Inatsit nutaaq aqqutigalugu malersuisarnerit kinaassutsimillu atornerluinerit akiorneqassapput
Kalaallit Nunaanni malersuisunut eqqartuussivikkoorlugu iliuuseqarsinnaaneq ajornannginnerulersinniarlugu Naalakkersuisut Danmarkimilu inatsisinik atortitsinermut ministerip pinerluttulerinermut inatsit allanngortinniarpaat.
Malersugaasimasut malersuisup pineqaatissinneqarsimasunut inissiisarfimmit aninera pillugu inatsimmi nutaami ilaatigut paasitinneqarsinnaalissapput.
Assiliisoq: Leiff Josefsen
Inuit malersuisut pillarneqarsinnaanissaannut inatsisitigut tunngavissat amigaataasut Naalakkersuisut isumaqarput. Taamaattumik pinerluttulerinermut inatsimmi malersuisut pillarneqarsinnaanissaat siunertaralugu immiikkoortortaqalissaaq.
Inatsisinik atortitsinermut ministeri Peter Hummelgaard (S) allannguinissaq isumaqatigaa taamaattumillu inatsisissatut siunnersuuteqarpoq kinaassutsimik atornerluinermut inatsisinik ilaqatumik. Susassaqarfik qallunaat nunaanniimmat siunnersuut Folketingimi akuerineqassaaq.
– Malersuisunit malersorneqarneq, nakkutigineqarneq ajortisarneqarneq inunnut eqqugaasunut killissamik annertuumik qaangiineruvoq. Annertuumik pinerluttuliorneruvoq unitsittariaqagarput. Taamatuttaaq innuttaasut kinaassusaat atornerlunneqartut misigisinnaapput, Peter Hummelgaard oqarpoq.
Piffiit nutaat, malittarisassat nutaat
Inuiaqatigiit digitaliusumik ingerlariaaseqalersimanerat suliniutinut nutaanut ilaassaaq, ilaatigut inuit attaveqaqatigiittarfiini malersuinissamut nutaanik periarfissaqalersimaneq eqqarsaatigalugu.
Siunissami malersuisimasutut pineqaatissinneqarnissaq ajornarunnaassaaq, attaveqaqqusaajunnaarsitsinermik peqqussuteqaqqaanngikkaluartoq assigisaannilluunniit inerteqquteqartoqaqqaanngikkaluartoq pineqaatissiisoqarsinnaanngussalluni.
Aammattaaq pinerlineqartut pinerluttup iperagaanera aamma aneersinnaatitaanera pillugit paasissutissinneqarnissamik piumasaqarsinnaapput. Aamma videokkut meeqqanik apersuineq pillugu malittarisassat nutaat atuutilersinneqassallutik.
Inatsisit aalajangersimasut atorneqartinnagit Kalaallit Nunaanni kinaassutsimik atornerluisut pineqaatissinneqarnissaat ajornakusoorsimavoq.
Assersuutigalugu internetimi allaasaarneq inerteqqutaanngilaq, siunissamili pissutsini aalajangersimasuni tamanna inerteqqutaalissaaq.
Siunnersuut akuerineqarpat malittarisassat nutaat marsip aallaqqaataani 2025-mi atuutilissapput.
Inatsisitigut allannguutit pillugit Inatsisinik atortitsinermut ministereqarfiup nittartagaani paasisaqarnerusinnaavutit.
