ULLOQ UNNUARLU NALUNAARUSIAQ
Innartortoq politiinut nalunaarutigineqartoq Trumpillu tikeraarnera
Inuk Nuup qaqqaani innartortoq ajornartooqqasoq pillugu politiit marlunngornermi unnukkut arlaleriarlutik nalunaarfigineqarput.
Assiliisoq: Leiff Josefsen
Donald Trump Jr. Nuummut marlunngornermi tikeraarmat innuttaasut illoqarfimmeerrapput.
Tikeraartoq nuimasoq, USA-mi præsidentinngortussap Donald Trumpip ernera siunnersortigisaalu, pissutigalugu illoqarfimmi upalungaarsimaneq annertunerusoq Kalaallit Nunaanni Politiit pigaartuisa pisortaat Poul Kreutzmann Sermitsiamut pingasunngornermi ullaakkut oqarpoq.
Tikeraartoqarnissamut qanoq piareersartoqarlunilu suut isumagineqarsimanersut pigaartut pisortaata itisilerumanngilai.
Politiit qanoq piareersarsimanersut tikeraarnissaminnullu piareersarsimanersut pigaartut naalagaat itinerusumik oqaluttuarerusunngilluinnarpoq.
Innartortoq nalunaarutigineqaqattartoq
Trumpip tikeraarnerata saniatigut ulloq unnuarlu eqqissisimasimasoq politiit paasissutissiipput. Inulli Ukkusissami innartortoq arlaleriarluni politiinut nalunaarutigineqarpoq.
Innartortoq ajornartorsiortoq inuit arlallit nalunaarutigaat.
Politiit sumiiffimmut ornigupput, innartortorlu attaveqarfigigamikku ajunngitsoq ajornartorsiunngitsorlu paasivaat.
