KOMMUNIIT
Innuttaasut amerlasuut akissarsinngitsoorput pisortanillu ikiorsiissutisinngitsoorlutik
Sapaatip akunnera allortarlugu akissarsiaqartut innuttaasullu pisortanit ikiorsiissutisisartut aningaasarsiassatik piffissaq eqqorlugu pissarsiarinngitsoorpaat aatsaallu siusinnerpaamik marlunngorpat kontoinut ikineqassallutik. Kommunit nassuiaapput tamanna inatsisitaarfiusimaneranik tamatumalu malitsigisaanik Danmarkimi bankit matoqqasimaneranik pissuteqartoq.
Innuttaasorpassuit ullut 14-kkaarlugit akissarsisartut pisortanillu ikiorsiissutisisartut kontominnut ullumikkut tallimanngornermi kontominnut ikineqartussaagaluit marlunngorpamut utaqqisariaqarpaat.
Foto: Leiff Josefsen
Kommunit assigiinngitsunik nassuiaateqarput akissarsiassat tunniussassallu akilerneqannginnerinut.
Kommuneqarfik Sermersooq nassuiaavoq nemkonto-systemi "naatsorsuutaanngitsumik juunip tallimaani Qallunaat Nunaanni bankit matoqqaneranni ikisiffigineqarsinnaanngimmat" akissarsisitsillunilu pisartagalinnut tunniussisoqarsinnaanngitsoq. Avannaata Kommunia nassuiaavoq akiligassat akilerneqannginnerinut "teknikkikkut ajornartorsiutit" pissutaasut.
- Sisamanngorneq juunip tallimaat aammalu ataasinngorneq juunip qulingiluaat Danmarkimi nalliuttuunerat tassunga pissutaavoq, tamatumalu kingunerivaa, ikisanik danskit clearingssytemii nussuinatik. Tamanna Kalaallit Nunaannut tamarmut – kommunitsinnuunnaanngitsoq akissarsititsinernut tamanut kalluaavoq, Qeqqata Kommunia nassuiaavoq.
Kommune Kujallermit oqaatigineqarpoq Grønlandsbanken suleqatigalugu ullumikkut tallimanngornermi aningaasat tunniunneqarnissaat sulissutigineqartoq.
5. juni tassaavoq ulloq inatsisitaarfik aammalu Danmarkimi bankit matoqqaffiat. Tamanna isumaqarpoq danskit bankii ullormi tassani tamarmik matoqqasartut, tamannalu nunatsinni innuttaasunut amerlasuunut sunniuteqarpoq.
Digitalinngortitsinermut Aqutsisoqarfik aamma kommunit attavigineqarsinnaanngillat
Sermitsiamit iluatsinngitsumik attaveqarfiginiaraluarparput Namminersorlutik Oqartussani Digitalinngortitsinermut Aqutsisoqarfik, nemkonto-systemip aqutsineranut akisussaasoq.
Apeqqutigerusukkaluarparput sooq piareersimaffigineqarsimannginnersoq juunip tallimaat inatsisitaarfiusartoq aammalu ulloq taanna Danmarkimi bankit matoqqasartut.
Aammattaaq kommunet iluatsinngitsumik attaviginiaraluarpagut sooq kommunet innuttaasunut piffissaq eqqorlugu akissarsisitsinissaq pisartagalinnullu tunniussinissaq isumaginiarsimannginneraat.
Kommunit Facebookikkut quppernerini innuttaasut ikigisassaanngitsut iliuusissaaleqinermik pakatsisimanermik kissaammernermillu annertuumik ersersitsipput.
- Soormi taava piffissaagallartillugu iliuuseqanngilasi? Inatsisitaarfik takkuteriataanngilaq! Taava akissarsisussaagaluit akissarsinissap tungaanut ikiussavigisigit? Nutaarsiassaanngilluaasarpoq kingusinaartartusi qaammatit tamaasa, iluarsissanasilu, innuttaasut ilaat kommunit ilaata Facebookikkut quppernerani kikkut tamarmik takusinnaasaanni pakatsisimaqaluni ilaatigut allappoq.
