Inu:it politiinut unnerluutiginninneq pillugu: „Pissutissaqarluarluta iliuuseqarpugut“
Peqqinnissaqarfik ikiorniarlugu satellitsikkut attaveqaat Inu:it-p Starlink atorpaa, tamannalu peqqutigalugu Nalunaarasuartaateqarnermi Aqutsisunit IT-mik siunnersuisarfik politiinut unnerluutigineqarpoq.
IT-mik siunnersortinik suliffeqarfik Starlinkimik suleqateqarunnaareersoq, Inu:it-imik piginnittoq Martin Gjødvad oqarpoq.
Privatfoto
- Pissutissaqarluarluta iliuuseqarpugut, suliaq suliffeqarfiup politiinut nalunaarutigineqarneranik kinguneqartoq pillugu Inu:it A/S-imi siulersuisuni siulittaasoq piginnittorlu Martin Gjødvad, nittartakkami aviisimut Sermitsiamut oqarpoq.
2023-mi ukiakkut Namminersorlutik Oqartussat pilersuisuat Tasiilami satellitsikkut attaveqaatinik neqerooruteqarunnaarmat Peqqinnissaqarfik unammilligassaqangaatsiarsimasoq, Martin Gjødvad ilisimatitsivoq. EPJ-systemi (Elektronikkikkut napparsimasunik nalunaarsuiffik, aaqq.) ajornartorsiuteqalermat ingerlatsinermut sunniuteqartumik kinguaattoornersuaqarpoq.
Misiliutitut suliniut
- Iluatsinngitsumik ileqqussat malillugit peqqinnissaqarfiup ajornartorsiut aaqqinniarsaraa. Taamaattumik peqqinnissaqarfimmi atortunut pingaarutilinnut isersinnaanerup misilinnissaanut, Inu:it suleqatigalugu Tasiilami Nuummilu napparsimmaviit akornanni StarLink aqqutigalugu VPN-tunnelimik misiliummik pilersitsisoqarpoq. Misiliutitut suliniutigineqarsimasoq aaqqiissutissaalluarsimavoq. Misiliutitut suliniutigineqarsimasoq maanna naammassivoq, atortullu piiarneqareerput, Martin Gjødvad ilisimatitsivoq.
Iliuuseqarnertik inatsisinik unioqqutitsinertut isumaqarfigineqarsinnaasoq misiliummik suliniuteqartut paasisimagaat, pisortaanerup nangilluni oqaatigaa.
- Inatsisartulli inatsisaat nr. 31, 23. november 2017-imeersoq, §1 imm. 3 tunngavigalugu attaveqaatit allat atorlugit attaveqaatinut immikkut ittunut attaveqarnissamut periarfissaqartitsisoq aamma maluginiarparput, attaveqaatit nalinginnaasut tamanut ammasut atorlugit matussuserneqarsinnaanngippata, taamaattumillu misiliummik suliniut ingerlatiinnarparput, Martin Gjødvad itisiliivoq, misiliummillu suliniut illuatungeriit tamarmik ajunngitsumik isumaqarlutik aningaasatigullu iluanaaruteqarnissamik siunertaqaratik suliniutigisimallugu erseqqissarlugu, „iluanaarniutaanngitsumik aningaasartuutit piviusut pillugit Peqqinnissaqarfimmut akiligassiissutaaginnarsimallutik“.
Misiliutaannaasoq
- Namminersorlutik Oqartussat pilersuisuisa naammaginartumik ikiuuffigisinnaasimanngisaanut, ajornartorsiummut inuunermut pingaaruteqartumut aaqqiissutissamik misiliinissamut atuisorput, Peqqinnissaqarfik, ikiorusuinnarnikuuarput. Inu:it-ip nutaaliorsinnaanera teknologiimillu nutaaliaasumik atuisinnaanera Peqqinnissaqarfiup naammagisimaarluinnaraat misigisimavarput, Martin Gjødvad oqarpoq, it-millu siunnersuisarfiup Starlink aqqutigalugu attaveqaqatigiinnermut kiffartuussinerit tuniniaqqissimanngikkaat erseqqissarlugu.
Inu:it-ip piginnittua siulersuisuinilu siulittaasua Martin Gjødvad nammineerluni umiatsiaminut Danmarkimi umiatsiaminut StarLink-antennemik pisisimavoq. Peqqinnissaqarfik atortunik akisuunik nammineq pisissanngimmat, immaqalu naatsorsuutigineqartutut teknologii iluatsinngitsooqinammat, atortunik ukiuunerani misiliutitut peqqinnissaqarfik atuissasoq Inu:it-ip siunnersuutigisimavaa, atortummi Danmarkimi ukiuunerani atorneqarnavianngimmata.
Antenne peerneqarpoq
- Taamaattumik misiliummik suliniuteqarnitsinni peqqinnissaqarfik aningaasartuuteqarpallaartinnaveersaarnikuuarput, Martin Gjødvad oqarpoq.
Starlinkimik suleqateqarunnaarniarpisi?
- Antenne peerneqareerpoq. Inu:it A/S Starlinkimik suleqateqanngilaq. Misiliilluni suliniut naammassineqareerpoq, inuunermut pingaarutillit qarasaasiatigut aaqqissuussinerit sukkassusiat isumannaatsuunerallu eqqarsaatigalugit angusaqarfiulluarluni, Martin Gjødvad ilisimatitsivoq.
