Inuit pisinnaatitaaffiinik suliaqarnermut ernumassuteqarneq
Inuit Pisinnaatitaaffii pillugit Siunnersuisoqatigiivisa suliassatik tamaasa suliarisinnaassagunikkit, aningaasanut inatsimmi aningaasaliisoqarnerusariaqarpoq. Danmarkimi aningaasanut inatsimmi aningaasaliissutit nungungajalerput, aningaasaliissuteqartoqanngippallu siunnersuisoqatigiit sulisut arlallit annaassavaat inatsisitigullu suliassatik suliarisinnaajunnaarlugit, siunnersuisoqatigiit oqarput.
Aningaasanut inatsisissatut siunnersuut marlunngormat Inatsisartut siullermeerpaat. Isumaqatiginninniarnerit siunnersuisoqatigiit sulinissaannut aningaasaliissutinik amerlanerusunik kinguneqarumaartut, Inuit Pisinnaatitaaffii pillugit Siunnersuisoqatigiit neriuutigaat. (Toqqorsivimmit assi)
Assiliisoq: Leiff Josefsen
2025-mut aningaasanut inatsisissatut siunnersuut marlunngormat Inatsisartuni siullermeerneqarpoq. Tamatumunnga atatillugu aappaagumut missingersuummi siunnersuisoqatigiit inissaqartinneqarnerunissaat pillugu Inuit Pisinnaatitaaffii pillugit Siunnersuisoqatigiit politikkerinut qinnuteqarsimapput.
Ukiup nikinnerani danskit aningaasanut inatsisaat naapertorlugu aningaasaliissutit atorunnaarpata, aningaasanik amerlanerusunik aningaasaliisoqanngippat siunnersuisoqatigiit pisussaaffimminnik naammassinninnissartik ajornakusoortissavaat:
- Siunnersuisoqatigiit inatsisaata 2018-imi akuersissutigineqarnerata kingorna taamaallaat Nunat Avannarliit Aningaasaateqarfiannit Danmarkimi aningaasanut inatsimmit aningaasaliissutit atorlugit piumasaqaatit siunnersuisoqatigiit naammassisinnaasimavaat, siunnersuisoqatigiit marlunngormat tusagassiuutinut nalunaarummi allapput nangillutillu:
Inuit pisinnaatitaaffiinik sulinermut ajoqutaassasoq
- Aningaasaliissutissalli taakku 2024-p naanerani atorunnaarsinneqassapput, aningaasaliissuteqartoqanngippallu taamaalilluni Siunnersuisoqatigiit suliniutaasa ilarpassui atorunnaarsinneqassapput, tamannalu innuttaasunut Kalaallit Nunaannilu inuit pisinnaatitaaffiinik suliniummut ajoqutaassaaq.
5,85 million koruuninik aningaasaliisoqartariaqartoq Siunnersuisoqatigiit nalunaarput. Aningaasanut inatsisissatut siunnersuutip maanna saqqummiunneqartup siunnersuutigisimasaanit tamanna marloriaataavoq, tassani siunnersuisoqatigiit ukiumut 2,6 millionit koruuninik aningaasaliiffigineqarnissaat siunnersuutaammat.
Aningaasaliissutissat amerlineqanngippata ukiut pingasut suliat maanna Danmarkimit aningaasalersorneqartartut annaaneqassapput.
- Piginnaassutsinik annaasaqangaarnerit
- Suliat taakku annaaneqarpata inuit pisinnaatitaaffii pillugit suliaqarnermi aningaasat piginnaasallu annertoorujussuit annaaneqarluinnassapput, siunnersuisoqatigiit oqarput, spiralilersuinikkullu naartunaveersaasersuisimaneq pillugu paasiniaanermut siunnersuisoqatigiit suliaqaqataasarnerat ilaatigut tikkuarlugu, aammalu FN-ip misissuisarnermut nalunaarusiortarnermullu aningaasaliissutaat minnerpaanngorlugit ikilisinneqarsimanerat imaluunniit aningaasaliissuteqartoqaqqinnanilu atorunnaartarnerat aamma tikkuarlugu.
Aningaasanut inatsit, ilaatigut Inuit Pisinnaatitaaffii pillugit Siunnersuisoqatigiinnut aningaasaliissutit, Naalakkersuisut Inatsisartunilu partiit qaammatini tulliuttuni isumaqatigiinniutigissavaat.
