IA INATSISARTUNI GRUPPE
Inuit Ataqatigiit Palæstina tapersersorpaat: kisianni Naalakkersuisut sumiippat?
Inuit Ataqatigiit isumaqarput Israelip palæstinamiut inuiattut toqorarai, sorsuffigalugit kaannersuarmillu eqqugaatillugit. Pipaluk Lynge (IA) naqissusiivoq IA-p Palæstina tapersersoraa, kisianni aamma aperivoq Naalakkersuisut sumiinnersut.
Inatsisartutip nunanut allanut sillimaniarnermullu politikkikkut ataatsimiititaliaata siulittaasua, Pipaluk Lynge (IA), partiip Inatsisartuni gruppia sinnerlugu Naalakkersuisunut Gazami sorsunneq pillugu apeqquteqarpoq.
Assi: Jensine Berthelsen
Ukiut marluk matuma siorna, sorsunneq pileruttormat nunat Israel Palæstinalu
namminiussuseqarnissaat tapersersorlugit suaaruteqarpugut. Maanna
tusagassiutitigut isiginnaarparput tusagassiortut Gazami toqutaasut, Israelip
Gazap tiguarnissaanik suaaruteqareernerata kingorna, Pipaluk Lynge-p IA-meersup tusagassiuutinut nalunaarutaa Naalakkersuisunut apeqquteqaamminut tunngatitani taamak aallarnerpaa.
- Israelimiut naalakkersuisuisa Palæstinami sorsunnerisa piaartumik unitsinneqarnissaanik
Naalakkersuisut oqariartortariaqartut, Naalakkersuisullu Palæstinamiut naalagaaffiannik
pilersitsinissaq tapersertariaqaraat, Inuit Ataqatigiit isumaqarput.
GAZAMI PISSUTSIT
Gazami meeqqat qassit kaannersuarmik eqqugaaqqanersut eqqortumik naatsorsoruminaappoq, kisianni pissutsit imaannaanngeqaat. UNICEF naapertorlugu meeqqat 320.000-it sinnerlugit nerisassaarunnermik toqquteqarsinnaapput, tusindilikkaallu sorsunnerup kingunerisaanik toqoreersimallutik. Tassunga tunngatillugu paasissutissat pingaarnerit ukuupput:
- Meeqqat 18.000-it sinnerlugit Gazami sorsunnerup aallartinneraniit toqusimapput, RÆSON nalunaarpoq. Tassa imaappoq agguaqatigiissillugu ullormut meeqqat 28-it toqusarput.
- Meeqqat tallimat ataallugit ukiullit 71.000-it nerisassaarunnerup kingunerisaanik napparsimalersimasut katsorsarneqarnissaminnik pisariaqartitsipput, UNICEF Norge oqarpoq.
- Inuit millionit ataaseq sinnerlugit (innuttaasut 54%-ii) Gazami kaannersuaqarfimmi inuusutut atugaqarput, IPC-p nalunaarusiaa naapertorlugu.
- Ilaqutariit amerlasuut nerisassanik pisiassaqaraangat akissaqanngillat, nerisassallu akii qaffariarujussuarsimammata.
- Gazamut mattussineq nerisassanik ikiuinermillu apuussinissamut killilersuivoq.
Pissutsit imaannaanngeqaat, meeqqallu amerlanerusut kaannermik nerisassaarunnermillu toqussasut aarlerinaateqarpoq, piaartumik iliuuseqartoqanngippat.
- Kalaallit Nunaata allat
toqorarneqarlutillu aserorterivigineqarnissaat kissaatigisimanngisaannarpaa. Taamaammallu inuiaat
Kalaallit sinnerlugit Naalakkersuisut iliuuseqarlutik allat uagullu siunissatsinni eqqissinermik
kiffaanngissuseqarnermillu kissaateqarnermik erseqqissumik nalunaartariaqarnerat pisariaqartutut
isigaara, Pipaluk Lynge apeqquteqaamminut tunngavilersuutimini kaammattuivoq Naalakkersuisut danskit naalakkersuisuinut kajumissaarinissaat Israelip naalakkersuisuisa Gaza illoqarfianik tigusinissaminnut aalajangernerannut akerliunissaminnut.
Taamatuttaaq Pipaluk Lynge kajumissaarpai Gazami inuit toqorarneqartutut taasani pillugit Naalakkersuisut akerliliisariaqartut. Taamatuttaaq Naalakkersuisut akissuteqaqquai Naalakkersuisut Palæstinap naalagaaffinngornissaanut tapersersuinerlutik.
Meeqqat nerisassaarullutik qaartinneqartarput
Pipaluk Lynge innersuussivoq pissutsit imaannaanngilluinnartut maanna atuuttut.
Qaqugukkununa meeqqat kaatsitaasut, qaartartumiigaasut nunarsuarmioqatigiit
iliuuseqarniartut? Isiginnaaginnassuugut? Nunarsuarmioqataavugut,
illersuinerput tapersersuinerpullu tusartittariaqarparput, Pipaluk Lynge IA'p Inatsisartuni ilaasortaatitai sinnerlugit apeqquteqarpoq.
- Inuit Ataqatigiinniit maluginiarparput Gazami illut 92 procentii
qaartartumeerneqarsimasut, meeqqat 12.000-it tallimat inorlugit ukiullit perlilertut. Naalakkersuisut suaaruteqartariaqalerput Palæstinap
namminiussuseqarnissaa illersorlugu, danskillu ministerii assinganik
iliuuseqaqqullugit.
- Nunarsuarmioqatitta Palæstinap nunatut akuerineqarnissaa suaarutigaat,
naak uagut Naalakkersuisugut? Oqaluttuarisaanermi pisimasut uteqqissanngippata, maanna niperput
iliuuseqarsinnaanerpullu takutittariaqalerparput, Pipaluk Lynge piumasaqarpoq.
