Interpolip Paul Watsonimik tigusarinninnissamut nalunaarut atorunnaarsippaa
Interpolip nunat tamalaani politiit Paul Watsonimik tigusarinninnissaannut kajumissaarunnaarpai.
Paul Watson Nuummi 2024-mi tigummigallarneqarnermi nalaani eqqartuussivimmit anisoq. Tigusaanissaanut nalunaarut Interpolip maanna atorunnaarsippaa.
Assi: Leiff Josefsen
Interpolip Paul Watsonip nunarsuaq tamakkerlugu politiinit tigusarineqarsinnaaneranut nalunaarut "red notice"-imik taaneqartartoq atorunnaarsippaa.
Tamanna eqqartuussissuserisumit Julie Stagemit, Watsonip illersuisuanit, uppernarsarneqarpoq.
- Interpol ullumi aalajangerpoq ukiut 13-it kingulliit ingerlaneranni Paul Watsonimut nalunaarutigineqartartoq naapertuutinngitsoq taamaattumillu atorunnaarsivinneqassasoq, taanna oqarpoq.
Eqqartuussissuserisoq nangilluni oqarpoq Interpolip aalajangiinermini maluginiarsimagaa suliaq ilaatigut politikkimit tunngaveqartoq.
- Tamanna Japanip Watsonimik malersuinerata politikkimik tunngaveqarneranik ilimagisatsinnut uppernarsaataavoq, Julie Stage oqarpoq.
Watson 2024-mi aasakkut Nuummi tigusarineqarpoq Japanimit red notice-qartoqarnera tunngavigalugu. Japanip 2010-mi suliaq pillugu tunniunneqarnissaa kissaatigaa.
Japanimi oqartussaasut naapertorlugit Watsonip umiarsuaq arfanniut ajoqusersimavaa Japanimiullu arfanniat suliaannik akornusiisimalluni.
Nuummi qaammatit sisamat sinnerlugit tigummigallarneqareerluni Danmarkimi inatsisinik atortitsinermut ministereqarfiup aalajangerneratigut Japanimut tunniunneqassanngitsoq aalajangerneqarmat, iperagaavoq.
Interpolilu maanna aalajangerpoq red notice atuutsinneqarunnaassasoq.
Taamaalilluni kiffaanngissuseqarnerulerpoq, Julie Stage oqarpoq.
- Nunat ilai suli tikissinnaanavianngikkallarpai, Japanimut tunniussaasinnaanera suli aarlerinarsinnaammat, ukiunili arlalinni killilimmik inooreerluni maanna kiffaanngissuseqarnerulerluni angalasinnaalerpoq.
Japanimi naalakkersuisut aalajangersinnaapput Interpolimut red noticemik nutaamik piniassallutik.
Julie Stageli oqarpoq suliamut atatillugu nutaanik paasissutissanik takkuttoqanngippat qinnuteqarneq Interpolimit akuerineqarnissaa ilimaginagu.
- Taama pisoqarnissaa ilimaginngilara, oqarpoq.
Eqqartuussissuserisoq William Julié, aamma Paul Watsonip illersuisua, red notice atorunnaarseqqullugu Interpolimut qinnuteqartuusimavoq.
Ilaatigut eqqartuussissuserisuata tunngavilersuutigaa suliaq politikkimut tunngassuteqarmat Japanimilu eqqartuussivimmi naapertuilluartumik pineqarnavianngimmat.
Qinnuteqaataa pissutigalugu Interpolip red notice Paul Watsonimut atuuttoq apriilimi unitsikkallarpaa.
Interpolip siunertaraa nunani ilaasortaasuni tamani politiit suleqatigiinnissaannut ikiuineq.
/ritzau/
