Ingerlatseqatigiiffimmi isorineqaqisumi ataatsimeersuarneq sapaatip-akunnerani matumani pissaaq
Greenland Airports Mittarfeqarfiit A/Simi immikkut ittumik pingasunngornermi ataatsimeersuartoqarnissaa Naalakkersuisut ilisimatitsissutigaat.
Assi: Oscar Scott Carl
Naalakkersuisut siulittaasuat Jens-Frederik Nielsen (D) Greenland Airportsimi ajornartorsiuterpassuit nalaanneqaqattaarnerat pissutigalugit ingerlatseqatigiiffiup siulersuisuinut kinguneqartitsisoqarnissaanut aarlerisaarinikuuvoq.
Naalakkersuisut siulersuisuni ilaasortanik taarsiissappata ataatsimeersuartoqaqqaartussaavoq. Naalakkersuisut immikkut ittumik ataatsimeersuartoqarnissaanik sapaatip-akunnerani matumani pingasunngornermi maanna aggersaapput.
Ataatsimeersuarnermi oqaluuserisassat marluupput: "Siulersuisunut qinersineq" aamma "allat".
Nuummi mittarfissuup nutaap ingerlanneqarneranut atatillugu Greenland Airportsip annertuumik isornartorsiorneqareersorlu ataatsimeersuarneq pisussanngorpoq.
Naalakkersuisut siulittaasuat Jens-Frederik Nielsen qanittukkut mittarfimmi ajornartorsiutit pillugit ima oqarpoq:
- Oqareernittut Naalakkersuisut pisussaaffigaat siulersuisut toqqarnissaat, tamannalu siulliullugu inissittariaqarparput, tamanna pinngitsoorneqarsinnaanngilaq.
