigineqarpoq. Inoqarfinni illuummik qularnaveeqqusiilluni taarsigassarsiamik pissarsiffiusinnaanngitsuni pisinermi aki 30 %-imik akikillineqartassaaq.
- Inoqarfinni aningaaserivinnit attartortitsiviusinnaanngitsuni pisortanit attartornissamut periarfissalinni tunisinermi akip 50 %-ia angullugu attartorsinnaaneq aalajangersakkamik atuutilersitsisoqarpoq. Taamaalilluni pisineq akit nikingassutaannut qularnaveeqqusiissutai 30 %-imik, pisortat attartortittagaat 50 %-imik aamma aningaaseriviup attartortitai 20 %-it atorlugit aningaasalersorneqarsinnaavoq. Taarsigassarsiat ukiuni qulini ernialersorneqaratillu taarsiissutitaqassanngillat tamatumalu kingorna ukiut 20-t ingerlaneranni ukiumut assigiiaartumik taarsigassarsiatut akilersorneqassapput.
Aammattaaq inuusuttunut 30-t tungaannut ukiulinnut inissiamik pisinissaanut periarfissat pitsanngorsarneqarput. Aammattaaq taarsigassarsiat allanngortinnissaannut, pingaarnersiuinermut, piffissaq sioqqullugu akiliinermut, piginnittut nikinnerinut akiliummut aamma pisortani qularnaveeqqusiussaqarluni taarsigassarsinermi allagartaliisarnernut malittarisassat allanngortinneqarput.
Siunnersuut pillugu sukumiinerusumik atuarit – una tooruk
- Tapersiissutitalimmik inissialiortiternermut taarsigassarsititsisarnerup allanngortinneqarnera
- Inissiaq Inissianut tapiissuteqartarnermut taarsigassarsisarneq pillugu Inatsisartut inatsisaat naapertorlugu taarsigassarsiat atorlugit tunniunneqartut taamaallaat piginnittumit taassumalu inoqutigiivinit imaluunniit pisariaqarsimappat attartortumit atorneqarsinnaanera erseqqissarneqarpoq. Inissiamik piginnittoq imaluunniit attartortoqarsimappat taassuma inissiamiit inuussutissarsiummik namminersortumik mikinerusumik ingerlatsiuaannarsinnaassapput.
Siunnersuut pillugu sukumiinerusumik atuarit – una tooruk
- Illuliortiternernut aningaasalersuisarnerup allanngortinneqarnera
- Allannguutissatut siunnersuut ataatsimut isigalugu innuttaasut aaqqissuussinermut periarfissaannik isersinnaanerannullu pitsanngorsaataassaaq, inatsisissatut siunnersuutit oqaaseqaataani paasissutissiissutigineqarpoq.
Siunnersuut pillugu sukumiinerusumik atuarit – una tooruk
Inatsisissatut siunnersuutinut sisamat tusarniaanernut killigititat septembarip qulingiluaata 16-iatalu akornanni ulloqarput.
