-
Peroriartornera oqitsuinnaanngilaq.
Jens
Mikkelsenip meeraanermini imminut isumagisorujussuusimanini isertuutinngilaa.
Blok 17-imi aalakoornermik nuannarisalerujussuarmik anaanaqarluni kilisaammilu
inuttamik, taamaammallu qaammatit pingasukkaarlugit peqartanngitsumik
ataataqarluni peroriartorpoq.
-
Kisimiittorujussuusarpunga. Ataatama mikisuaraasungali anaana
angerlarsimanngikkaangat manninnik aalatanik iganissamik ilinniartippaanga.
Ullut ilaanni nerineq ajorpunga, 43-nik ukiulik Nuummi qatserisartut pisortaata
tullia oqaluttuarpoq. Apersorneqarnermi unnuaani pigaartuusimalluni,
taamaammallu qasoqqalaarluni oqarpoq. Jens Mikkelsenip ataasiarluni angerlarsimaffimminut matuersaat katassimallugu
eqqaamavaa. Siullermik kingullermillu. Ulluni anaanaata angerlarsimannginnerani
qulermiuminukarluni illusimaffissilaarlunilu qiiaarseriartarpoq.
Jensip
Marius affarmik qatanngutigai, taassumalu ilaatigooriarluni paarisarpaa,
Jensillu oqaluttuarneratut tassaniilluni nuannerlunilu toqqissisimanartarpoq.
- Amerlasuut
allat uannit sakkortunerujussuarmik atugaqarsimasut nalunngilara. Angajoqqaalli
angerlarsimanersut, aalakoornersut qaatusimanersulluunniit,
nerisassaqarnerlunga imaluunniit nammineq arlaannik nassaartariaqassanerlunga
nalullugu sakkortuvoq, Jens Mikkelsen oqarpoq.
Taamani
ikinngutiminik Nielsimik pinnguaqatigiinnissamut tukkunissamullu
aggersarneqarnini eqqaamavaa. Nerisussanngoramik ikinngutaata angajoqqaavi
tamarmik immiartorfimmi viinnisorput. Tamatuma kingorna qaaqquseriarlutik
nipituumik nipilersorlutik erngunnissaat Jensip ilimagisimagaluarpaa.
Taamaaliortoqanngilarli. Akerlianik ikinngutinilu innartinneqarput.
Angajoqqaavi kingusiinnaaq aamma innarput. Ullaakkut kaffisunnialaartumi
itersarneqarpoq, ullaakkorsiutillu piareersarneqarsimapput, ikinngutaatalu angajoqqaavi
oqaloqatigeerujoorlutik eqqissillutik ullaakkorsiorput.
-
Taamanikkulli taamatut inuuneqarusullunga eqqarsarpunga. Taamatullu ullumikkut
inuuvunga. Tamanna uannut pissutsinut nutaanik uisiffiuvoq, taanna nassuiaavoq.
Angerlarsimaffik
pitsaasoq
Suli
atualernani meeqqat angerlarsimaffiannut inissinneqarpoq. Uulinermi Nuummi.
Angutaata tikinniariarluni tusaramiuk meeqqat angerlarsimaffiannut erninilu
aavaa angerlaallugulu, naak tamanna imaaliallaannaq pinngikkaluartoq.
– Ataatama
angerlarsimagaangami paarilluartuaannarpaanga, Jens Mikkelsen oqarpoq.
Meeqqat
angerlarsimaffianni sulisut ilaat kialaartumik eqqaamavai. Ilaatigut
”Store”-mik taaneqartartoq, Karenimik atilik. Taanna Jens Mikkelsenip inuunermi
aqqutaani inuttut pitsaasutut nalaatamisut oqaluttuarisaanut ilaavoq, taannalu
maanna inuuneranut sunniuteqarpoq. Inuunermut pitsaasumut.
- Inuit
pitsaasut naapissimagakkit asanninnermillu, soqutiginninnermik kialaarnermillu
pissarsiffigalugit iluatsitsivunga. Inersimasunilli pitsaasup tungaanut
ingerlatitserusuttunik, qaamanermillu takutitsisunik naapitsininni,
periarfissamik tigusiumassuseqarneq apeqqutaavoq, taanna oqarpoq.
Inuit
pitsaasut allat tassaapput Poul Bloch aamma John Kjaer Kamimmi
pisiniarfinniittut. Jens Mikkelsen arfinilinnik ukioqarluni Qapiarfiusaami
najugaqarfigisamini Bjarnes Centermarkedimi puiaasaaralerisunngorpoq.
-
Ikiuukkusuppunga, nunatsinnilu puukunik utertitsisarfimmik siullerpaajullutik
peqalersimanerat torrageqaara. Tassaniinninni mamakujuttunik iffianillu
pisarpunga, taanna oqaluttuarpoq.
Jens
Mikkelsenip meeraanermini misigisaminik ammanerujartornini ammasumik
oqaluttuaraa. Ukiuni kingullerni psykologimukartarpunga, iluaqutaavorlu.
-
Meeraanerma oqaluttuarinissaa ilikkarpara. Sakkortusimaqaaq. Pissutsit pillugit
ammasuunissaq isumalerujussuuvoq. Nuliara tusarnaarluartarlunilu
tapersersuisarpoq, Jens Mikkelsen nuliani Malu, 2010-mili ilisarisimasani
pillugu oqarpoq.
Atuarnera
Samuel Kleinschmidt
pivoq, Jens Mikkelsenilu ulluni ikittuaqqani napparsimasimasarnerminik
nersorneqartarpoq.
- Atuarnera
paarilluarpara, toqqissisimanaqaaq. Ilinniartitsisut attaveqarfigilluarpakka,
taanna oqaluttuarpoq.
Danmarkimi
inuusuttuunera
Jensip
apersortinnerata kingorna ilaqutariit Danmarkimut nuupput.
Ataataa
anaanaminut qanittumi najugaqarusuppoq, ilaqutariillu Randersimi nunassipput.
Ukiualuit qaangiummata angajoqqaavi avipput, ataataalu suli umiartormat Jens
Mikkelsen imminut isumagikkajuttarpoq.
- Ukiuni
taakkunani inersimasuuneq misilippara. Nerisassiortartussaavunga, eqqiaallunga
imminullu paaralunga. Ikinnguterpassuaqarpunga, maqaasisaqarpungali, anaanagalu
ungasissumiippoq Københavnimilu najugaqarluni, taanna oqaluttuarpoq.
Meeqqat
atuarfiat naammassigamiuk, Jens Mikkelsen saviminerilernermik ilinniarfimmi
atualerpoq. Biilinik iluarsaasartunngornissaq pilerigaa. Atuarneratali
immikkoortuisa pingajuat aallartimmat, sulilu suliffimmik misiliivissarsinani,
ilinniakkani taamaatiinnartariaqarpaa. Taarsiullugu ataataata ilisarisimasaani
nipilersuutaarniartumi quersuarmi pisortanngorpoq. Jensi atortunik
poortuisarpoq, saqqummersitsinernilu peqataasarluni, tamaanilu inunnik
takornartanik amerlasuunik naapitsisarpoq. Peqatigisaanik biilersinnaanermut
allagartartaarpoq.
Niuertarfilli
ingerlalluanngilaq, suliunnaarsitaavoq, kingornalu qaammatialunni
suliffissaqanngitsuuvoq. Affarmillu qatanngutiminut Nuummi najugalimmut
sianerluni suliffissaqarsinnaanerminik aperivoq. Pinerluuteqarsimasunilu
inissiisarfimmi suliffissaqarpoq. Jens Mikkelsen Nuummut uterpoq
pinerluuteqarsimasunut inissiisarfianni ikiortitut sulilerluni. Tamanna
2000-imi pivoq. Pinerluuteqarsimasunut inissiisarfimmi naammattumik
sivisussusilimmik sulereerami Danmarkimi herstedvester Fængselimi paarsisutut ilinniarnermik
aallartinnissamik neqeroorfigineqarpoq, tamannali pinngilaq, Danmarkimummi
uterluni sakkutuujoqqittussaavoq.
Sakkutuujunera
Bornholmimi Thistedimilu beredskabsstyrelsimi pivoq. Tassanilu biilinut
anginernut biilersinnaanermut allagartartaarpoq.
-
Nuanneqaaq, inuuninni piffissap nuannernerpaap ilagaa, Jens Mikkelsen
eqqaamasalikkersaarpoq.
Natilersuisoq
siulleq
Sakkutuujoreerluni
Kalaallit Nunaannukaqqippoq.
Tassani Nuuk
Transportimi sulilerpoq, siullermik usingiaasutut, tassanilu akisussaaffimmik
tigusisinnaaneq, suliffimmik paarsisinnaaneq piffissarlu eqqorlugu
suliartortarsinnaaneq takutinniarlugu ullaaralaakkut makittarlunilu
ilungersorluni sulivoq.
Biilinullu
annernut biilersinnaanermut allagartaqarnerata lastbiilinik nutaanik
biilersinnaatippaa, tamannalu nuannareqaa. Kingorna Godthåb Transportservicemi
suliffittaarpoq.
- Inuuninni
ukiut nuannernerpaat ilagaat. Nuliamali ilinniagaqassanersunga akuttunngitsumik
aperisarpaanga. Lastbiilinilli ingerlatsinera ajorinngivippara. Taamaanngippat
illup iluani suliffiussaaq, Jens Mikkelsen oqaluttuarpoq.
Ullut
ilaanni radiomi nunatsinni natilersuisutut ilinniartussamik siullermik
pissarsiortoqarnera tusarpaa. Pissanganartippaalu. Nuliata qinnuteqarnissaanik
taperserpaa. Taamaaliorporlumi oqaloqatiginninnissamullu takkulluni.
Qinnuteqartunit 50-init amerlanerusunit toqqarneqarneranik tamanna
kinguneqarpoq.
Aggustip
aallaqqaataani 2013-imi ilinniartutut aallartippoq, ukiullu sisamat
qaangiummata 2017-imi svenditut nunatsinnilu natilersuisutut siullertut imminut
taasinnaalerpoq, tamannalu mesteriata Henning Rasmussenip
ilinniartitsilluarsimasup Jensillu ilinniarnerani tapersersuilluarsimaneratigut
pisinnaavoq. Kaagillerfigineqarpoq erninilu Philip peqatigalugu Londonimut
arsaattunik isiginnaariarnissamut tunissutisivoq. Suliffimmi ilinniakkamilu
saniatigut Jens Mikkelsen qatserisartuuvoq. Ukiut siulliit 18-it piffissap
ilaatut qatserisartutut, ukiunilu kingullerni pingasuni upalungaarsimanermut
pisortap tulliatut. Piffissap ingerlanerani kisimiilluni natilersuisutut
sulinera sakkortuallaalerpoq. Jens Mikkelsen kingorna MJ Atconimi ukiuni
pingasuni formanditut sulivoq, Danmarkimilu holdlederitut ilinniareernermi
kingorna upalungaarsimasut pisortaata tulliatut atorfimmut qinnuteqarnissamut
neqeroorfigineqarpoq, pillugulumi.
Inuulluaqqusineq
imaannaanngitsoq
Jens
Mikkelsenip ataata 2011-mi kræfterluni toquvoq.
Jensip angunni
napparsimavimmi uninngasoq tikeraarpaa, siniffiatalu saniani
siniffilerneqarluni. Kingorna ataataa piartortunut paaqqitarinnittarfimmut
nuunneqarpoq.
- Ullaakkut
oqarasuaatikkut oqaluuppugut. Ulloq taanna kingusinnerusukkut ataatama
inooqataata pania sianerpoq, ataataalu anerningersimasoq oqaluttuaralugu, Jens
Mikkelsen oqarpoq.
Ataataminiinnermini
oqaloqatigilluarput, angutaalu Jensip meeraanerani
najuuttuaannarsimannginnerminut utoqqatserpoq. Tamatuma saniatigut toquguni
Jensi isumagisaqassanngitsoq kissaateqarpoq. Ataatsimut iliveqarfimmut
ilisaaginnarusuppoq. Taamaakkaluartorli Jensip angummi arsai Kalaallit
Nunaannut nassiuppai. Akianimi arsai siaruassallugit angumminut
isumaqatigiissutigaa.
- Arsai
ukiup affaa paarivakka. Nuunnitsinnut atatillugu arsat inuulluaqqunissaannut
piffissanngunnginnersoq nuliama aperivaanga. Taava umiatsiamik atorpunga,
kisimiillungalu Akianukarlunga arsai siaruarpakka, Jens Mikkelsen ataataminik
inuulluaqqusinini pillugu oqaluttuarpoq.
- Imaanut kuineri eqqumiippoq. Taava arsaata puua tigummilerpara, taassumali
aamma iginneranik tamanna kinguneqarpoq. Qujanartumik arsaatulli kivivoq,
taanna oqarpoq. Arnaa aamma kræftilerpoq.
Qaratsamigut
puammigullu kræfteqalerpoq. Misilittaavigineqarnissaminullu akuersivoq,
tamatumalu inuunera sivisunerulersippaa. Akeqarporli, 2015-imilu toqussi
tikillugu sakkortuumik anniartarpoq.
Toqunnginnerminili
Jensip affarmik qatanngutaa Tine naapimmagu pitsaasortaavoq. Taanna Tinap
angutaanut qallunaamut Danmarkimut aallarmat tunniuttariaqarsimavaa.
Jensip
nuliatalu Jensip qatanngutaa inuit qarasaasiakkut naapittarfianni 2015-imi
nassaaraat, allaffigalugulu. Siusinnerusukkut anaanani attaveqarfigerusunnagu
paasititsisaraluarpoq. Akinissaanulli piffissaq sivisooq ingerlaqqaarpoq.
Naapikkusupporlu.
- Taava
Viborgimi natilersuisutut ilinniarninni naapippugut. Naapikkatta anaanaga
pillugu oqaluttuanngilanga. Tina taamatut kissaateqanngilaq, taanna
oqaluttuarpoq. Aanaanatalu nappaataa sakkortunerulermat, Jens Mikkelsenip
najami arni naapikkusuppagu, tamanna piffissami qaninnermi pisariaqartoq
oqaluttuuppaa.
Tamarmillu
nuannaarutigeqisaannik, arnaata novembarimi 2015-imi toqunissaa
sioqqullugu imminnut naapipput.
Ullumikkullu Jens suli najaminut ilaqutaanullu ernerinullu pingasunut
attaveqateqarluarpoq.
-
Attaveqaannarpunga, pingasunillu soraluaqarpunga, taanna qungujulluni oqarpoq,
affarmillu angajumini aamma sisamanik soraluaqarpoq: Mike, Ane Sandra Mia aamma
Maya.
Sulinngittarnissani
ilikkaraa
Jens
Mikkelsenip sulinngiffeqartarnissani feriartarnissanilu ukiuni kingullerni
aatsaat aallutilerpai.
-
Feeriartarneq imaannaanngitsuusartoq isumaqartuartarpunga. Suliffiga
eqqarsaatigiinnavittarpara, taanna oqaluttuarpoq.
Ukioq manna
ilaquttanilu siullermeerlutik Danmarkip avataani aasaanerani feeriarput.
Mallorcamukassallutik toqqarpaat. Angalatitseqatigiiffimmilu all inclusivemik
billetersinatik, nammineerlutik feeriarnissartik, sumi najugaqarnissartik
sunillu takusassarsiornissartik toqqarpaat.
- Misigisaq
nuanneqaaq. Qeqertaq nuannersoq. Aappaagu uteqqilluta ilikkarniaqqissavarput,
Jens Mikkelsen oqaluttuarpoq.
Malumik
naapitsinini pillugu takoqqaarnerani asannilersoorfigisimallugu oqarpoq.
Nuummi
kommunip allaffiani naapipput. Jensip Danmarkimi Parkenimi
monstertruck-showimik isiginnaariarnissamut imminerminut ernerminullu
najugaqarnermut uppernarsaatit aavai.
- Malu
saaffiginnittarfimmiippoq. Takuinnavillugu asannilersoorfigaara.
Allaqatigiittalerpugut, utimullu tikeqqinniarluta naapippugut. Tamanili
inooqatigiilerpugut, taanna nuliani 2011-mi katissimasani pillugu
oqaluttuarpoq.
Ulumikkut
Malu Grønlandsbankenimi sulivoq, aningaasaqarnermut siunnersuisutut ilinnialertussaavoq. Lucas aqqaneq-marlunnik
ukiulik erneraat, taassumalu saniatigut Jensi siusinnerusukkut
inooqatigisimasaminik Philip 18-iliilersoq erneraa.
Ilaqutariit
sunngiffimminni pinngortitamiinneq, aalisarneq piniarnerlu nuannaraat. Erninilu
Lucas Philipilu arsarneq ingerlattarpaat, ikinngutinilu ilaquttanilu
peqatigissallugit nuannaralugu.
Ataatsimut
isigalugu Jens Mikkelsenip taamani ikinngummini Nielsimi tukkugami inuuneq
inuunerorusutani inuuneraa.
-
Kinguaariinni allannguisuullunga paasitinneqarpunga. Amerlagunanngitsut
ullumikkut angusannik angusaqarumaarnera takorloorsimassavaat. Inuit naapitat
iluaqutissatut tunniussaannik atorluaanissaq pingaarpoq. Taamaattullu
amerlasuut naapippakka, Jens Mikkelsen naggasiivoq.
