Inuppassuit nuannaarlutik Nuummi katersortarfimmut kaffisoriartukaapput

Inuit qanoq amerlatigisut ataatsikkut Nuup Katersortarfiani isersimasinnaasut killeqarnera pissutaagunavilluni, isertarfiup matuata saani assiaquteqarpoq.

Katersortarfiup iluani inuppassuit nuannaartut nalliuttorsioqataallutik peqataapput, minnerpaamillu amerlaqataat silataani isernissaminnut utaqqipput nalliuttorsioqataarusullutik.

83-nik ukiulik Susanne Isaksen Danmarkimut feeriarnissaminut angumerserusuppoq

Sermitsiamit naapipparput 83-nik ukiulik Susanne Isaksen, taanna assut nuannaarpoq mittarfiup atoqqaarfissiorneqarnera angumerigamiuk.

- Qeersaat (utoqqarnut timigissartartut, aaqq.) mittarfiliarpugut takornariat bussii qaqortut ilaaffigalugit Tuukkallu tikikkiartornera minneralu qanimut isiginnaarlutigu, inuit amerlaqisut ullorsiorlutik najuupput. Ulloq assut nuannerpoq, uangalu nuannaaqaanga toqqaannartumik attaveqalerneq misigigakku, taamaattumik nuannaartorujussuuvunga, Susanne Isaksen oqarpoq.

Atlantiku qulaallugu timmisartumut ilaanissaminut pilersaaruteqarnersoq aperigatsinni, utoqqaat peqatigiiffiat aappaagu Danmarkimut feeriarnissamik  pilersaaruteqarnerarpai:

- Periarfissaqassaguma ilaarusuttorujussuuvunga, 83-inik ukiulik Susanne Isaksen naggasiivoq.

Lauritz Heilmann Nuummiuulluni tulluusimaarpoq

- Nuummiuulluni assut tulluusimaarnarpoq, assullu nuannaarpunga ullumikkut ulloq nalliuttorsiornerput pillugu, sivisuumimmi utaqqisimavugut, Lauritz Heilmann nuannaarluni oqarpoq.

Siullermeerlutit toqqaannartumik timmisartumut toqqaannartumut ilaanissat qaqugu pissanersoq naatsorsuutigiviuk?

- Aappaaguunissaa ilimanarpoq, immaqa Danmarkimut pikkorissarnissamut angalaneq upernaap ingerlanerani piumaarpoq, ilaqutariittulli aasaru Danmarkimut feeriarnissarput aamma ilimanarpoq, assullu nuannissaaq Københavnimut toqqaannartumik timmisartorsinnaalernissaq, tassami Kangerlussuarmi sivisuumik utaqqisaratta, pingaartumik ullaakkut siusissukkut aallarsimatilluta utaqqerujussuartaratta ingerlaqqinnissatsinnut, taamaattumik qilanaarpunga sukkasuumik toqqaannartumillu angalasalernissatsinnut, Lauritz Heilmann akivoq.

Jeppe Strandsbjergimut Ulloq nuannerlunilu attortisimanarpoq 

- Ulloq assut attortisimanartoq annertoorlu, ullumikkut nalliuttorsiutigisarput assut nuannerpoq. Naatsorsuutigisannit attortisimanarneruvoq. Isumaqarpunga assorsuaq nuannersoq maanna Kalaallit Nunaanni mittarfeqalermat inuit najugaqarfiini, sakkutooqarfinni mittarfinnut naleqqiullugu.

Mittarfik taanna akulikitsumik atortarumaarpisiuk, ilissinnut pilersaarutit qanoq ippat?

- Taasinnaasara siulleq tassaavoq juullimut Danmarkimut timmisartorumaarnerput, tassa pilersaaruterput siulleq, assullu pissanganarpoq Nuummit toqqaannartumik Københavnimut timmisartortussanngoratta, taamaattumik qilanaarpugut, Jeppe Strandsbjerg oqaluttuarpoq.

Oline Mathiassen: - Jubii, maanna USA-mut toqqaannaq feeriarsinnaalissaagut

- Ulloq pilluarnarlunilu assut nuannerpoq, aamma Qarsukkut "Nuuk qulaallugu" appimmassuk attortisimanalaarpoq. Pisoq annertuujuvoq pingaaruteqarlunilu. Tuukkap mikkiartornera oqaluttuarisaanermilu siullerpaamik minnera Nuukullammit isiginnaarparput, misigisarlu assut nuannerpoq. Maanna aamma Københavniinnaanngitsumut nunatta avataanut angalasinnaaneq ammarneqarpoq.

Toqqaannartumik Nuummiit nunanut allanut attaveqalerneq atorluassamaarpisiuk?

- Periarfissat ammarneqartut atorluarusuppavut, periarfissaqalerpat kimmut feeriarnissaq kissaatiginaqaaq, tassa Amerikamut, taamaattumik massakkut Danmark feeriarfissatut ungasilliallappoq, Amerikamut feriarumaarnissatsinnut  qilanaarpunga, Oline Mathiassen oqarpoq.

Katersortarfimmi kaffillerneq iluatsilluartoq ornigarneqarluartorlu, Greenland Airportsimit ingerlanneqartoq, nalunaaqutaq 17:00 naammassivoq - ilimanarporlu amerlasuut qilanaartut qalipaatigissaartumik qummoroortarnersuaqassammat, 21:30 aallartittumik.