Nalunaarasuartaateqarnermi Aqutsisut Nuummi suliffeqarfik politiinut tunniuppaat
Suliffeqarfiup IT-mik ingerlatsisup Inu:it A/S-ip attaveqaqatigiinnermut kiffartuussinermullu inatsimmik unioqqutitsinera pillugu, Nalunaarasuartaateqarnermi Aqutsisut politiinut nalunaarutigaat.
Annonse
Tusassip attaveqaqatigiinnermut tunngasuni kisermaassisussaatitaanera illersorniarlugu, Nalunaarasuartaateqarnermi Aqutsisut maanna iliuuseqalerput.
Unioqqutitsinerit piiarneqarnissaat pingaarnerutillugu, februaarimi nittartakkatigut aviisimut Sermitsiamut Nalunaarasuartaateqarnermi Aqutsisut nalunaarutigaat.
Mianersoqqusinerat qaammatialuit qaangiummata politiinut nalunaarutinngorpoq, Inu:IT A/S-ip "Starlinkimut antennelersimanikkut aamma Starlink aqqutigalugu nalunaarasuartaatitigut kiffartuussinernik tuniniaaqqissimanikkut" Tusassip attaveqaqatigiinnermik kiffartuussinermillu neqerooruteqarsinnaanermut kisermaassisussaatitaanera unioqqutikkaa, Nalunaarasuartaateqarnermi Aqutsisut isumaqarmata.
Maleruagassat innuttaasunit ilisimaneqarnissaat qulakkeerniarlugu, Nalunaarasuartaateqarnermi Aqutsisut ukiup aallartinnerani ilitsersuusiorput.
- Innuttaasunut attaveqaqatigiinnermut inatsisinik ilisimasaqanngitsunut ilitsersuusiorpugut, akuersissummik piginnittumit Tusass A/S-iunngitsumit allamit qaammataasianut atortunik pisinnginniassammata, qaammataasiatigullu kiffartuussinissamut akiliuteqannginniassammata, taamaanngippat akiligassinneqarsinnaammata, Nalunaarasuartaateqarnikkut aqutsisoqarfimmi allaffimmi pisortaq Louise Restorff, februaarip 14-iani ukioq manna Sermitsiamut paasissutissiivoq.
Politikkikkut sammineqartoq
Tusassip kisermaassinera politikkikkut soqutigineqartorujussuuvoq, attaveqaqatigiinnermimi niuernerup ammaanneqarnissaa Atassutip Naleqqallu siulittaasuisa piumasaraat, nunanit allaneersut satellitsikkut attaveqaatillit Kalaallit Nunaanni killilersugaanngitsumik kiffartuussisinnaaniassammata.
Attaveqaasersuutinut naalakkersuisup Hans Peter Poulsenip Naalakkersuisut sinnerlugit, niuernerup killilersorneqarunnaarnissaa itigartippaa.
- Qaammataasiaq atorlugu attaveqaatinik sullissinermik allanik qinigassaqarnermi, nunanit allanit nalunaarasuartaatinik neqerooruteqartartut aningaasanik isaatitsissutigisinnaasaminnik, nalunaarasuartaatitigullu sullissinermik aningaasaqarnikkut imminut akilersinnaasumik taamaallaat neqerooruteqartassasut naatsorsuutigisinnaavarput, februaarimi paragraf 37 naapertorlugu apeqquteqaat akineqarmat Hans Peter Poulsen oqarpoq, imalu itisiliivoq:
Isertitat eqqorneqarsinnaasut
- Tusass A/S isertitatigut annaasaqassaaq, nalunaarasuartaatitigullu attaveqaatinut aningaasartuutigisartagaat ammaassinikkut ikilinavianngillat. Kalaallit Nunaanni nalunaarasuartaatitigut attaveqaatinik Tusass A/S-ip aserfallatsaaliuisinnaaneranut ineriartortitsisinnaaneranullu tamanna unammillernartitsissaaq.
Starlink tassaavoq nunarsuaq tamakkerlugu internettimut attaveqaat satellitsit atorlugit attaveqaateqartuusoq, SpaceX-imit ineriartortinneqarsimasoq. Nunarsuarmi avinngarusimanerpaani Starlink aqqutigalugu sukkasuumik internetertoqarsinnaalerpoq.
Inu:it-p nittartagaa naapertorlugu Inu:it siunnersorteqarfiuvoq Kalaallit Nunaanni ukiut 20 sinnerlugit matuma siorna pilersinneqarsimasoq, siunnersuinermik ajornaallisaanermik, ilusilersuinermik, qarasaasialerinerup iluani aaqqissuussinermik ikiuinermillu ukkataqartuusoq.
