Inuit arlallit annaanneqartut
Qasigiannguit avannaani inuit qulingiluat qulimiguulimmik SAR-imik suliaqartunit annaanneqarput.
SAR-imik suliaqarneq Issittumi Sakkutooqarfimmit aqunneqarpoq.
Foto: Jesper Hansen
Malugiuk: Allaaserisaq Issittumi Sakkutooqarfimmit paasissutissat ilanngullugit nutarterneqarpoq
Umiatsiaq arfineq-pingasunik ilaasulik Aasiaat Radioanut pingasunngornermi nalunaaqutaq 13.48 ikioqqullugu kallerrisaarivoq.
Qasigiannguit avannaani umiatsiaq sikumut kiggigussaalluni kinngunngujoormat ilaasut sikumut niusimapput.
Issittumi Sakkutooqarfiup paasititsinera aallaavigalugu angallat alla taakkununnga ikiuiartorniaraluartilluni aamma ingerlariaqqinnaveerami sikumut niusariaqarsimavoq. Taamaalilluni annaanniarneqartut qulingiluaalerlutik.
Issittumi Sakkutooqarfik aqutsisoralugu ujaasilluni annaassiniarneq aallartinneqarpoq qulimiguulillu sumiiffimmukartoq politiini pigaartut pisortaat Poul Kreutzmann oqarpoq.
Kalaallit Nunaanni Politiit ornigukkaluarput sikoqarpallaarneralu pissutigalugu qimaguteqqittariaqarsimallutik, Issittumilu Sakkutooqarfiup Air Greenlandip qulimiguulia atorlugu annaassiniarneq aallartippaat.
Nalunaaqutaq 16.10 missaani inuit qulingiluat qulimiguulimmut ikineqarput Ilulissanilu napparsimmaviliaanneqarlutik.
- Tamarmik ajunngillat, pigaartut pisortaat oqarpoq.
Umiatsiaq qanoq ililluni ajutoorsimanersoq paasiniarlugu politiit maanna killisiuissapput.
Ulluni arlaqanngitsuni ujaasinerit aappassaraat. Sapaammi inuit pingasut Qeqertarsuup Tunuani maqaasineqartut nalunaarutigineqarput, taakkulu ataasinngormat marlunngormallu ujarneqarpoq. Ajoraluartumik nassaarineqanngitsoorput, pingasunngornermilu ullaap tungaani ujaasineq unitsinneqarpoq.
