Inussuup Pituffimmi amerlanernik ilinniartuuteqarsinnaaneq sulissutigilerpaa
Kalaallit Amerikamiullu suliffeqarfiutaata Inussuup, Pituffimmi kiffartuussinermik aserfallatsaaliuinermillu suliaqartup, Pituffimmi ilinniartoqartarneq 2027-mi marloriaatinngorsimassasoq anguniapaa.
Annonse
Ruujorilerisunngorusuppit, maskiinalerisoq, innaallagisserisoq imaluunniit igasoq? Suliffimmik misiliivissannik ujartuivit?
Suliffeqarfiup Inussuk A/S-ip, kalaallit amerikamiullu piginneqatigiiffiat, Pituffimmi Space Bace suliffeqarfiini ilinniartuuffigineqarsinnaasut ilaat taakkuupput.
– Kalaallit Nunaanneersunik ilinniartoqarnissaq sulisoqarnissarlu pingaartillugu anguniarparput. Tamatuma saniatigut ilinniartoqarnermik aaqqissuussarput annertusarniarlugu sulissuteqarpugut. 2027-utinnagu ilinniartunik 22-nik atorfinitsitsinissarput anguniagaraarput. Maannakkumit marloriaammik amerlanerusunik, Inussumi suliniummik aqutsisoq Michelle Kielmann Jarl Sermitsiamut oqarpoq.
Pituffimmi suliffimmik misiliinissamut Kalaallit Nunaanni Danmarkimiluunniit innuttaassuseqarnissaq aamma pinerlussimannginnermut uppernarsaat piumasaqaatit ilagaat. Pinerlussimagaanni Danmarkimi nunanut allanut ministeriaqarfimmut akuersissummik qinnuteqarnikkut sakkutooqarfimmi sulilertoqarsinnaavoq.
3,95 milliardit dollarsit imaluunniit 27 milliardit koruunit. Tassa Pituffimmi sakkutooqarfiup aserfallatsaaliornissaanut ingerlannissaanullu isumaqatigiissutip nalinga, amerikamiut sakkutuuisa Inussuk A/S-imut 2022-mi isumaqatigiissutaat.
Inussuk suliffeqarfiuvoq piginneqatigiiffiusoq, sanaartornermik ingerlatsiviup Permagreen Grønlandip 51 procentimik piginnittuusoq amerikamiut suliffeqarfiutaat Vectrus Servicesip, V2X, 49 procentimik piginneqataavoq.
Inussuup aqutsisoqarfia allaffeqarfialu pingaarneq Nuummi Permagreenimiippoq.
Permagreenimilu pisortaavoq Jeppe Bloch Steffensen.
Sulisut 300-t
Inussuk maanna 300-t missaannik sulisoqarpoq. 80 procentii Danmarkimeersut sinnerilu Kalaallit Nunaanneersuupput.
Amerlanngitsut nunanit allaneersuullutik ilaatigut amerikamiut – Kalaallit Nunaanneersut amerlanerulernissaat anguniarneqarpoq.
– Sakkutooqarfimmi suliassat amerlanerit Kalaallit Nunaannit inuttalerneqarsinnaapput. Kalaallit Nunaanni sulisussarsiortarnerput atorfinnillu inuttassarsiuussisarnerput pingaartipparput, atorfinnillu inuttassarsiuussigaangatta maani nittarsaanniartarpagut, Michelle Kielmann Jarl oqarpoq.
Suliffiit Inussummit inuttassarsiuussat Suli.gl-imi, Jobindex.dk-mi Inussuullu facebookimi quppernerani nittarsaanneqartarput. Suliffeqarfik maanna IT-lerisussarsiorpoq.
Misigisassarsiorneq
Inussuup inuusuttunit aammalu perorsimasunik qitornalinnik angerlarsimaffimminnit nuussimasunik sakkutooqarfimmut sulilerumasunik soqutiginnittoqarluartartoq maluginiarpaa.
– Malugisinnaavarput misigisassarsiorusuttut Pituffimmut ujartuisartut. Tassani suut tamarmik pigineqarput. Kantiina pitsaasoq, pisiniarfigissoq inissallu. Naak sulisugut suliassaqarujussuartaraluarlutik sunngiffimminni pinngortitaq nuannersoq alianaarsaarfigisinnaasarpaat. Amerlasuut biileqarput namminnerlu illuaqqamik pigisaqarlutik, Michelle Kielmann Jarl oqarpoq.
Inussuup kiffartuussinissamut USA-p sakkutuuinut isumaqatigiissutaa oktobarip aallaqqaataani 2023-mi atuutilersoq ukiunilu aqqaneq-marlunni atuutissaaq. Isumaqatigiissut timmisartuussisunut kiffartuussinermik, pinngortitamik nakkutiginninnermik, illussanik titartaasarnermik, umiarsualiviup ingerlanneqarnerani, qatserisartoqarneq, qamutinik motoorilinnik aserfallatsaaliuinermik, ineqarnermut inuussutissanullu tunngasunik ilaatigut imaqarpoq.
Kiffartuussinissamik isumaqatigiissut kalaallinit qallunaanillu ukiorpassuanngortuni akisussaaffigineqartarpoq. Ukiut tallimat matuma siorna amerikamiut suliffeqarfiutaannut Vectrusimut tunniunneqarpoq maannalu Inussuup akisussaaffigaa.
